Read ngakarimojong Yos. 24 Bible Online

Yos. 24 - ngakarimojong bible

Yos. 24

¹Abu nai Yosua tocunak ŋikabilae a Ŋisirael daadaŋ Sekem. Tonyaraiya iŋes ŋikasikou, ŋikarikok, ŋikatubok ŋakiro ka ŋikapolok, totukokinos ŋul daadaŋ kiŋaren Asaduku ŋina ka Acamunet.

²Tema nai Yosua lotuŋa daadaŋ, “Ebala Ekapolon ŋolo erae Akuj a Ŋisirael ebe, ‘Koloŋ sek apotu atapapaa kus kiboiyoto ayaaye aŋolol Eupurate, epei atapapaa kus a ŋul iŋes Tera papa keŋ ka Aburaam ka Naor. Apaki ŋin, elipete ikes neni a ŋakujo.

³Abu ayoŋ oyau papaa kus Aburaam alokekwaye aŋolol Eupurate, abu etenite iŋes anakwap a Kanaan a daadaŋ ka oinak iŋes ŋiletok ŋulu alalak, abu oinak iŋes ikoku Isaka,

⁴abu oinak Isaka ŋisapa lu: Yakob ka Esau, oinak Esau akwap ŋina a ŋikamukumukui ŋina eyai emoru Seir, nai abu Yakob ka ŋidwe keŋ totiyaaros Ijipit.

⁵Abu nai ayoŋ eyakiya Moses ka Aron neni atapapaa kus nakwap a Ijipit ka abu esican ŋituŋa a Ijipit nooi a ŋakisicaneta a ŋuna abu esicania ikes, ido okoriku iyes anakwap a Ijipit.

⁶Ani ayauni ayoŋ atapapaa kus alo Ijipit, ipotu iyes todolut Nanam ŋina Areŋan, ido apotu Ŋijipitian ikiwuapakis a ŋagaari ka a ŋaŋolei, todolut tari Nanam ŋina Areŋan.

⁷Nai apotu atapapaa kus kikaloikis Ekapolon akiŋarakin ikes, tosodi abu Ekapolon kiwuak akiryonut kidiŋ ŋisigarya a Ijipit ka iyes, tomunya Ŋijipitian a ŋakipi a ŋuna ka anam. Iyenete iyes ŋilopeyek ŋuna abu ayoŋ etiya lotuŋa a Ijipit. Ekaku, ipotu iyes kiboiyoto apaki ŋina aoyan analoŋisat.

⁸Abu ayoŋ okoyau iyes nakwap a Ŋiamori a ŋulu eboiyete alo Kide aŋolol Yorodan. Apotu ikes ikitijikis iyes, nai abu ayoŋ epotokikes nakan kus. Abu ayoŋ omunya ikes alokiŋaren kus, ido ipotu iyes kikamasi akwap kec.

⁹Apaki ŋina acamitor Balak lokoku a Sipor ŋolo arae erwosit a Moab akitijiore Ŋisirael, abu iŋes kiyakiya ŋituŋa neni a Balaam a lokoku a Beor abunore agatakin ikes ŋuna aronok.

¹⁰Nai abu ayoŋ nyapupoki ŋakiro a Balaam, aŋun, abu iŋes toboŋonok akiterereŋ, ido abu ayoŋ okolaku iyes aneni keŋ.

¹¹Ipotu nai iyes todoka aŋolol Yorodan totubunos Yeriko, neni aponiata ŋituŋa a Yeriko ikitijioto iyes lopite ŋolo aponiata ŋikabilae lu ikitijioto iyes: Ŋiamori, Ŋiperisi, Ŋikanaani, Ŋiitaiti, Ŋigerigasi, Ŋiipi ka Ŋiyebusi; nai abu ayoŋ epotok ikes nakan kus.

¹²Abu ayoŋ ewuak ekabule lorwosi ŋuluarei ŋulu a Ŋiamori eriŋa iyes nyedolo neni kec, ido apotu ikes tosuros, meere aŋuna a ŋileŋia kus, kori aŋuna a ŋikaleŋeleŋe kus asurotor ikes.

¹³Aŋun, abu ayoŋ okoinak iyes akwap ŋina pa ibukoritotori ŋakinyinyir ka ŋitaunio ŋulu pa arae iyes idukokinete, ido iboiyete iyes alotooma kec ka inyamete ŋaraito ke epiini ka icuyete akimyet a ŋikito a ŋulu enyaritae Olipa, ŋikito ŋulu pa arae iyes idupakinete.’

¹⁴“Tokona nai, itemokino iyes tokerito Ekapolon ka kitiyanakis iŋes anakikinyoma kus a daadaŋ. Toŋero akitiyanakin ŋakujo ŋuna ewuapito atapapaa kus alokekwaye aŋolol Eupurate ka anakwap a Ijipit, nai kitiyanakisi Ekapolon.

¹⁵Nai ani pa kejok aneni kus akitiyanakin Ekapolon, toseutu nai iyes ŋilopeyek nakoloŋit na ŋini itiyanakinete; kerae ŋakujo ŋuna etiyanakinete atapapaa kus Alokekwaye Aŋolol Eupurate, kori ŋakujo a Ŋiamori a ŋulu iboiyete iyes nakwap kec. Ani ayoŋ ka ekal kaŋ, ikitiyanakini Ekapolon.”

¹⁶Toboŋokis nai ŋituŋa temasi, “Nyikiryama ca isua ka akiŋer Ekapolon, kitiyanakinae ŋakujo ŋace!

¹⁷Anerae erae Ekapolon ŋolo erae Akuj kosi iŋes abu ikiyau isua ka atapapaa kosi anakwap a Ijipit, aneni araakare isua ŋipi, abu kitiya ŋaumonokineta ŋuna apolok kiteetei isua. Abu iŋes ikiten isua alorotin a daadaŋ ka anakwapin a daadaŋ a ŋuna aponi isua tolomarae analosit kosi.

¹⁸Abu Ekapolon Akuj tobwaŋ alokiŋaren kosi ŋakwapin daadaŋ kaapei ka Ŋiamori ŋulu alomito nakwap na. Aŋun, ikicamit isua daŋ akitiyanakin Ekapolon, anerae erae iŋes Akuj kosi.”

¹⁹Nai abu Yosua tolimok ŋituŋa tema, “Nyipedorete iyes akitiyanakin Ekapolon. Erae iŋes Akuj ŋina Asegan; erae iŋes Akuj ŋina alilyan. Nyisyoni iŋes ŋasecisya aŋuna ka aŋerit kus iŋes.

²⁰Ani ca kiŋero iyes Ekapolon, kitiyanakis ŋakujo ŋunagelae, ikimani iŋes iyes, ido ikisican, itomunya iyes, torae bo sek ajok Ekapolon aneni kus.”

²¹Nai apotu ŋituŋa temasi neni a Yosua, “Mam! Ikitiyanakini isua Ekapolon.”

²²Tolimok nai Yosua ikes tema, “Iyes pei icamut aruwor ŋisuudae kus a ŋilopeyek aŋuna iseuniata akitiyanakin Ekapolon.” Temasi ŋituŋa, “Ee, ikirae isua ŋisuudae.”

²³Tolimok Yosua ikes tema, “Tokona nai toŋero ŋakujo ŋunagelae ŋuna iyakatar iyes, kiikisi atemar iwuapete iyes Ekapolon bon ŋolo erae Akuj a Ŋisirael.”

²⁴Apotu ŋituŋa tolimokis Yosua temasi, “Ekapolon bon ŋolo erae Akuj kosi, iŋes ecamitae isua akitiyanakin ka akiwuap ŋakiro keŋ.”

²⁵Akoloŋit ŋina acunakinitor Yosua Ŋisirael Sekem, abu iŋes towoik ikes anacamunet ke Ekapolon, ayakasi nacamunet ŋin Ŋikisila ka ŋakiro ŋuna amaikina Ŋisirael kiwuapa.

²⁶Kigir Yosua ŋakiro ŋun lokitaabo ŋolo a Ŋikisila a ŋulu ka Akuj, tosodi tolemu amoru ŋina apolon, tosipok diyete ekuyon ŋolo apolon ŋolo ayai nakibois ŋina Asegan ŋina ke Ekapolon.

²⁷Tolimok nai Yosua ŋituŋa daadaŋ tema, “Amoru na iŋes ikisuudae iwon aŋuna adaunia akiirar ŋakiro daadaŋ ŋuna erwor Ekapolon neni yok. Iŋes ebuni akisuuda iyes erae pa kiwuap iyes acamit a Akuj kus.”

²⁸Kitolot nai Yosua ŋituŋa, toloto ŋulutuŋa nakwap kec.

²⁹Ani kelunyarosi ŋakiro ŋun, abu Yosua lokoku a Nun ŋolo arae eketiyan a Ekapolon totwan. Arae ŋikaru keŋ 110.

³⁰Aponi tonukae iŋes nakwap keŋ neni enyaritae Timina Sera anakwap a ŋina a ŋikamukumukui a ŋina a Epuraim, Kuju emukura Gaas.

³¹Apotu Ŋisirael kitiyanakis Ekapolon ŋirwa daadaŋ ŋulu ayarya Yosua ka ŋulu a ŋikasikou a ŋulu apotu kidoŋo ketwana Yosua, ŋikasikou ŋulu ayenete ŋakiro daadaŋ ŋuna ajokak ŋuna etiyat Ekapolon neni a Ŋisirael.

³²Aponi tonukae ŋakoyo a Yosepu ŋuna sek keyaunete Ŋisirael anakwap a Ijipit nakwap ŋina kegyeli Yakob a ŋisilipae a amiat alodwe ka Amor a papa keŋ a Sekem. Abu akwap ŋina toruwor ŋina a ŋituŋa a Yosepu.

³³Abu Eleasar daŋ lokoku ka Aron totwan. Aponi tonukae iŋes Gibea lotaun ŋolo ainakinitae neni a Pineas alokoku keŋ anakwap a ŋina a ŋikamukumukui a ŋina a Epuraim.