Read ngakarimojong Yos. 3 Bible Online

Yos. 3 - ngakarimojong bible

Yos. 3

¹Taparacu sek, kisyokakis Yosua akienyun ka Ŋisirael daadaŋ towotokis alo Sitim, toloma Kide aŋolol Yorodan.

²Kelunyarosi ŋirwa ŋiuni, tokeerekis ŋikarikok a ŋituŋa alomari a Ŋisirael.

³Kicika ikes ŋituŋa temasi, “Ani iŋolikinete iyes Asaduku ŋina ka Acamunet a ŋina a Ekapolon kus edakito ŋisacaradotin a ekabila a Lepi, itemokino iyes tonyout kiwuapakis,

⁴ikotere ianyunete erot ŋolo emaikina kiwuapakis, anerae nyiyenete sek iyes erot ŋol. Nai emaikina iyes tocadakinos neni ebi akilomita. Nyiyapiyasi Nasaduku.”

⁵Tolimok nai Yosua ŋituŋa tema, “Kitesegas, kitaleunos, anerae itiyae moi taparacu Ekapolon ŋaumonokineta neni kus.”

⁶Tolimok daŋ ŋisacaradotin tema, “Todaka Asaduku ŋina ka Acamunet tolunyaros kiŋaren ŋituŋa.” Todakasi nai ikes Asaduku ŋina ka Acamunet, toloto kiŋaren ŋituŋa.

⁷Kirwor nai Ekapolon neni a Yosua tema, “Akoloŋit na, esyakini ayoŋ akitopoloor iyoŋ alokiŋaren Ŋisirael daadaŋ, ikotere toyenuniata ikes atemar ikiruki ayoŋ ka iyoŋ lopite ŋolo abunio orukioto ka Moses.

⁸Kicikak iyoŋ ŋisacaradotin ŋulu edakito Asaduku ŋina ka Acamunet atemar emaikina ikes towua edolete lokipetot ŋolo ka aŋolol Yorodan.”

⁹Tema nai Yosua neni a Ŋisirael, “Toapuutu neni kaŋ, kiirasi ŋakiro ŋuna ke Ekapolon Akuj kus.”

¹⁰Tema Yosua “Iyenunete iyes atemar irukito kire ka Akuj ŋina eyari ŋina esurokini alokiŋaren kus ŋituŋa ŋulu enyaritae Ŋikanaani, Ŋiitaiti, Ŋiipi, Ŋiperisi, Ŋigerigasi, Ŋiamori ka Ŋiyebusi, iyenunete iyes ŋun alopite a lo:

¹¹Analosit kus Yorodan, ikiŋarenikini iyes Asaduku ŋina ka Acamunet a Ekapolon Akuj ŋina erae alope akwap daadaŋ.

¹²Tokona nai, toseu ŋikilyok ŋitomon ka ŋiarei alokabilae a Isirael, a ŋolokabila epeikile.

¹³Apaki ŋina iciakyata ŋisacaradotin ŋulu edakito Asaduku ŋina ka Acamunet a Ekapolon a ŋolo erae elope ka akwap daadaŋ ŋakipi ŋuna a Yorodan, etubosi ŋakipi towua aiwapei.”

¹⁴Ani ewotokinete ŋituŋa aneni alomito, akidok aŋolol Yorodan, eŋarenikinito ŋisacaradotin ŋulu adakito Asaduku ŋina ka Acamunet.

¹⁵Elapenene Yorodan ŋirwa ŋulu elemere torapuwasi ŋakipi ŋikipetetyo keŋ. Ani edolunete ŋulu adakito Asaduku ŋina ka Acamunet naŋolol apaki ŋina ecakyata ŋisacaradotin ŋulu adakito Asaduku ŋina ka Acamunet egyer a ŋakipi,

¹⁶totubos ŋakipi, towua aiwapei aneni alwanan, alotaun a ŋolo anyaritae Adam, a ŋolo ebakasi ka Saretan. Tosodo ŋakipi ŋuna aleleete lowae ŋolo ka anam a ŋina enyaritae ŋina Atwan, totubos. Todokasi nai ŋituŋa ekekwaye aŋolol Yorodan alowae a ŋolo iteosi ka Yeriko.

¹⁷Apaki ŋina adokaryata Ŋisirael aneni atyaikinito ŋakipi, awoete ŋisacaradotin ŋulu adakito Asaduku ŋina ka Acamunet a Ekapolon Akuj alokidiŋ Yorodan aneni aonit, akitodol ŋina adokaryata Ŋisirael daadaŋ ekekwaye Yorodan.