Read ngakarimojong Yos. 5 Bible Online

Yos. 5 - ngakarimojong bible

Yos. 5

¹Ani iirarete ŋirwosi ŋulu a Ŋiamori alo To aŋolol Yorodan kaapei ka ŋulu a Ŋikanaani alokipetotyo ka anam Mediteranian epite ŋolo kitoonio Ekapolon Akuj ŋakipi a Yorodan akitodol ŋina adokaryata Ŋisirael daadaŋ, tobuliyo ikes, tokuryaketa akitijiore Ŋisirael.

²Apaki ŋin, tolimok Ekapolon Yosua tema, “Kibetununu ŋamoru kisitiya ikwa ŋileŋia kileŋerya nabo Ŋisirael.”

³Kitiyau nai Yosua ŋileŋia ŋulu arae ŋamoru kileŋerya Ŋisirael alomukura a ŋolo enyaritae Gibeas-Aralos. [1]

⁴Ŋakiro ŋuna eleŋerya Yosua Ŋisirael ikes nuta: Aris ŋikilyok daadaŋ ŋulu awotunete alo Ijipit, ŋulu apedorete ajiore daadaŋ kemunyarosi analoŋisat epote alo Ijipit.

⁵Eleŋeritae sek ŋikilyok daadaŋ eriŋa ikes nyerotokino alo Ijipit, nai ŋulu auruunio kerotokis ikes alo Ijipit apaki ŋina awosyata ikes analoŋisat, pa eleŋeritae.

⁶Arae ŋun aŋuna awosyata Ŋisirael analoŋisat ŋikaru ŋatomoniomwon tari ŋina amunyaror anyamet daadaŋ ŋina a ŋikilyok a ŋulu apedorito ejie a ŋulu sek awotunete alo Ijipit. Apotu ŋikilyok ŋul daadaŋ tomunyaros, anerae apotu toŋero akiwuap ŋakiro ŋuna a Ekapolon Akuj. Aŋun abu Ekapolon Akuj kikoŋ atemar nyiŋolikinete ikes akwap ŋina koloŋ ekoŋit iŋes neni atapapaa kec ainakin iwon. Erae akwap ŋin ŋina eleleata ŋakile ka akimyet ŋina ka ao.

⁷Aŋun abu Ekapolon Akuj kilunyok ŋiletok kec lorot kec, ido arae ikes abu Yosua kileŋer ikwapei sek pa eleŋeritere ikes apaki ŋina ka awosit.

⁸Ani kirikakin akileŋer ebuku a Ŋisirael daadaŋ, apotu ikes kiboiyoto aneni alomito akitodol ŋina aŋaleunioto ŋulu eleŋeryo daadaŋ.

⁹Tolimok Ekapolon Yosua tema, “Adau ayoŋ akoloŋit na alemar aneni kus ŋileec ŋulu sek iraakatar ŋipi alo Ijipit.” Erae ŋakiro ŋuna ka alemar ŋileec iŋes enyaritere nen Giligal tari tokona.

¹⁰Ani eriŋa Ŋisirael elomito Giligal, nadipo ŋina alo Yeriko, apotu kinumunuma ŋasuban ŋuna a Paska eboŋ ŋirwa ke elap ŋitomon ka ŋiomwon elap ŋolo ke epei.

¹¹Akoloŋit ŋina atupakini ŋina a Paska, apotu ikes tonyama ŋinyomen ŋulu analup a ŋun ikwa ŋamugati ŋuna emam ŋakinyalet ka ŋikinyom ŋulu epeitoe.

¹²Akoloŋit ŋina atupakini ŋina anyamyata ikes ŋinyomen ŋulu analup a ŋun abu akimuj ŋina anyaritae “Manna” todaun, tosodo Ŋisirael tonyama ekaru ŋol ŋinyomen ŋulu anakwap a Kanaan.

¹³Apaki apei eyai Yosua diyete Yeriko, abu iŋes kikeu ereet keŋ kiŋolik ekile ewoi alokiŋaren keŋ etiŋit ekileŋ. Tolot Yosua neni ayai iŋes kiŋit tema, “Irae iyoŋ epei a alokidiŋ kosi, kori irae emoit?”

¹⁴Toboŋok ekile ŋol iŋes tema, “Meere ayoŋ epei alokidiŋ kus, kori emoit, nai ayoŋ arikit ŋasigarya a Ekapolon Akuj, abu tokona ayoŋ.” Toryedik nai Yosua kijuuru todol ereet kwap, kilip neni a ekile a ŋol, kiŋit tema, “Arae ayoŋ eketiyan kon Ekapolon, nyo icamit iyoŋ ayoŋ etiya?”

¹⁵Toboŋok ekarikon ŋasigarya a Ekapolon iŋes tema, “Tolaca ŋamuk anakejen kon, anerae iwoi iyoŋ anakibois a ŋina asegan.” Tosodi nai Yosua kitiya ikwaŋina alimokinitere.