Read ngakarimojong Yos. 8 Bible Online

Yos. 8 - ngakarimojong bible

Yos. 8

¹Tolimok Ekapolon Yosua tema, “Nyikuryaniar, kori nyikibul; toriko ŋikajiok toloto lotaun Ai. Adau ayoŋ akipotokin nakan kon erwosit ŋolo ka Ai kaapei ka ŋituŋa keŋ ka etaun keŋ ta akwap keŋ.

²Itemokino iyoŋ torem Ai lopite ŋolopei ibunio iyoŋ toremyo Yeriko kaapei ka erwosit keŋ. Ikicamakin iyes ayaar ŋiboro ka ŋibaren ŋulu iremunete alo Ai, tourumikisi etaun alowae a ŋolo alokaku.”

³Torotokis nai Yosua ka ŋikajiok daadaŋ akicodokin Ai. Abu iŋes toseu ŋikilyok ŋulu ke ejie ŋalipyo ŋatomoniuni, kitorotok ikes nakwaare.

⁴Kicik iŋes ikes tema, “Kiirasi! Itemokino iyes tourumikis etaun Ai alowae a ŋolo alokaku. Nyicadakinosi nooi alotaun, emaikina iyes daadaŋ totenito.

⁵Ikitumeikin ayoŋ ka ŋisigarya ŋulu ikirukitor etaun. Ani nai emotunosi ikes neni kosi, ebwaŋae isua toemae.

⁶Elomunete ikes alotaun akiritar isua tari ŋina emodiyarere isua ikes neni alwanan alotaun; anerae etemarete ikes ebe, ‘Abwaŋasi nabo Ŋisirael lopite ŋolopei paaran.’ Aŋun, ani ebwaŋae isua keekar,

⁷emaikina iyes tokuraun aneni iurumikinitotor etaun, kikamasi etaun. Ebuni Ekapolon ŋolo erae Akuj kus ainakin etaun nakan kus.

⁸Ani nai ikamarete iyes etaun, itemokino kicunyakis, kitiyata lopite ŋolo elimunitor Ekapolon. Adau ayoŋ alimokin iyes ŋuna kitiya.”

⁹Kitorotok nai Yosua ikes, toloto neniurumikinet etaun kiupokinos ikes kidiŋ Besel ka Ai alowae a ŋolo alo To. Nai toper Yosua akoloŋit ŋin nalomari neni aperete ŋituŋa ŋuluce.

¹⁰Kisyokak Yosua akyenyun taparacu, torukosi iŋes ka ŋikasikou a Ŋisirael, kiŋarenikis ajore kiwonyakis lotaun Ai.

¹¹Kiwonyakis ŋikajiok daadaŋ ŋulu arukito ka iŋes toapiyasi lotaun, totumeiyaros jik kiŋaren etaun, tosodo toperikis alowae a ŋolo alo Kuju etaun. Kidiŋ ajore a Yosua ka etaun, ayai akadipaalat.

¹²Arae ekimar a ŋikilyok a ŋulu sek atyakari Yosua kidiŋ Besel ka Ai aurumikin etaun alowae a ŋolo alo To ŋalipyo ŋakan.

¹³Epite lo iŋes aponiata ikes tokorakinotor aŋuna ka akitijikin Ai. Kidir ajore neni alalan lowae ŋolo alo Kuju etaun. Torubakis ŋulu sek atyakaryo kidiŋ Besel ka Ai iboiyete alo To etaun, edapito etaun. Akoloŋit ŋin nakwaare, abu Yosua tolot tooma nakadipaalat.

¹⁴Ani irumuni erwosit ŋolo ka Ai ŋakiro ŋun, apotu ŋituŋa keŋ kisyokakis akyenyun, kicodosi ŋikilyok ŋulu a ajore akitijiore Ŋisirael aneni arounit neni enyaritae Araba. Nai pa ayeni erwosit ka Ai atemar eurumikinitae etaun alowae a ŋolo alokaku.

¹⁵Tosodo Yosua kaapei ka Ŋisirael kiredakis abwaŋa edolunete ŋikajiok ŋulu ka Ai, toema lowae ŋolo ka aloŋisat.

¹⁶Tonyaraunae ŋikilyok ŋulu aya Ai daadaŋ akiwuap Yosua. Kirita ikes ajore a Yosua, toekasi alotaun.

¹⁷Emam ekile edio alo Ai, kori alo Besel ŋolo pa asutit akiwuap Ŋisirael. Apotu ŋikilyok kimyekis ŋikekya ŋulu ke etaun eororete, tosuto akiwuap Ŋisirael.

¹⁸Tolimok nai Ekapolon Yosua tema, “Tododa ekileŋ kon Ai, anerae abuni ayoŋ akipotokin iŋes neni kon.” Tododa nai Yosua ekileŋ keŋ Ai.

¹⁹Apotu nai ŋikajiok ŋulu aurumikinito etaun tokuraun aneni aŋopitotor apaki ŋinapei ekyaarya Yosua akan keŋ, toemakinos lotaun kikamasi etaun, kicunyakis atipei.

²⁰Ani iŋoliyarete ŋikajiok ŋulu ka Ai kaku kec, kiŋolikis apuru eremit kidiama alotaun kec. Todaun ikes neni eemete, anerae apotu Ŋisirael ŋulu sek akerete alokiŋaren kec daŋ lowae ŋolo ka aloŋisat toboŋo akisiiryakin ikes.

²¹Ani iŋolikinete Yosua ka Ŋisirael daadaŋ atemar kikamasi etaun ŋajorei kec ŋuna aurumikinito nen ka iŋolikinete apuru eremit kidiama, toboŋo ikes kisiiryakis ŋikilyok ŋulu ka Ai.

²²Apotu Ŋisirael ŋulu aurumikinito etaun potu kiŋa akimorikin ka Ŋisirael ŋuluce. Torookis Ŋisirael ŋituŋa ŋulu ka Ai a alowaetin a daadaŋ, toara daadaŋ. Emam ituŋanan abu tobucar, kori kidoŋ eyari.

²³Nai apotu ikes kikamut erwosit ŋolo ka Ai torikosi neni a Yosua.

²⁴Ani kedaut Ŋisirael amunyar ŋituŋa daadaŋ ŋulu ka Ai anariet aneni sek ewuaparete ŋikilyok ŋulu ka Ai Ŋisirael, toboŋosi nai Ŋisirael daadaŋ lotaun Ai toara ŋituŋa daadaŋ ŋulu aya lotaun.

²⁵Ekimar a daadaŋ a ŋulu aponi toarae akoloŋit ŋin, ŋikilyok kaapei ka ŋaberu, arae ŋalipyo ŋatomon ka ŋaarei.

²⁶Abu Yosua nyetiyau kwap akan keŋ ŋina adodaritor ekileŋ lotaun Ai, akitodol ŋina amunyarere ŋituŋa daadaŋ ŋulu ka Ai.

²⁷Ŋibaren bon ka ŋiboro apotu Ŋisirael yaasi ikwapei ecikitor Ekapolon Yosua.

²⁸Kicunyak nai Yosua Ai, kituruwo ereŋorot ŋoloruba ka neni asilon tari tokona.

²⁹Kinenek nai Yosua ka auno erwosit ŋolo ka Ai lokitoe tomyed, tosodi kimyek akuwan ineno akitodol eboŋ. Ani edoiyori akoloŋ, tolimu iŋes atemar tolacunae akuwan alokitoe a ŋol kiperikinoe lopuke a etaun. Totukokinae kidiama akuwan keŋ ŋamoru ŋuna alalak ŋuna eya nen tari tokona.

³⁰Abu Yosua todukok lomoru Ebal Namuroet ŋina ke Ekapolon a ŋolo erae Akuj a Ŋisirael.

³¹Aduki iŋes Namuroet ŋin a ŋamoru a ŋuna pa etyekitae a ŋasuwa lopite ŋolo elimunitor Moses alokitaabo a ŋolo a Ŋikisila. Inakis ikes a nen Ekapolon ŋamuronisya ŋuna epeyo ka inakis ŋainakineta ŋuna ka akimorikina.

³²Kigirak daŋ Yosua namoru ŋunadapal Ŋikisila ŋulu sek egirit Moses. Eteete Ŋisirael daadaŋ Yosua igiri Ŋikisila ŋul.

³³Apotu Ŋisirael daadaŋ, ŋikasikou, ŋikapolok, ŋikatubok ŋakiro ka ŋituŋa ŋulugelae ŋulu arukitotor ikes, towua daadaŋ iteosi, toyai Asaduku ŋina ka Acamunet ke Ekapolon kidiŋ kec, kiŋoliyarito lowae ŋolo aya ŋisacaradotin ŋulu ke ekabila a Lepi ŋulu adakito Asaduku ŋina ka Acamunet ke Ekapolon. Towo epeiwae a ŋituŋa emulenito emoru Gerisim, towo epeiwae emulenito emoru Ebal. Ecikit koloŋ Moses ŋolo arae eketiyan a Ekapolon ikes akitiya ŋun edoli apaki ŋina iterereŋere ikes.

³⁴Kedaun ŋun, tosyomak Yosua ŋituŋa Ŋikisila daadaŋ, tosyomak tari ŋarereŋisyo ka ŋilam, lopite ŋolo igiritere lokitaabo a Ŋikisila.

³⁵Tosyomak Yosua ŋituŋa Ŋikisila a Moses daadaŋ, kiirasi ŋituŋa daadaŋ kiirasi tari ŋaberu ka ŋidwe ta ŋituŋa ŋulu a ŋakwapin a ŋunagelae ŋulu aya nen.