Read ngakarimojong 1 Tim. 2 Bible Online

1 Tim. 2 - ngakarimojong bible

1 Tim. 2

¹Ŋuna iŋarenete, ekemaimai ayoŋ iyes daadaŋ atemar toyai akimaima, akilip, akiŋita ka alakanar neni ka Akuj aŋuna a ŋituŋa a daadaŋ;

²aŋuna a ŋirwosi ka aŋuna a daadaŋ a ŋulu einakinitae apolou, ikotere nai ikiboi iwon anakiyar a ŋina inapakina ka ŋina isilit; ŋina ecamit Akuj ka alopitesyo a ŋulu ajokak.

³Erae ŋun ŋuna ajokak ka italakarito Akuj Akaiunan yok,

⁴ŋina ecamit ŋituŋa daadaŋ toiunae ka toyenut ŋuna a kire.

⁵Anerae eyai Akuj apei bon ka eyai epei bon ŋolo erae ekemorikinan Akuj ka ŋituŋa; ituŋanan ŋin, iŋes Yesu Kristo.

⁶Abu iŋes elope tojal akiyar keŋ aiunia ŋituŋa daadaŋ. Ŋakiro ŋun, ikes apotu toruworos akitoodikinet anapaki a ŋina eyookino atemar ecamit Akuj aiun ŋituŋa daadaŋ.

⁷Iŋes nai ekeyakuunere ayoŋ ikwapei ekeseran ka ekiyakia, akitatam ŋituŋa ŋulu nyerae Ŋiyudayan ŋakiro ŋuna ka anupit ka ŋuna a kire. Nyesudi ayoŋ ŋakiro; erworo ayoŋ ŋuna a kire!

⁸Eitanit nai ayoŋ atemar anakiboisyo a daadaŋ, a ŋuna ilipyata Ŋikristo, itemokino ŋikilyok kilipa ikiarito ŋakan ŋuna emam asecit; tomam aŋoit kori ebura eyakatar.

⁹Eitanit ayoŋ ŋaberu daŋ tonapito ejok alopitesyo a ŋulu nyisuparete ŋituŋa ŋuluce. Nyitemokino ikes akisibusa a ŋitim a ŋulu eoitoe, kori anapit ŋiboro ŋulu itiyaunitae a egolid kori a ŋakamilimili kori a ŋilowi a ŋulu epol egyelit;

¹⁰nai itemokino ikes torae ŋuna ajokak a ŋiticisyo, ikwapei ejokyata ŋun anaberu a ŋuna ebasi ikinupit ikes ŋakiro ŋuna ka Akuj.

¹¹Itemokino ŋaberu toyenut ŋakiro anakililiŋ ka anakitiditeuna.

¹²Nyacamakinit ayoŋ aberu adio itatami kori epolokinit ŋikilyok; itemokino ikes erae ŋuna ililiŋete.

¹³Anerae Adam aponi tosubunae ekiŋaren, tosubunae nai Epa.

¹⁴Nabo meere Adam aponi tomodikinae, nai arae aberu, ido tobil ekisil ŋolo ka Akuj.

¹⁵Nai eiun aberu aŋuna ka akidore, erae kerubaki iŋes ananupit, anamina, alopite a ŋolo itoodiunit atemar ekerit iŋes Akuj ka ŋolo ka akiyapara.