Read ngakarimojong 1 Tim. 3 Bible Online

1 Tim. 3 - ngakarimojong bible

1 Tim. 3

¹Erae na alimunet ŋina ikinyoma: ani kiitanit ituŋanan aruwor ekarikon ŋolo a Ŋikristo, iitanit iŋes etic ŋolo ajokan nooi.

²Itemokino ekarikon ŋolo a Ŋikristo erae ŋolo nyitoronitae, ŋolo eyakar aberu apei, ŋolo etyamaarit, ŋolo ecayete ŋatameta, ŋolo ejokak ŋipitesyo, ŋolo ijaununui ŋituŋa lore keŋ ka ŋolo epedorit akitatam ejok.

³Itemokino nyerae ŋolo emerana, ŋolo eryenyaana, nai torae ŋolo iyapara, meere ŋolo iburana ka ŋolo emina ŋisiliŋa.

⁴Itemokino iŋes erae ŋolo epedorit akidar ekal keŋ ke elope ejok ka ŋolo epedorit akituruwor ŋidwe keŋ ŋulu epupete ŋakiro ka ŋulu eyakatar akerit alopitesyo a daadaŋ.

⁵Anerae ani pa keyeni ituŋanan epite ŋolo kidaret ekal keŋ ke elope, ikokini nai iŋes idari atukot a ŋituŋa a ŋulu ka Akuj ai?

⁶Nyitemokino iŋes erae ituŋanan ŋini ariŋa enupi ŋakiro ŋuna ka Akuj, anerae acepaki iturokin, tosodi toloma natubokino ŋina ka Akuj ŋina etubokinitere Satan.

⁷Itemokino iŋes erae ituŋanan ŋini itojokito ŋituŋa ŋulu nyerae Ŋikristo daŋ, anerae acepaki eruwor ŋolo itoronitae, tosodi toloma nauno ŋina a Satan.

⁸Itemokino ŋikeŋarakinitok ŋulu a Ŋikristo daŋ erae ŋulu emaikina tokeritetei ka nyekicaraka ŋaŋajepa; nyitemokino ikes erae ŋulu emataka ŋagwe ŋuna alalak kori ŋulu erorokaka alosiliŋa.

⁹Itemokino ikes kiricito akimunono ŋina ka anupit a ŋatameta a ŋuna ecayete.

¹⁰Itemokino ikes torotae mono; ani nai keryamun ikes emam ŋuna itoroniyaritere, ejok akimyekin kitiyata erae ŋikeŋarakinitok ŋulu a Ŋikristo.

¹¹Ŋaberu kec daŋ, itemokino erae ŋuna emaikina tokeritetei, nyirworotor ŋulucetuŋa, torae ŋuna etyamaarito ka ŋuna ikinyomitae anakiro a daadaŋ.

¹²Itemokino ŋikeŋarakinitok ŋulu a Ŋikristo toyakatar ŋaberu ŋapeipei ka topedorito akidar ŋikalya kec a ŋilopeyek ejok.

¹³Ŋikeŋarakinitok ŋulu itiyaete etic kec ejok, ikes eryamunete akereru ka epedorete ikes erwor ŋuna ka anupit Yesu Kristo emam akuryanu.

¹⁴Egeno ayoŋ abunore neni kon atipei, nai egiri ayoŋ ŋakiro nu neni kon, ikotere

¹⁵ani keketididi ayoŋ, toyenu iyoŋ epite ŋolo itemokino iyoŋ kiboiyo alokidiŋ ŋituŋa ŋulu ka Akuj, ikes atukot a Ŋikristo ŋina erae ŋina ka Akuj a ŋina eyari. Atukot ŋin iŋes erae akigaŋet ka akiyokiyet ŋakiro ŋuna a kire.

¹⁶Ikilimorit iwon ebe, epol kire jik akimunono ŋina ke edin yok: “Abu iŋes totakanu erae ituŋanan, abu Etau kitoodiu iŋes erae ŋolo iyookino, apotu ŋimalaikan kiŋolikis iŋes. Aponi tolimonokinae ŋakiro keŋ lobukui, apotu ŋituŋa ŋulu alalak anakwap tonupa iŋes, aponi yaarae iŋes kidiama napolou ŋina ka Akuj.”