Read ngakarimojong 2 Tim. 4 Bible Online

2 Tim. 4 - ngakarimojong bible

2 Tim. 4

¹Ekeciki ayoŋ iyoŋ alokiŋaren Akuj ka alokiŋaren Yesu Kristo ŋolo etubokini ŋulu eyarete ka ŋulu etwakito ka aŋuna etakanunia iŋes akipuka erae Erwosit:

²kisera Ŋakiro ŋuna ka Akuj, torubak iserae ikes anapaki a ŋina itemokino, kori nyitemokino, kitepeg ŋuna edyakara, kikilyak ka kimaima apaki ŋina itatamya alotooma atitinyikinit daadaŋ.

³Anerae ebuni apaki ŋina nyepupokiniata ŋituŋa ŋakiro ŋuna erae ŋuna a kire, nai iwuapete ekibure kec a ŋilopeyek ka ecununete aŋuna kec ŋiketatamak ŋulu alalak ŋulu elimokinete ikes ŋuna ecamito ŋaki kec akiirar.

⁴Eŋerete ikes apupokin ŋakiro ŋuna a kire, ido elosikinete akipup ŋiemuto ŋulucaryo.

⁵Nai aneni kon, itemokino torae ŋolo ipakit anakiro a daadaŋ, kidaŋidaŋi ŋican, kitiya etic ŋolo ke ekalimonokinan a Ŋakiro a ŋuna Ajokak ka kitiya etic kon daadaŋ irae eketiyan ŋolo ka Akuj.

⁶Aneni kaŋ, adol apaki ŋina ekepotorere ikwa amuronot, apaki ŋina aesikinia ayoŋ akiyar na.

⁷Adau ayoŋ ajore ejiye ŋolo ajokan ŋolo ka anupit, aŋetak ayoŋ akerit ŋina ka anupit ka eric ayoŋ anupit kaŋ Kristo.

⁸Ekedaritere ayoŋ ebokot ŋolo ka akiyookino ŋolo erae ainakinet ŋina ka akiloun, ŋolo akainakini ayoŋ Ekapolon ŋolo erae ekatubon ŋolo iyookino Akoloŋit ŋina ka atubokino--meere neni kaŋ bon, nai neni a daadaŋ a ŋulu iitanito atakanun keŋ.

⁹Kiwonyu atipei.

¹⁰Aminaki Demas ŋakiro ka akwap a na, ido akaesiki ayoŋ, alot Tesalonika, alot Keresike nakwap a Galatia, alot Tito nakwap a Dalamatia.

¹¹Luka bon iŋes ikirukit ka ayoŋ. Toryamu Mariko, ido torukut ka iyoŋ, anerae epedori iŋes akiŋarakin ayoŋ alotic.

¹²Eyakiya ayoŋ Tuciko lotaun Epeso.

¹³Ani ibuni, yau ekoti ŋolo abu ayoŋ oesik alo Toroas aneni a Karipo; yau ŋikitaaboi daŋ, akilo nooi ŋulu itiyaunitae a ŋilowi a ŋakinei.

¹⁴Abu Alekisanda ŋolo etyekan ŋasuwa kitiya ŋaronisya ŋuna alalak neni kaŋ. Etacakini Ekapolon iŋes ŋuna eriyan ka ŋuna abu iŋes kitiya.

¹⁵Tocoite mono iyoŋ iŋes, anerae itepegit iŋes ka agogoŋu ŋakiro yok.

¹⁶Emam ituŋanan abu okoik ayoŋ apaki ŋina ke ekiŋaren ŋina erworor ayoŋ aŋuna kaŋ aloikiiko; apotu daadaŋ okoesikis ayoŋ. Elipit Akuj nyimarak ŋun erae asecit aneni kec!

¹⁷Nai abu Ekapolon okowoik ayoŋ, okoinak agogoŋu, ido abu opedo alimonokin Ŋakiro ŋuna Ajokak daadaŋ, ikotere ŋituŋa daadaŋ ŋulu nyerae Ŋiyudayan iirarete ka aponi okoiun anatubokino atwanare.

¹⁸Akalakuni ayoŋ Ekapolon anaronis a daadaŋ ka akaiuni iŋes ayoŋ okoya Napukan keŋ ŋina anakuj. Toyai apolou ŋina nyedaun neni keŋ ŋikaru ka ŋikaru! Amen.

¹⁹Kimalakinae Prisila, Akwila ka ŋituŋa ŋulu ke ekal a Onesiporo.

²⁰Abu Erasto kidoŋ akiboi alo Korinto, abu ayoŋ oesik Tropimo alo Mileto, anerae adyaka iŋes.

²¹Kiwonyu atipei eriŋa nyedolo ŋirwa ŋulu ka alilimu. Ikimalaete iyoŋ Ebulo ka Pudens ka Lino ta Kilaudia, ikimalaete tari ŋikaitotoi daadaŋ alotooma Kristo.

²²Toyai Ekapolon lotau kon! Toyai neni kus daadaŋ ajokis ŋina ka Akuj.