Read ngakarimojong Tito 3 Bible Online

Tito 3 - ngakarimojong bible

Tito 3

¹Tolimok ŋituŋa kon atemar itemokino ikes ekerito ŋikepukak ka ŋikapolok, toruworos ŋulu epupete ŋakiro, ŋulu imuit akitiya ŋuna ajokak alopitesyo a daadaŋ.

²Tolimok ikes nyirworotor idiotuŋanan, nai torae ŋulu ke ekisil ka ŋulu edaŋaŋ make, ŋulu itoodiunito arimao neni a ŋituŋa a daadaŋ.

³Anerae ikibaŋaaka paaran sek iwon daŋ ŋilopeyek, pa ikipupi ŋakiro ka ikimodikinitae. Ikirae ŋipi ŋulu ke ekibure ka ŋulu a ŋakiro a daadaŋ a ŋuna etalakarito ŋikasecak. Ikipotu iwon eboiyoto alopite a ŋolo aronon ka ŋolo ka arakao; ikitidiŋito iwon ŋuluce ka ikitidiŋit iwon daŋ ikes.

⁴Nai ŋina etoodiunere lotuŋa arimao ka amina ŋina ka Akuj Akaiunan yok,

⁵abu iŋes ikiu iwon. Pa arae aŋuna a ŋiticisyo a ŋidi a ŋulu ajokak a ŋulu ikitiyat iwon, nai arae aŋuna ka akisyon keŋ ka alope abunio iŋes ikiunia iwon. Abu iŋes ikiu iwon, ikitesegu iwon anakidouno a ŋina a ŋaarei ka ikituruwo iwon ŋulu kitet aneni ke Etau a ŋolo Asegan.

⁶Abu Akuj ikilelebik nooi iwon Etau ŋolo Asegan alotooma Yesu Kristo Ekaiunan yok,

⁷ikotere nai aŋuna ka ajokis keŋ ikituruworyo iwon ŋulu ikiyookino alokiŋaren Akuj ka oryamutu akiyar ŋina nyedaun, ŋina ikigeno iwon.

⁸Erae ŋun ŋakiro ŋuna a kire. Acamit iyoŋ kitatam ŋakiro ŋun ka agogoŋu, ikotere nai ŋulu enupito Akuj eruwor ŋulu emitakinito akitiya ŋiticisyo ŋulu ajokak. Ejokak ŋakiro ŋun daadaŋ, ido iŋarakinete ŋituŋa daadaŋ.

⁹Nai toŋerite ŋipegeta ŋulu ka abaŋao, akirworo ŋakiro ŋuna a ŋirorwa a ŋulu alalak a ŋulu atapapaa yok, ŋiburasinei ka ŋijiyesyo ŋulu ejiyo aŋuna a Ŋikisila. Erae ikes ŋicaryo, ido nyiŋarakinete ŋituŋa.

¹⁰Ani keyau ituŋanan idio atyakatyaka aŋuna a ŋakiro a ŋun, tolimok iŋes apeilimokinet kori ŋalimokinet ŋaarei bon, ido ekaku todaun iyoŋ ka iŋes ŋace jik.

¹¹Iyeni iyoŋ atemar ituŋanan ŋini ikoni ŋin, erae ŋini emunaara ka itoodiunito ŋasecisya keŋ atemar etubokina iŋes bon.

¹²Ani eyakuuni ayoŋ Aretemas kori Tuciko neni kon, bua atipei aryamun ayoŋ alo Nikopoli, anerae adau ayoŋ atyakun akiboi a nen ŋirwa ŋulu ka alilimu.

¹³Kikatak nooi alopite a daadaŋ akiŋarakin Senas ŋolo erae eketataman a ŋikisila, kaapei ka Apolo analosit kec ka itemokino toanyu atemar eyakatar ikes ibore daadaŋ ŋini iitanito.

¹⁴Itemokino ŋituŋa ŋulu a ŋatukon yok toyenut akitiya ŋiticisyo ŋulu ajokak, ikotere eryamunete ŋiboro ŋulu iŋarakiniata ŋituŋa ŋulu eyakatar akiitanit; ido nyiboiyete erae ŋicaryo.

¹⁵Ikimalaete iyoŋ ŋituŋa daadaŋ ŋulu ikirukit ka ayoŋ. Kimala ŋulu ikiminasi isua ananupit, a ŋina ikimori isua ka ikes. Toyai neni kus daadaŋ ajokis ŋina ka Akuj.