Read ngakarimojong Ŋibur. 1 Bible Online

Ŋibur. 1 - ngakarimojong bible

Ŋibur. 1

¹Koloŋ sek, abu Akuj kirwor neni atapapaa yok alotooma ŋikadwarak ŋarwa ŋakalalak, alopitesyo a ŋulu agelegelya;

²nai ŋirwa ŋulu esidyok lu erwor iŋes neni yok alotooma Lokoku keŋ. Iŋes abunio Akuj tosubunia akwap, toseu iŋes aryamun ŋiboro daadaŋ ekaku.

³Inwakunit iŋes akica ŋina ka apolou a ŋina ka Akuj, nabo ikwaan iŋes per ka Akuj alope. Isicasit iŋes akwap ka agogoŋu a ŋina ka akirot keŋ. Ani kedau aryamikin ŋituŋa akisyonio ŋina a ŋasecisya kec, abu kiboikin nakuj lowae ŋolo aloteten Akuj.

⁴Aponi kitopolooroe Lokoku ka Akuj akilo ŋimalaikan, ikwapei itoodiunitor tari ekiro keŋ atemar epol iŋes akilo ŋimalaikan.

⁵Anerae abu Akuj nyelimok emalaika tari epei atemar, “Irae iyoŋ Lokoku kaŋ. Aruwor ayoŋ papa kon nakuwar na.” Kori nyelimuno Akuj ŋakiro ŋadi aŋuna ke emalaika ebe, “Aruwor ayoŋ papa keŋ, ka eruwor iŋes Lokoku kaŋ.”

⁶Nabo, ani eapuuni Akuj akiyakuun Lokoku keŋ ŋolo kiyae nakwap, abu tolimu tema, “Itemokino ŋimalaikan ŋulu ka Akuj daadaŋ toryediko kipuro iŋes.”

⁷Nabo kirwor Akuj ŋuna ikamunito ŋimalaikan tema, “Isikokini Akuj ŋimalaikan keŋ ŋikuwuamin; isikokini ŋiketiyak keŋ arira ŋina ka akim.”

⁸Nai neni a Lokoku keŋ, tolimu Akuj tema, “Irae iyoŋ Akuj ka eropari Apukan kon jik! Ipukat iyoŋ ŋituŋa kon anakiyookino.

⁹Ibu iyoŋ tominak ŋuna iyookino ka ibu toŋer ŋuna aronok. Aŋuna a ŋakiro a ŋun, akaseu ayoŋ ŋina arae Akuj kon iyoŋ alelyan aŋuna akainakinia iyoŋ apolou ŋina iloit ŋina a ŋirukitos kon.”

¹⁰Igiritae nabo a Nakigireta aŋuna keŋ ebe, “Ekapolon, iyoŋ koloŋ isubuni akwap anakisyakinet ka iyoŋ pei ibu tosub nakuj.

¹¹Esalunete ikes nai iropari iyoŋ; enyamunosi daadaŋ ikwa ŋilowi.

¹²Ipupunyikini iyoŋ ikes ikwa ekoti ŋolo enyamuna. Ilokonyikini ikes ikwa ŋilowi, nai iropari iyoŋ ikoni nenipei jik; nabo nyedaun akiyar kon.”

¹³Nai nyelimokina Akuj tari epei a ŋimalaikan atemar, “Kiboikin lowae ŋolo aloteten kaŋ akitodol ŋina ewuakinia ayoŋ ŋimoi kon kwap ŋakejen kon, toreu iyoŋ ikes.”

¹⁴Erae nai ŋimalaikan nyo? Erae ŋitai ŋulu itiyaete etic ŋolo ka Akuj, ŋulu iyakuunitae akiŋarakin ŋulu eiunio.