Read ngakarimojong Ŋibur. 11 Bible Online

Ŋibur. 11 - ngakarimojong bible

Ŋibur. 11

¹Anupit iŋes ayenut kire atemar erae ŋakiro ŋuna ikigeno iwon ŋuna a kire, anupit iŋes amamukau ka aŋayaŋayat aloboro a ŋulu nyikite iwon.

²Anerae anupit kec iŋes abunio Akuj tocamunia ŋituŋa ŋulu a koloŋ.

³Anupit iŋes ikiyenia iwon atemar kesubi Akuj akwap kan akirot keŋ, aŋun ibore ŋini ikite iwon, kitiyaunio aloboro a ŋulu nyetakanete.

⁴Anupit iŋes etelemuni Abel amuronot ŋina ajokan akilo ŋina a Kain. Anupit iŋes abunio Akuj tocamunia iŋes erae ŋolo iyookino, anerae Akuj alope abu kiteyenu ŋun anacamun ŋainakineta ŋuna ka Abel. Aŋuna ka anupit keŋ, eriŋa ŋakiro ŋuna abu iŋes kitiya irworosi neni yok, tari ketwanit iŋes.

⁵Anupit iŋes pa abunio Enok totwania. Akilo, aponi yaarae iŋes kidiama ka emam ituŋanan abu toryamu iŋes, anerae abu Akuj ya iŋes nakuj. Igiritae Nakigireta atemar ani eriŋa Enok nyeara kidiama, aris iŋes kitalaka Akuj.

⁶Emam ituŋanan italakari Akuj mati eyakar anupit; anerae ŋini ebuni neni ka Akuj, itemokino tonupite atemar eyai Akuj, nabo einanakini Akuj eropit neni a ŋulu enupito iŋes.

⁷Anupit iŋes eirarya Noa ŋakiro ŋuna ecikya Akuj iŋes aŋuna a ŋakiro a ŋuna eriŋa nyetakanuna. Abu iŋes kiira ŋakiro ŋuna ka Akuj, toduk ataker ŋina abunio iŋes ka ekeekal toiunotor. Aŋakiro a ŋun, aponi totubokinae akwap daadaŋ, nai abu Noa toryamu aneni ka Akuj akiyookino, anerae anupit iŋes.

⁸Anupit iŋes ewuapakinia Aburaam ŋakiro ŋuna ka Akuj apaki ŋina anyaraa Akuj iŋes alosit nakwap ŋina eikinit Akuj ainakin iŋes. Toesik iŋes akwap keŋ, pa eyeni neni alosi.

⁹Anupit iŋes abunio Aburaam kiboi anakwap a ŋina eikinit Akuj iŋes erae ituŋanan ŋini gela. Abu iŋes kiboi aloeemae ikwa Isaka ka Yakobo ŋulu apotu toryamut akiikinet ŋinapei aneni ka Akuj.

¹⁰Anerae edarit Aburaam anakigeno etaun ŋolo etemunit ka adukunit Akuj, etaun ŋolo erubakini eyai jik.

¹¹Anupit iŋes aruworor Aburaam papa tari ŋina abunio iŋes tomojoŋia nooi daŋ ka Sara daŋ pa auri. Ayeni Aburaam atemar Akuj ŋina adau akiikin, erae ŋina ikinyoma.

¹²Tari daŋ apaki ŋina atakania iŋes esibit aris kesalu, abu touru ŋidwe ŋulu alalak ikwa ŋikacer alokidiama ka etya asinyon ŋina ka anam, ŋina nyimarun.

¹³Apotu ŋituŋa ŋul daadaŋ totwaka enupito. Apotu ikes nyeryamut ŋiboro ŋulu sek eikinit Akuj ikes, nai apotu toanyuwasi ŋiboro ŋul aneni elwana, tolakaros. Apotu tolimosi atemar erae ikes ŋituŋa ŋulu gelae ka ŋikawuotok anakwap a na.

¹⁴Ŋituŋa ŋulu irworosi ŋakiro ŋuna ikote ŋun, isileereunito atemar ecamito ikes akwap ŋina erae ŋina kec a ŋilopeyek.

¹⁵Apotu ikes nyerubakis etamunito akwap ŋina apotu toesikis; kerae torubakinito, keryamunito apaki ŋina boŋoret.

¹⁶Nai arae akibois ŋina ajokan akilo eitanito ikes, akibois ŋina eyai nakuj. Aŋun, nyirumito Akuj ŋileec enyarito ikes iŋes Akuj kec, anerae etemok etaun aŋuna kec.

¹⁷Anupit iŋes alemunia Aburaam lokoku keŋ Isaka toruwor amuronot apaki ŋina ekatakinitor Akuj iŋes. Atenit Aburaam ainakin lokoku keŋ ŋolo donupei aruwor amuronot, tari ŋina aris

¹⁸Akuj kiikinia iŋes tema, “Erae neni a Isaka iŋes iryamunia iyoŋ ŋiletok ŋulu ekeik ayoŋ iyoŋ.”

¹⁹Atami Aburaam atemar epedori Akuj akiteyarun Isaka--ka ikwaan ŋakiro nu ka atemar, abu Aburaam kijau Isaka tari sek ketwanit.

²⁰Anupit iŋes eikinia Isaka Yakobo ka Esau ŋarereŋisyo ŋuna eponito alokiŋaren.

²¹Anupit iŋes eterereŋio Yakobo ŋidwe a Yosepu ŋulusapa eriŋa iŋes nyetwana. Abu iŋes togwaŋakin lobela keŋ, ido kilip Akuj.

²²Anupit iŋes alimunio Yosepu apaki ŋina aapikinia atwanare atemar erotokinete rwanu Ŋisirael alo Ijipit ka tolimok Ŋisirael ŋuna etemokino ikes kitiyata aŋuna ka akuwan keŋ.

²³Anupit iŋes ewuayata ŋikauruunak a Moses iŋes ŋilapyo ŋiuni apaki ŋina edounere. Anerae apotu ikes kiŋolikis iŋes erae ŋini ebusan, ido apotu nyekera awoun ŋuna alimunit erwosit ŋolo a Ijipit.

²⁴Anupit iŋes aŋeryo Moses anyarao lokoku a nakoku ke erwosit a ŋolo a Ijipit apaki ŋina apolounio iŋes.

²⁵Abu iŋes tocamu atemar oryamu ŋican kaapei ka ŋituŋa ka Akuj akilo aryamun alakara apaki ŋina euruwuana alotooma asecit.

²⁶Abu iŋes totyaku atemar ajamuwaro aŋuna a Kristo, erae abaru ŋina apolon akilo abaru daadaŋ ŋina alo Ijipit, anerae atami iŋes ŋuna ke eropit a ŋolo a rwanu.

²⁷Anupit iŋes arotokinio Moses alo Ijipit pa ekuryana atemar eŋoi erwosit a Ijipit. Torubak iŋes etitinyikinit esibit etakani aneni keŋ Akuj ŋina nyetakani.

²⁸Anupit iŋes ageunia Moses ŋasuban ŋuna a Paska ka tolimu atemar towuatae ŋikekya ŋulu a ŋakais a ŋaokot, ikotere emalaika ŋolo ka Atwanare nyear ŋidwe a Ŋisirael ŋulu kiyae ŋulusapa.

²⁹Anupit iŋes koloŋ etoryoto ŋituŋa ŋulu a Isirael Nanam ŋina Areŋan eonit ikwa akwap neni aonon, nai ani ikatakinete ŋituŋa ŋulu a Ijipit daŋ akidok, kitamata ŋakipi ikes.

³⁰Anupit iŋes aukoror arwatata ŋina a Yeriko, kedaut Ŋisirael akirim ŋirwa ŋikanikaarei.

³¹Anupit iŋes ejaunia amalaat ŋina anyaritae Raab ŋirototin ŋulu a Ŋisirael; aŋun aponi nyeari iŋes ikwa ŋituŋa ŋuluce ŋulu aŋerito Akuj.

³²Kapedo ayoŋ alimun ŋuna a ŋikalalak, nai emam ayoŋ apaki ŋina limunet ŋuna a Gideon, ŋuna a Barak, ŋuna a Samsom, ŋuna a Yepesa, ŋuna a Daudi ka ŋuna a Samuel ta ŋuna a ŋikadwarak.

³³Anupit iŋes etijiyoto ikes ŋakwapin ŋuna gelae kilout. Apotu ikes towua aŋuna ka akiyookino, ido toryamut ŋuna eikinit Akuj. Apotu ikes kitubutasi ŋiŋatunyo ŋakituka.

³⁴Kituduŋeto ikes ŋakimya ŋuna ariraete nooi, tobucunos anatumyo. Apalag ikes, nai apotu togogoŋioto; ajioko ikes nooi akilo, tobwaŋa ŋajorei a ŋakwapin a ŋunace.

³⁵Anupit iŋes aponiata ŋaberu toryamuniata nabo ŋiyeneta kec ŋulu sek atwakito, anerae aponi kiteyarunae. Apotu ŋice towuout alacakino, ido kisicanae totwaka, anerae acamito ikes akiteyaruno nakiyar ŋina ajokan adepar.

³⁶Aponi ŋice tojamuwarae ka kibuŋae, torocae a ŋiriko, yaarae mabus.

³⁷Aponi tocakae a ŋamoru, totubutuboe, toarae a ŋatumio. Apotu ikes kirimo akwap enapito ŋilowi ŋulu a ŋakinei--arae ikes ŋikaŋican, ŋulu aponi kisicanae ka tobolyanakinae.

³⁸Ajokak ŋituŋa ŋul nooi, pa etemokino eyakasi nakwap. Apotu ikes kirimo analoŋisae ka alokamukumukui esibito ŋikadoiunok a iwace, eboiyete anaturukanin ka anaduyon.

³⁹Abu Akuj tocamu ŋituŋa ŋul daadaŋ aŋuna ka anupit kec, nai nyeryamuna ikes ŋuna sek eikinit Akuj,

⁴⁰aŋuna abunio Akuj totubunio ibore ŋini ajokan nooi aŋuna yok, pa acamit iŋes akituruwor ikes ŋulu iyookino kire emamukae iwon.