Read ngakarimojong Ŋibur. 2 Bible Online

Ŋibur. 2 - ngakarimojong bible

Ŋibur. 2

¹Aŋuna a ŋakiro a ŋun, itemokino ericakisi ejok ŋuna ikidau akiirar, ikotere nyikioliyo.

²Anerae tari ŋakiro ŋuna koloŋ alimonokinete ŋimalaikan atapapaa yok, arae ŋuna a kire, ido ituŋanan daadaŋ ŋini abili ka towou akiricakin ŋakiro ŋun, abu toryamu akisicanio ŋina ewarit iŋes ilope.

³Ikikokini nai iwon ikibucari anakisicanio ai, erae kikijamak aiuno ŋina epol ŋina etya na? Ekapolon koloŋ esyauni erwor ŋakiro ŋuna ka aiuno a ŋin ka apotu ŋulu eirarito ikitunupa atemar erae ŋakiro ŋun ŋuna a kire.

⁴Nabo abu Akuj daŋ kitoodiu atemar erae ŋun kire alotooma akitiya ŋakitoodikineta ka ŋakujuwuanisya ŋuna egelegelya ka ŋiticisyo ŋulu ka apedor keŋ ka nabo alotooma akoranakin ŋainanakineta ŋuna ke Etau a ŋolo Asegan alopite a ŋolo ecamitor iŋes.

⁵Pa abu Akuj kituruwo ŋimalaikan ŋikepukak ka akwap a ŋina kitete a ŋina ebuni mwanan--akwap ŋina ikilimit iwon.

⁶Nai igiritae iwace a Nakigireta ikona, “Okoe Akuj! Nyo mono ituŋanan itamunitor iyoŋ ŋakiro keŋ? Nyo lokoku a ituŋanan ŋolo imitakinit iyoŋ?

⁷Ibu iyoŋ kitiditeu iŋes apaki ŋina diouriyen akilo ŋimalaikan, ibu nai inak iŋes apolou ka akerit;

⁸tosodi kituruwo iŋes ekepukan a ŋiboro a daadaŋ.” Tari kelimunitoe atemar abu Akuj kituruwo ituŋanan “Ekepukan a ŋiboro a daadaŋ,” iŋes atemar emam ibore ŋini nyipukat iŋes, nai nyetakani bo tokona atemar ipukat ituŋanan ŋiboro daadaŋ.

⁹Nai erae Yesu ŋolo aponi kitiditeunae apaki ŋina diouriyen akilo ŋimalaikan, etakani tokona einakinitae apolou ka akerit, anerae abu iŋes tocamu atwanare; aŋuna ka ajokis a ŋina ka Akuj etemokino iŋes totwan aŋuna a ŋituŋa a daadaŋ.

¹⁰Etemokino kire Akuj ŋina erae neni keŋ eponitotor ŋiboro daadaŋ ka erae ŋiboro daadaŋ aŋuna keŋ kituruwo Yesu ŋolo iyookino kire alotooma ŋican, ikotere eyauni ŋidwe ŋulu ka Akuj ŋulu alalak napolou keŋ. Anerae Yesu itenari ikes naiuno.

¹¹Iŋes ŋolo itesegi ŋitai kaapei ka ŋulu itesegunio, erae papa kec epei. Erae ŋakiro ŋun nyitimitor Yesu anyarare ikes ŋikaitotoi keŋ.

¹²Alimoki Yesu Akuj atemar, “Alimokini ayoŋ ŋikaitotoi kaŋ ŋuna itiya iyoŋ. Ekepuro ayoŋ iyoŋ anatukot a ŋikelipak.”

¹³Nabo ebala, “Ekinyomi ayoŋ iŋes ka daŋ, ayoŋ lo kaapei ka ŋidwe ŋulu akainaki Akuj ayoŋ.”

¹⁴Aŋuna eraakatar ŋituŋa ŋulu enyarit iŋes ŋidwe, ŋulu eya ŋawat ka ŋaokot, abu Yesu tomora ka ikes ekuwane ŋol; ikotere alotooma atwanare keŋ inyasuni Satan ŋolo epolokinit atwanare.

¹⁵Alopite a ŋol abu Yesu tolacaki ŋulu arae ŋipi anakiyar kec a daadaŋ, aŋuna akeritotor ikes atwanare.

¹⁶Ileere kire ebe, meere ŋimalaikan iŋaranakini Yesu, nai erae ŋiletok ŋulu ka Aburaam, ikwapei igiritere.

¹⁷Apolou a ŋakiro a ŋun atemar etemokino iŋes kikwaanikinos ka ŋikaitotoi keŋ alopitesyo a daadaŋ, ikotere toruwor Esacaradoti ŋolo Apolon nooi ŋolo isyoniono, ŋolo ikinyoma alotic ka Akuj, ikotere elemarere ŋasecisya a ŋituŋa.

¹⁸Aŋuna abunio iŋes toryamunia ŋican anakitem a Satan, epedori nai tokona iŋes akiŋaranakin ŋulu itemit Satan.