Read ngakarimojong Ŋibur. 3 Bible Online

Ŋibur. 3 - ngakarimojong bible

Ŋibur. 3

¹Ŋikaitotoi ŋulu adau Akuj anyarare, ŋulu iraakasi ŋulu keŋ! Totamatamata ŋuna a Yesu a ŋolo erae ekiyakia ŋolo ka Akuj ka erae Esacaradoti ŋolo Apolon nooi ŋolo ka anupit yok.

²Ekinyomit Yesu Akuj ŋina abu kiyaku iŋes akitiya etic keŋ lopite ŋolo koloŋ ekinyomitor Moses etic ŋolo ke ekal a ŋolo ka Akuj.

³Ipuryo nooi ituŋanan ŋini eduki ekal akilo ekal ŋolo aduki iŋes. Ikwaŋinapei, itemokino kipuroe Yesu akilo Moses.

⁴Eyai kire ŋolokal daadaŋ ekekadukon, nai Akuj iŋes erae akadukon a ŋiboro a daadaŋ.

⁵Arae Moses ekile ŋolo abu Akuj kikinyom ikwapei eketiyan keŋ alokal a ŋolo ka Akuj, ido abu kiteyenu ŋituŋa ŋakiro ŋuna epote ekaku.

⁶Nai ekinyomit Akuj Yesu ikwapei Lokoku keŋ apolokin ekal keŋ. Ikirae iwon ekal ŋolo ka Akuj, erae kikirubak ikititinyikinit ka ikituro aŋuna a ŋakiro a ŋuna ikigeno iwon.

⁷Aŋakiro a ŋun, elimunit Etau ŋolo Asegan atemar, “Ani kiirasi etoil kaŋ nakoloŋit na,

⁸nyitininika ŋatameta kus, lopite ŋolo koloŋ etiyaata atapapaa kus apaki ŋina akaŋeritotor ayoŋ. Nyitiyata ŋuna ikote ŋuna apotu ikes kitiyata analoŋisat apaki ŋina ekekatakinitotor ayoŋ.

⁹Apotu ikes ekekatakis ayoŋ anariet, tari daŋ ŋina aanyunitotor ikes ŋikaaticisyo ŋikaru ŋatomoniomwon.

¹⁰Aŋakiro a ŋun, abu oŋoik ŋituŋa ŋul nooi otema, ‘Eoliyonorete ŋituŋa lu jwi jwi aneni kaŋ, nyeyenuna ikes ŋipitesyo ŋulu emaikina kiwuapa.’

¹¹Abu ayoŋ oŋo nooi, ekoŋ otema, ‘Nyelomarete ikes jik nakwap ŋina eikinit ayoŋ ikes akieŋunia.’ ”

¹²Ŋikaitotoi, tocoito nyeyakar idio alokidiŋ kus etau ŋolo aronon ŋolo nyenupit ŋakiro ka Akuj, ido tooliyo aneni ka Akuj a ŋina eyari.

¹³Nai kiŋaranakinos iyes make ŋapakio daadaŋ eriŋa ikiya napaki ŋina enyaritae, “Nakoloŋit na,” ikotere nyemodik asecit idio kus kitininik ŋatameta.

¹⁴Anerae ikirae iwon daadaŋ ŋipei alotooma Kristo, erae kikirubak ikititinyikinit ananupit lopite ŋolo ikisyakinia.

¹⁵Ebasi Ŋakigireta ebe, “Ani kiirasi etoil ka Akuj nakoloŋit na, nyitininika ŋatameta kus, lopite ŋolo koloŋ etiyaata atapapaa kus apaki ŋina ekatakinitotor Akuj.”

¹⁶Ataŋae koloŋ ŋituŋa ŋulu apotu kiirasi etoil ka Akuj, ido kitoŋoa iŋes? Arae ŋituŋa ŋulu koloŋ arikori Moses alo Ijipit.

¹⁷Arae ataŋae koloŋ aŋoikinit Akuj ŋikaru ŋatomoniomwon? Arae ŋituŋa ŋulu asecito, ŋulu apotu totwaka analoŋisat.

¹⁸Arae ataŋae erworor Akuj apaki ŋina ekoŋio iŋes atemar, “Nyelomarete ikes jik nakwap ŋina eikinit ayoŋ ikes akieŋunia?” Arae ŋituŋa ŋulu aŋerete iŋes.

¹⁹Ikianyu tokona iwon atemar apotu ikes nyelomasi nakwap ŋin, anerae pa anupito ŋakiro ka Akuj.