Read ngakarimojong Ŋibur. 4 Bible Online

Ŋibur. 4 - ngakarimojong bible

Ŋibur. 4

¹Nai tokona, adau Akuj ainakin iwon akiikinet keŋ ŋina abu itolimok iwon atemar ieŋunete. Nai aŋuna tokona eriŋaakar akiikinet ŋina ka Akuj ŋina ka alomar nakwap ŋina ka akieŋun keŋ eyai, itemokino ocoikisi, ikotere nyekuruwo ipei daŋ alokidiŋ yok alomar nakieŋun ŋin.

²Anerae ikiira ŋakiro ŋuna ajokak ŋuna ka akieŋun a ŋin lopite ŋolo eiraryata atapapaa yok analoŋisat. Nai ŋina eiraryata ikes ŋakiro ŋun, emam ibore ŋini ajokan ŋini apotu ikes toryamut, anerae apotu towout akinup ŋakiro ŋun.

³Erae anupit bon ŋakiro ka Akuj, iŋes ikilomarya iwon nakwap ŋina ka akieŋun ikwapei elimunitor Akuj atemar, “Abu ayoŋ oŋo nooi, ekoŋ otema, ‘Nyelomarete ikes jik nakwap ŋina eikinit ayoŋ ikes akieŋunia!’ ” Abu Akuj tolimu ŋun, tari ŋina aris iŋes kedaunia akitiya ekeetic ageun ŋina asubunia akwap.

⁴Anerae igiritae iwace a Nakigireta ŋakiro ŋuna ka akoloŋit a ŋina a ŋakanikaarei ikona, “Abu Akuj kieŋu akoloŋit ŋina a ŋakanikaarei alotic keŋ a daadaŋ.”

⁵Elimunitoe nabo ŋakiro nu a ne daŋ ebe, “Nyelomarete ikes jik nakwap ŋina eikinit ayoŋ ikes akieŋunia.”

⁶Pa apotu ŋulu ageunete akiirar Ŋakiro ŋuna Ajokak toryamut akieŋun ŋin, anerae pa anupito. Nai eyakasi nabo ŋice ŋulu ecamakinitae tolomasi nakieŋun ŋin.

⁷Nabo adau Akuj atyakun akoloŋit ace ŋina enyaritae “Akoloŋit na.” Erae akoloŋit ŋin iŋes abu Akuj kirwor aneni a Daudi a Nakigireta, kelunyar apaki ŋina aoyan ebala, “Ani kiirasi etoil ka Akuj nakoloŋit na, nyitininika ŋatameta kus.”

⁸Kerae kitodolite Yosua Ŋisirael nakwap ŋina ka akieŋunia a ŋina eikinit Akuj ikes, pa nabo kirworit Akuj ekaku ŋakiro ka akoloŋit ka ace.

⁹Aŋun nai, eriŋa akieŋun ace eyai aŋuna a ŋituŋa ka Akuj; akieŋun ŋina ikoni ŋina eeŋunia Akuj akoloŋit ŋina a ŋakanikaarei.

¹⁰Anerae ituŋanan daadaŋ ŋini elomari nakieŋun ŋina adau Akuj akiikin, ieŋuni alotic keŋ lopite ŋolo eeŋunia Akuj alotic keŋ.

¹¹Ekatakisi nai tokona iwon nooi anacamit alomar nakieŋun ŋin, ikotere nyekuruwo idiotuŋanan alomar nakieŋun ŋin ikwa abunio tokuruworya ŋituŋa ŋulu koloŋ, aŋuna pa anupitotor ŋakiro ka Akuj.

¹²Eyari akirot ŋina ka Akuj ka itiyae daŋ ka agogoŋu, iloit akwanis keŋ ŋina ka atum a ŋina ekwaka ŋiwaetin keŋ daadaŋ. Eduŋi todol tari neni iryamiryameta akiyar ka etau kori tari neni eya ŋakilenyet ka asumet, isileereununui ŋatameta ka ŋakiro ŋuna elosikinit etau.

¹³Emam isubuna ipei daŋ ŋini epedoryo akiwua aneni ka Akuj, ileere ibore daadaŋ eyai eŋaara aneni keŋ. Erae neni keŋ elimoryo iwon ŋakiro ŋuna kitiya.

¹⁴Itemokino iwon orubakisi ikititinyikinit ananupit Yesu; anerae Yesu Lokoku ka Akuj, iŋes erae Esacaradoti yok ŋolo Apolon nooi, ŋolo adau alosit nakuj.

¹⁵Erae Esacaradoti ŋolo Apolon nooi ŋolo isyonit kire apalagu yok ŋina a ŋitai. Esacaradoti ŋolopei ŋol abu Satan kitem alopitesyo a daadaŋ a ŋulu ikitemio iŋes iwon, nai abu iŋes nyesec.

¹⁶Otitinyoto nai tokona iwon, oloto neni ka Akuj a ŋina ipukat ka ajokis, ikotere ikiryamuni akisyon ka ajokis, ikiŋarakis iwon apaki ŋina ka akiitanit.