Read ngakarimojong Yak. 1 Bible Online

Yak. 1 - ngakarimojong bible

Yak. 1

¹Ayoŋ Yakobo eketiyan ŋolo ka Akuj ka ŋolo ke Ekapolon Yesu Kristo, emalae ŋatekerin ŋunatomon ka ŋaarei ŋuna a ŋituŋa a ŋulu ka Akuj, a ŋulu ielakina nakwapin daadaŋ.

²Ŋikaitotoi, kimarakisi erae ŋakiro ŋuna ilelyaniata apaki ŋina iryamuniata iyes ŋakikatakineta ŋuna egelegelya;

³anerae iyenete iyes atemar ŋina ilounia anupit kus ŋakikatakineta, ititinyorosi iyes.

⁴Kituruwosi atitinyu kus ŋina itiyae, ikotere toruworos ŋulu iyookino ka ŋulu ilelebikina, tomam ibore ŋini icanasi.

⁵Ani keyai ipei alokidiŋ kus ŋini icana aosou, itemokino iŋes kiŋit Akuj. Einakini Akuj iŋes ikwa einanakinia ŋituŋa daadaŋ anarimao emam akisibura.

⁶Nai itemokino iŋes kiŋit ka anupit, tomam aŋayaŋayat adio daŋ. Anerae ituŋanan ŋini eŋayaŋayat, ikoni ŋikaguragurae ŋulu a ŋakipi ananam, ŋulu ibele ekuwuam neni daadaŋ ekutari.

⁷Nyitemokino ituŋanan ŋini ikoni ŋin etami atemar aryamuni idiobore aneni ke Ekapolon;

⁸erae iŋes ituŋanan ŋini nyepedori atyakun ŋuna kitiyakina, ŋini nyicasit alotooma ŋuna itiyae daadaŋ.

⁹Itemokino Ekristoit ŋolo ekulyakana elakara apaki ŋina itopoloorya Akuj iŋes

¹⁰ka itemokino Ekristoit ŋolo ebarit elakara apaki ŋina itiditeunia Akuj iŋes. Anerae eŋopiyari ekabaran ikwa aturot ŋina ka ariet.

¹¹Elomuni akoloŋ erirae nooi tonom ekitoe; tosodi aturot keŋ toraraun, ido toŋopia akibuses keŋ. Ikwaŋinapei, ekabaran daŋ eŋopiyari alotooma etic keŋ.

¹²Erereŋ ituŋanan ŋini etitinyikini ŋakikatakineta, anerae kedau iŋes akikatakino, eryamuni ikwa ebokot akiyar ŋina iikinit Akuj ŋituŋa ŋulu eminasi iŋes.

¹³Ani kitemi ituŋanan a ŋakitemyeta, nyitemokino elimuni tema, “Akuj iŋes eketemit”; anerae nyepedorete ŋuna aronok akitem Akuj, nabo daŋ nyitemenene Akuj idiotuŋanan.

¹⁴Nai itemyo ŋinituŋanan apaki ŋina icocoiyaryata ka ikamuniata iŋes ŋakiburanakiniata keŋ ŋuna aronok.

¹⁵Esibit ekibure keŋ ŋolo aronon ibore ŋini epoti, ido touru asecit; topolou asecit, touru atwanare.

¹⁶Tocoito nyikimodikin, ŋikaitotoi ŋuluminan!

¹⁷Ebuni alokidiama ainakinet daadaŋ ŋina ajokan akilo, aneni a Papa a ŋolo asuban akica, a ŋolo nyeribonokini ikwa akoloŋ.

¹⁸Aŋuna ka acamit keŋ, abu ikiinak iwon akiyar alotooma akirot keŋ ŋina a kire, ikotere nai ikiruwor iwon ŋulu eŋarenok alosubuna keŋ a daadaŋ.

¹⁹Ŋikaitotoi kaŋ ŋuluminan, toyenutu ŋakiro nu! Itemokino ŋinituŋanan kikirikira apupokin, nai tosae akirworikin ka nyeŋoyenene atipei.

²⁰Anerae nyitiyae ituŋanan ŋini eŋoit ŋuna ka akiyookino aneni ka Akuj.

²¹Aŋun, toesikisi ŋakiro ŋuna aronok ka ŋipitesyo ŋulu aronok daadaŋ. Kijautu ka akiyapara akirot ŋina iwuakinit Akuj lotai kus, ŋina epedori akiteyar ŋitai kus.

²²Kitiyata ŋuna elimunit akirot; meere akipup bon, ido tomodyanakin make.

²³Ituŋanan daadaŋ ŋini iirari akirot, nyitiya iŋes, ikwaan ka ituŋanan ŋini erouni ereet keŋ anaroet neni ikoni.

²⁴Nai ani irikakin, torotok, ido kimuryak etorube keŋ.

²⁵Nyikoni nen ituŋanan ŋini iricit Ŋikisila ŋulu ajokak akilo, ŋulu eyaunete alacakina. Ani pa kerae iŋes ekapupon bon ŋolo imuryakinete, nai ŋolo itiyae ŋun, iterereŋi Akuj iŋes aloticisyo a ŋulu itiyae.

²⁶Ani ketami idiotuŋanan atemar iwuapit iŋes ŋakiro ŋuna ke edin, nai nyetubit akeeŋajep, erae edin keŋ ŋolo a koŋin, nabo emodyanakin iŋes bon.

²⁷Edin ŋolo ajokan ŋolo emam aronis alokiŋaren Akuj Papa iŋes lo: akiŋaranakin ŋikokyok ka ŋapuseru alocan kec ka akiyokiuno iyoŋ elope nyikinyasut ŋakiro ŋuna ka akwap.