Read ngakarimojong Yak. 5 Bible Online

Yak. 5 - ngakarimojong bible

Yak. 5

¹Topupokisi tokona ŋakiro kaŋ, iyes ŋikabarak! Kigworo ka kiwololoto aŋuna a ŋican a ŋulu eponito neni kus!

²Abosiya ebari kus ka erikasi ŋakimom ŋilowi kus.

³Enyasu ekut egolid ka ŋisilipae kus ŋulu amilimilak. Eruwor ekut kec esuuda ŋolo ikisitakinit iyes ka irikari iŋes ŋawat kus ikwa akim. Itukokis iyes ebari kus alorwa a lu a ŋulu esidyok.

⁴Emam nyetaca iyes eropit ŋolo a ŋiketiyak lomanikorin kus. Topupokisi ŋakiro ŋuna iburaata ikes! Adol akigworo a ŋulu elemete ŋimanikorin kus neni ka Akuj, Ekapolon ŋolo etiron.

⁵Iboiyoto iyes anakwap alotooma ajakao ka alakara; ituma iyes, esibit itemonokinosi aŋuna ka akoloŋit a ŋina ikiŋolere.

⁶Itubokis iyes ka iar ŋituŋa ŋulu pa asecito, ŋulu pa apedorete akitepeg iyes.

⁷Ŋikaitotoi, totitinyikisi akitodol ŋina ebunio Ekapolon. Kiŋolikisi epite ŋolo etitinyikinitor eketan idarit emanikor keŋ tora ejok. Idarit iŋes akiru ŋina ka akicereet ka ŋina ka akiporo anatitinyikinit.

⁸Itemokino iyes daŋ totitinyikinito. Torubakisi ienito ŋitai, anerae aapuu Akoloŋit ŋina eboŋunio Ekapolon.

⁹Ŋikaitotoi, tojoŋoto akiŋuruŋura make, ikotere nyikitubok Akuj. Kiirasi! Aapuu Ekatubon, eapi atakanun keŋ.

¹⁰Ŋikaitotoi, totamutu ŋikadwarak ŋulu erworosi alokiro a ŋolo ke Ekapolon; toanyutu atemar erae ikes akitaanyikinet ŋina ka atitinyikinit alotooma ŋican.

¹¹Topupokisi! Ikibala iwon erereŋ ŋulu apotu totitinyikis. Iirasi iyes atitinyikinit ŋina a Yob ka iyenete iyes epite ŋolo abunio Akuj kiterereŋio iŋes ekaku, anerae isyoniono ka etimoono Ekapolon.

¹²Nai ŋuna apolok nooi, ŋikaitotoi, ani iikinete iyes ibore idio, nyikoŋ nakuj kori akwap kori nyilimu akikoŋiet ace. Temasi iyes “Ee,” torae kire ee ka “Mam,” torae kire mam, ikotere nyilomasi natubokino ŋina ka Akuj.

¹³Eyai alokidiŋ kus ŋini eyakar ŋatyokisyo a? Itemokino iŋes kilip Akuj. Eyai ŋini elakara a? Itemokino iŋes toeik, kipur Akuj.

¹⁴Eyai alokidiŋ kus ŋini edyaka a? Itemokino iŋes tonyara ŋikatukok a Ŋikristo, kilipakis ka kiwosakis iŋes akimyet alokiro ke Ekapolon.

¹⁵Akilip ŋin ŋina ka anupit, itaŋaleuni ituŋanan ŋini edyak; itojokuni Ekapolon iŋes ka isyoniyo ŋasecisya ŋuna itiyat iŋes.

¹⁶Aŋun, tolimonokinos ŋasecisya kus make ka kilipanakinos make, ikotere ikitaŋaleunio. Akilip ŋina a ituŋanan a ŋini iyookino, eyai apedor ŋinakitiyaet ŋuna apolok.

¹⁷Arae koloŋ Eliya ituŋanan ikwa iwon. Abu iŋes kilip nooi, ikotere nyilim akiru ka emam akiru abu kilim ŋikaru ŋiuni ka ŋilapyo ŋikanikapei.

¹⁸Abu nabo iŋes kilip, kilim akiru ka tora akwap ŋaraito keŋ.

¹⁹Ŋikaitotoi kaŋ, ani keoliyo ipei kus anakiro a ŋuna a kire, ido kinyaku ŋinice iŋes,

²⁰toyenutu nu: ituŋanan ŋini inyakuni ekasecan alopitesyo keŋ a ŋulu aronok, eiuni iŋes etau ŋolo ke ekasecan a ŋol anatwanare ka erapuwar ŋasecisya ŋuna alalak.