Read ngakarimojong 1 Pet. 4 Bible Online

1 Pet. 4 - ngakarimojong bible

1 Pet. 4

¹Ikwaŋina abunio Kristo toryamunia ŋican alokuwane, itemokino iyes daŋ kitogogoŋos alopite a ŋolo atamya iŋes; ituŋanan ŋini aryamu ŋican alokuwane, amulen iŋes asecit.

²Ameun tokona, nyeriŋa akiyar keŋ anakwap a na iwuapit ekibure ŋolo aronon, nai acamit ŋina ka Akuj.

³Ipotu iyes yaa apaki ŋina aoyan alorwa a ŋulu alunyar itiyaete ŋuna a ŋulu nyenupito Akuj: anasiilyanut, alokibure a ŋolo a ŋawat kus, anamera ka anaronis a ŋina ilipyata ŋakujo ŋuna itiyaunitae.

⁴Tokona eumokinito ŋulu nyenupito Akuj ŋakiro ŋuna nyeriŋa iyes irukitotor ka ikes anakiyar kec a ŋina aronon ka ŋina emam ŋakiro etami atemar epote. Aŋun, irworosi ikes ŋakiro ŋuna aronok aŋuna kus.

⁵Nai isisaunete ikes ŋakiro kec alokiŋaren Akuj ŋina etenit atubokin ŋulu eyarete ka ŋulu atwaka.

⁶Ŋakiro nu iŋes aponere tolimonokinere Ŋakiro ŋuna Ajokak tari neni a ŋulu atwaka, ikotere tari ketubokinitae ikes alokuwane, toyara akiyar ŋina ke etau alotooma Akuj.

⁷Aapuu asalunet ŋina a ŋiboro a daadaŋ. Aŋun, itemokino iyes iyokiuno make ka itenito, topedorito akilip.

⁸Akilo ŋun daadaŋ, tominanaros make nooi, anerae erapuwarit amina ŋasecisya ŋuna alalak.

⁹Kijaununos alorerya kus make emam eŋuriŋur.

¹⁰Einakinit Akuj ŋinituŋanan alokidiŋ kus ŋainakineta ŋuna egelegelya; aŋun, ikwapei iraakatar iyes ŋulu iyokito ikes, kisitiyata ŋainakineta kus ejok aŋuna a ŋuluce.

¹¹Ituŋanan ŋini itatami, itemokino kitatam ŋakiro ŋuna ka Akuj; ituŋanan ŋini itiyae etic, itemokino iŋes kitiya ka agogoŋu a ŋina einanakini Akuj iŋes, ikotere ipuroe Akuj aloboro a daadaŋ, alotooma Yesu Kristo, ŋolo eyakar apolou ka apedor ŋina a ŋikaru ka ŋikaru. Amen.

¹²Ŋikaakonei ŋuluminan, nyiumokis aŋuna a ŋakikatanakineta a ŋuna apipilak a ŋuna iryamunito iyes; esibit ibore ŋini nyitemokino iyes toryamut.

¹³Nai itemokino iyes tolakara aŋuna imoryata ŋican ŋulu a Kristo, ikotere nai iruworosi ŋulu ileleba alelyan apaki ŋina isileereunere apolou keŋ.

¹⁴Irereŋ iyes erae kikiyanyi aŋuna iraakatar ŋikewuapak a Kristo; eyai Etau ŋolo ka apolou a ŋina ka Akuj neni kus.

¹⁵Ani keryamu iyes idio ŋican, nyitemokino eryamuni aŋuna eraakar ekaaran, kori ekokolan, kori ekasecan ca daadaŋ, kori ŋolo iŋuconokin nakiro a ŋituŋa a ŋuluce.

¹⁶Ani kiryamut iyes ŋican aŋuna iraakatar Ŋikristo, nyitemokino ikiruma ŋileec, nai kitalakasi Akuj, anerae ikinyaritae iyes a ekiro a Kristo.

¹⁷Adolu apaki ŋina isyakinia atubokino; isyaunio mono atubokin ŋituŋa ŋulu erae ŋulu ka Akuj. Ani kisyaunio aneni yok, ikokini nai eŋetakin aneni a ŋulu eŋerito Ŋakiro ŋuna Ajokak, ŋuna eponito aneni ka Akuj ai?

¹⁸Ikwapei igiritere Nakigireta atemar, “Ani nai ketyono aiun ŋulu ajokak, nyo nai itiyakin neni a ŋikasecak a ŋulu eŋerito Akuj?”

¹⁹Aŋun, ikes ŋulu eryamunito ŋican aŋuna ka acamit a ŋina ka Akuj, itemokino torubakis itiyaete ŋuna ajokak, inakinos neni ke Ekasuban kec, a ŋolo itiyae ŋuna adau akiikin.