Read ngakarimojong 2 Pet. 1 Bible Online

2 Pet. 1 - ngakarimojong bible

2 Pet. 1

¹Ayoŋ, Simoni Petero ŋolo arae eketiyan ka ekiyakia a Yesu Kristo, egirit abaruwa na. Egirakinit neni a ŋulu itopoloorito anupit ŋinapei ikoni ŋina ikiyakar isua alotooma akiyookino ŋina ka Akuj yok ka Ekaiunan Yesu Kristo.

²Tolalaar aneni kus ajokis ka ekisil alotooma ayenut Akuj ka Yesu Ekapolon yok.

³Ikiinak iwon apedor ŋina ka Akuj ŋiboro daadaŋ ŋulu ikiitanit iwon ayarya kire alopite a ŋolo ecamit Akuj alotooma ayenut ŋolo abu ikinyarau iwon akimor apolou ka ajokis keŋ.

⁴Alopite a lo, ikiinak iŋes iwon ŋainakineta ŋuna apolok nooi, ŋuna abu ikiik, ikotere topedoryata iyes abucar alokibure a ŋolo ka akwap a na; a ŋolo eyauni atwanare, ido toruworos ŋikamorak ŋulu ka akujuwuanut keŋ.

⁵Aŋuna a ŋakiro a nupei a nu, kitiyata ka agogoŋu kiyatakis ajokis nanupit kus; najokis kus kiyatakisi ayenut;

⁶nayenut kus kiyatakisi atikit etau, natikit etau kiyatakisi atitinyikinit; natitinyikinit kus kiyatakisi eyare ŋolo ecamit Akuj;

⁷loyare ŋolo ecamit Akuj, kiyatakisi amina ŋina ke ekaitotoonu ka namina kus ŋina ke ekaitotoonu, kiyatakisi amina.

⁸Erae lu ŋipitesyo ŋulu itemokino iyes toyakatar ka ani kelalak ikes aneni kus, irworosi nai ŋulu akukuranak ŋulu etiyak, ido yaut neni kus ayenut ŋina ke Ekapolon yok Yesu Kristo.

⁹Nai ŋini nyeyakar ikes, erae iŋes emuduk alotau keŋ: emuryak iŋes atemar esyoni ŋasecisya keŋ ŋuna ŋorok.

¹⁰Aŋun, ŋikaitotoi kaŋ, kimukekisi nooi kitogogoŋo anyarauno ka aseuno kus. Ani kitiyata ikoŋina, nyibusokinosi jik.

¹¹Alopite a lo, iryamunete iyes apedor ŋinalomaret Napukan ŋina nyedaun, ŋina ke Ekapolon ka Ekaiunan Yesu Kristo.

¹²Aŋun, arubakini ayoŋ eketatamunit iyes jik ŋakiro nu, tari sek kiyenete ka kerubit ayenut kus ŋuna a kire.

¹³Atami ayoŋ atemar itemokino ayoŋ akitatamunit iyes ŋakiro ŋun eriŋa ayari.

¹⁴Ayeni atemar alotooma apaki ŋina euruwuana aesikini akuwan na, ikwapei eketacaikinitor ayoŋ Ekapolon yok Yesu Kristo.

¹⁵Emukekini ayoŋ nooi akiwarakin iyes erot ŋolo nyikimuryakiniata ŋakiro ŋun jik, kadau ayoŋ atwanare.

¹⁶Ŋina ikiteyenunere isua iyes ŋuna ka apedor ka abunore ŋina ke Ekapolon yok Yesu Kristo, pa ikilimonokinio isua iyes ŋiemuto ŋulu tamuna ŋulu nyiyookino. Ikianyuwarit isua apolou keŋ a ŋakonyen kosi a ŋilopeyek.

¹⁷Ayakae isua nen apaki ŋina ainakinia Akuj Papa iŋes apolou ka apedor, ŋina abunio etoil neni keŋ aneni ka Akuj anakica a ŋina ka apolou keŋ, ebala, “Erae lo Lokoku kaŋ ŋolo minat, ŋolo alelyania ayoŋ!”

¹⁸Ikipotu isua ŋilopeyek eirasi etoil lo ebuni anakuj, apaki ŋina ikirukitor isua ka iŋes alokidiama emoru ŋolo ka Akuj.

¹⁹Aŋun, eyatakin nabo akilo ayenut kosi atemar erae ŋakiro ŋuna a ŋikadwarak ŋuna a kire. Ejok nooi erae kiricakis iyes ŋakiro ŋun, anerae ikote ikes etaa ŋolo inwakunit neni iryono tari neni iwalaria akwap, tocaik akica ŋina ke etop a ŋolo ka ataparacu ŋitai kus.

²⁰Nai, mono toyenete atemar, emam ituŋanan ŋini epedori akisileereun aŋuna keŋ bon ŋakiro ŋuna edwaritae.

²¹Anerae emam ŋakiro ŋuna edwaritae ŋuna eponito anacamit a ituŋanan, nai arae Etau ŋolo Asegan esirwori ŋituŋa ŋakiro ŋuna aponito aneni ka Akuj.