Read ngakarimojong 2 Pet. 3 Bible Online

2 Pet. 3 - ngakarimojong bible

2 Pet. 3

¹Ŋikaakonei ŋuluminan, erae abaruwa na ŋina a ŋaarei ŋina ekegirak ayoŋ iyes. Alotooma ŋabaruwae ŋunaarei nu, ekatak ayoŋ akitekyenyun aneni kus ŋatameta ŋuna iyookino alotooma akitatam iyes ŋakiro ŋun.

²Acamit ayoŋ iyes totamut ŋakiro ŋuna koloŋ erworosi ŋikadwarak ŋulu ka Akuj ka akiciket ŋina ke Ekapolon Ekaiunan, ŋuna apotu Ŋikiyakia kus itolimonokis iyes.

³Ŋuna eŋarenok, itemokino iyes toyenete atemar, alorwa a ŋulu esidyok a lu, etakanunete ŋituŋa ŋice ŋulu epolokinit ekibure ŋolo aronon ŋolo a ŋawat kec. Ikikienatar ikes iyes.

⁴Temasi, “Aabala bo iŋes anakiikinet aboŋuni! Ŋinapei koloŋ atwakiata atapapaa yok, ikote ŋiboro daadaŋ nenipei koloŋ ekote anasubunet akwap.”

⁵Eredakis ikes akiŋer ŋuna ka atemar aŋuna ka akirot a ŋina ka Akuj, ayai nakuj koloŋ sek ka aponi tosubunae akwap anakipi ka a ŋakipi.

⁶Arae nabo ŋakipi pei, ŋakipi ŋuna ka akalele aponere kinyasunere akwap ŋinaŋorot.

⁷Nai nakuj ka akwap ŋuna eyakasi tokona iŋadakinitae alotooma akirot ŋinapei ka Akuj. Iŋadakinitae ikes akitodol Akoloŋit ŋina ka atubokino, ikotere inyasunio anakim, kaapei ka ŋituŋa ŋulu eŋerito Akuj.

⁸Nai ŋikaakonei ŋuluminan, nyikimuryak ibore ipei! Alokiŋaren Akuj, emam atyaketait alokidiŋ akoloŋit apei ka ŋikaru aliput; aneni keŋ, ikwaan ikes.

⁹Nyedidi Ekapolon akitiyakin ŋakiro ŋuna adau iŋes akiikin ikwa etamiata ŋice. Ikidaŋit iŋes iyes daadaŋ pa ikirikira, anerae nyecamit iŋes idiotuŋanan inyasunio, nai ecamit iŋes daadaŋ tokiwa ŋasecisya kec.

¹⁰Ebuni nai Akoloŋit ŋina ke Ekapolon ikwa ekokolan. Akoloŋit ŋin, eŋopiyari nakuj irurumae, itupuripuryaryo ka inyasunio ŋiboorei ŋulu anakuj ka enomiyari akwap ka ŋiboro daadaŋ ŋulu eya neni keŋ.

¹¹Ikwapei inyasunere ŋiboro lu daadaŋ alopite a lo, nyo nai itiyakin neni kus? Itemokino akiyar kus torae ŋina ajokan ŋina ecamit Akuj.

¹²Ani eriŋa idarito Akoloŋit ŋina ka Akuj, kitiyata ŋun ka agogoŋu, ikotere edoluni Akoloŋit ŋin atipei. Akoloŋit ŋin, enomiyari akim nakuj ka inyasun ka etalarete ŋiboorei ŋulu anakuj aŋuna ka amwanis.

¹³Nai idaritae iwon ibore ŋini ikiik Akuj iwon, nakuj ŋina kitete ka akwap ŋina kitete, ere ŋolo ka akiyookino.

¹⁴Aŋun ŋikaakonei ŋuluminan, ani idarito Akoloŋit ŋin, kitiyata ka agogoŋu tomam adioronis alokiŋaren Akuj, ikotere ikiryamun isilito ka iŋes.

¹⁵Totamunito atemar erae akidaŋidaŋakinit ŋina ke Ekapolon yok, apaki kus ŋina iunotor, ikwapei igiritor lokaato yok Paulo ŋolo minat ka aosou a ŋina ainakini Akuj iŋes.

¹⁶Ŋakiro ŋun ikes irworo Paulo apaki daadaŋ ŋina igirya a ŋabaruwae keŋ. Eya ŋakiro ŋace nabaruwae keŋ ŋuna etyono ayenun, ŋuna iloceneneete ŋituŋa ŋulu nyeyenete ka ŋulu eŋayaŋayato, ikwaŋina ilocoto ŋakiro ŋunace, ŋuna igiritae nakiro ŋuna ka Akuj. Aŋun, ipyedunito ikes ŋilopeyek akinyasuno kec.

¹⁷Nai ŋikaakonei, idaut iyes ayenun ŋakiro ŋun. Totenito nai, ikotere nyikirikosi ŋadyakanareta ŋuna a ŋituŋa a ŋulu ebilibiliyete Ŋikisila, ido ikitaŋayaŋayata iyes.

¹⁸Nai torubakisi ipoloete anajokis ka anayenut a ŋina ke Ekapolon ka Ekaiunan yok Yesu Kristo. Toyai apolou neni keŋ tokona ka ŋikaru ka ŋikaru! Amen.