Read ngakarimojong Ŋikat. 10 Bible Online

Ŋikat. 10 - ngakarimojong bible

Ŋikat. 10

¹Ekaku ka Abimelek bu Tola lokoku a Pua a ŋolo arae lokoku a Dodo toiu Ŋisirael, arae iŋes ekile ŋolo abunit alokabila a ŋituŋa a Isakar. Eboi iŋes alo Samir anakwap a ŋina a ŋikamukumukui a ŋina a Epuraim.

²Abu Tola kitiya erae ekatubon ŋakiro alo Isirael ŋikaru ŋatomoniarei ka ŋiuni. Ekaku totwan iŋes, tonukae Samir.

³Ekaku a Tola abu Yair ŋolo alo Gilead toruwor ekatubon ŋakiro alo Isirael, kiboi iŋes erae ekatubon ŋakiro ŋikaru ŋatomoniarei ka ŋiarei.

⁴Ayakar Yair ŋidwe ŋulusapa ŋatomoniuni ŋulu adokito ŋisigirya ŋatomoniuni. Ayakatar ikes ŋitaunio ŋatomoniuni ŋulu aya Gilead, tari nakoloŋit na enyaritae ikes ŋitaunio a Yair.

⁵Abu nai Yair totwan, tonukae Kamon.

⁶Apotu nabo Ŋisirael kitiyata ŋuna aronok alokiŋaren Ekapolon, toloto akilipenen neni ata Baal ka Asitares, neni a ŋakujo ka Aram, a ŋakujo a Sidon, a ŋakujo a Moab, a ŋakujo a Ŋiamoni ka a ŋakujo a Ŋipilistin. Aŋun, apotu ikes toŋero Ekapolon ka tojoŋoto akilipenen neni keŋ.

⁷Abu nai Ekapolon toŋoik Ŋisirael nooi, tosodi kipotok ikes napedor a Ŋipilistin ka napedor a Ŋiamoni,

⁸ido apotu Ŋipilistin ka Ŋiamoni kisicana Ŋisirael ekaru ŋol nooi. Apotu ikes kisicana Ŋisirael daadaŋ ŋulu aya nakwap alokekwaye Yorodan nakwap ŋina a Ŋiamoni, iŋes Gilead. Apotu ikes kisicana Ŋisirael ŋikaru ŋitomon ka ŋikanikauni.

⁹Apotu daŋ Ŋiamoni todoka aŋolol Yorodan aŋuna ka akitijiore ŋituŋa a ekabila a Yuda ka ŋulu a ekabila a Benjamin ta ŋituŋa a ekabila a Epuraim. Apotu ŋakiro ŋun inakis Ŋisirael akiyaloloŋ ŋina apolon nooi.

¹⁰Aŋun, apotu Ŋisirael kigworokis Ekapolon temasi, “Ikisec isua alokiŋaren kon aŋuna aŋerere isua Akuj kosi, ido alosi akilip neni ata Baal.”

¹¹Tolimok Ekapolon ikes tema, “Pa mono abu ayoŋ okolaku iyes aneni a Ŋijipitian, aneni a Ŋiamori, aneni a Ŋiamoni ka aneni a Ŋipilistin a?

¹²Apotu ŋisidonianidaŋ ka Ŋiamaleki ta Ŋimoabi ikisicana iyes, ido ipotu iyes ikigworokis ayoŋ, abu ayoŋ okolaku iyes anapedor kec.

¹³Nai ipotu iyes ikiŋero ayoŋ toloto akilipenen neni a ŋakujo a ŋace, aŋun, nyakalakuni nabo ayoŋ iyes jik.

¹⁴Apesi kigworonokisi ŋakujo ŋuna idaut iyes aseun akiwuap. Kimyekisi ikilakut ikes iyes apaki ŋina iyakatar iyes locan.”

¹⁵Tolimokis Ŋisirael Ekapolon temasi, “Ikisec isua, kitiya neni kosi ŋuna nyejokak aneni kon, nai tolakunae isua nakoloŋit na!”

¹⁶Aŋun, apotu Ŋisirael kimasanasi aneni aya ikes ŋitorubei a ŋakujo a ŋunagelae, kilipa neni ke Ekapolon, ido abu Ekapolon tojoŋo akidaŋidaŋ akitere Ŋisirael eryamunito ŋican.

¹⁷Tocunakinos nai Ŋiamoni aŋuna ke ejie, kiboiyosi Gilead, tocunakinos Ŋisirael daŋ kiboiyosi Misipa.

¹⁸Tolimokis ŋikarikok a ŋajorei a ŋituŋa a Gilead, ŋituŋa temasi, “Ŋae egeuni ejie ka Ŋiamoni? Ituŋanan ŋini egeuni ejie ka Ŋiamoni iŋes erwor ekapolon a ŋituŋa a daadaŋ a ŋulu iboiyete alo Gilead.”