Read ngakarimojong Ŋikat. 11 Bible Online

Ŋikat. 11 - ngakarimojong bible

Ŋikat. 11

¹Ayai Gilead ekile ŋolo anyaritae Yepesa ŋolo arae lokoku a amalaat, ido arae iŋes ekajion ŋolo etiron. Arae Gilead papa a Yepesa.

²Abu aberu a Gilead daŋ touru ŋidwe ŋulusapa, ido apaki ŋina apolounioto ŋidwe a aberu a ŋin, apotu kiritasi Yepesa anakwap kec temasi, “Emam ibore eruwor ŋini kon alokal a papa kosi, anerae irae iyoŋ lokoku a aberu a ace.”

³Abu nai Yepesa toem aneni a ŋikaitotoi keŋ, tolot akiboi nakwap ŋina anyaritae Tob. Tocunaros ŋikesyaak neni a Yepesa, ido aloseneneete aremerem ŋituŋa ŋuluce kaapei ka iŋes.

⁴Kelunyar adiopaki, kitijikis Ŋiamoni Ŋisirael.

⁵Apaki ŋina etijikinioto Ŋiamoni Ŋisirael, apotu ŋikasikou a Gilead toloto ayaun Yepesa anakwap a Tob.

⁶Tolimokis ŋikasikou ŋul Yepesa temasi, “Bua toruwor ekarikon kosi, ikotere ikilosi akitijiore Ŋiamoni.”

⁷Nai tolimok Yepesa ŋikasikou ŋulu alo Gilead tema, “Meere iyes pei ipotu ikiŋero ayoŋ, ikiritasi ayoŋ anakwap a papa kaŋ a? Aŋun, Kaanukiro tokona iponitotor iyes neni kaŋ apaki ŋina iyakatar locan?”

⁸Toboŋokis ŋikasikou a Gilead Yepesa temasi, “Kikote neni daŋ, ikiboŋu tokona isua neni kon ikotere ikilosi iyoŋ ka isua akitijiore Ŋiamoni; iruwor iyoŋ ekapolon kosi ka ekapolon a ŋituŋa a daadaŋ a ŋulu iboiyete alo Gilead.”

⁹Tema Yepesa neni a ŋikasikou a ŋulu alo Gilead, “Ani kikinyakasi iyes ayoŋ lore nabo akitijiore Ŋiamoni, ido okoinak ayoŋ Ekapolon elou ikes, aruwor ayoŋ ekarikon kus.”

¹⁰Toboŋokis nai ŋikasikou ŋulu alo Gilead Yepesa temasi, “Eruwor Ekapolon esuuda yok kire jik, ikitiyae isua ikwapei ilimunio iyoŋ.”

¹¹Abu nai Yepesa torukosi ka ŋikasikou ŋulu alo Gilead, kituruwosi ŋituŋa a Gilead Yepesa ekepukan ka ekarikon kec; ido abu Yepesa kiruwor ŋakiro keŋ daadaŋ alokiŋaren Ekapolon alo Misipa.

¹²Kiyakiya nai Yepesa ŋituŋa neni a erwosit a Ŋiamoni ebala, “Anukiro eya kidiŋ iyoŋ ka ayoŋ, ŋuna ibunitor iyoŋ neni kaŋ akitijiore ŋituŋa a akwap kaŋ?”

¹³Toboŋok erwosit a Ŋiamoni ŋituŋa ŋulu eyakiyarit Yepesa neni keŋ tema, “Erae ŋun anerae apaki ŋina aponiata Ŋisirael alo Ijipit, apotu ikes yaasi akwap kaŋ, ameun alo Arinon tari Yabok ta Yorodan, aŋun tokona, kinyakakinae ayoŋ akwap ŋin emam ejie.”

¹⁴Kiyakiya nabo Yepesa ŋikilyok neni a erwosit a Ŋiamoni,

¹⁵alimokin iŋes ebe, “Ŋakiro a Yepesa ikes nu: Nyelemara Ŋisirael akwap a Moab, kori ŋina a Ŋiamoni,

¹⁶nai apaki ŋina aponiata Ŋisirael alo Ijipit, apotu ikes kitoro naloŋisat toloto nanam ŋina Areŋan, todolo Kades.

¹⁷Apotu nai Ŋisirael kiyakiyasi ŋituŋa neni a erwosit a ŋolo ke Edom temasi, ‘Ikilipit isua iyoŋ ikimyek isua totuboretei anakwap kon,’ nai abu erwosit ŋolo ke Edom nyecamu ŋakiro ŋun. Apotu daŋ ikes kiyakiyasi ŋituŋa neni a erwosit a Moab, abu ŋol daŋ nyecamu ŋakiro kec. Aŋun apotu Ŋisirael torubakis iboiyete alo Kades.

¹⁸Apotu nai Ŋisirael towotokis a nen kitoro naloŋisat, kiloda ayaaye akwap a Edom ka akwap a Moab todolo Kide akwap a Moab, ido toloma ekekwaye ayonae Arinon. Nyelomara ikes nakwap a Moab, arae Arinon ekukoru a akwap a Moab.

¹⁹Apotu nai Ŋisirael kiyakiyasi ŋituŋa neni a erwosit Sikon a ŋolo a Ŋiamori ka neni a erwosit Esibon, tolimokis Ŋisirael ŋirwosi ŋul temasi, ‘Ikilipit isua iyes ikimyekis isua totuboretei anakwapin kus oloto nakwap kosi.’

²⁰Nai pa ekinyomit Sikon Ŋisirael atubor anakwap keŋ; aŋun, abu Sikon tocunak ŋituŋa keŋ daadaŋ, kiboyosi Yaas, ido kitijioto Ŋisirael.

²¹Abu nai Ekapolon Akuj a Ŋisirael kipotok Sikon kaapei ka ŋituŋa keŋ daadaŋ napedor a Ŋisirael, ido apotu kilout ikes kituruwosi akwap a Ŋiamori a ŋulu eboiyete anakwap a ŋin ŋina kec.

²²Toloma ikes nakwap a Ŋiamori daadaŋ ameun alo Arinon tari Yabok ka ameun analoŋisat tari Yorodan.

²³Aŋun, adau Ekapolon Akuj a Ŋisirael akikamar akwap a Ŋiamori aŋuna a Ŋisirael. Icamit tokona iyoŋ ademar ikes akwap kec a?

²⁴Nyemaikina mono iyes kituruwosi akwap ŋina ikiinakini iyes akuj kus Kemos ŋina kus a? Tosodi, nyemaikina mono isua eturuwosi akwap daadaŋ ŋina abu Ekapolon Akuj kosi kikama aŋuna kosi ŋina kosi a?

²⁵Ijok mono iyoŋ akilo erwosit Balak lokoku a Sipor a ŋolo a Moab a? Abu mono iŋes todiŋakinos ka Ŋisirael, kori abu mono iŋes kitiji Ŋisirael a?

²⁶Apaki ŋina eboiyoto Ŋisirael ŋikaru ŋamiae ŋauni alo Esibon ka alorerya keŋ ka Aroer ka alorerya keŋ ta alotaunio a daadaŋ a ŋulu erekina lokipetetyo ka Arinon, kaanukiro pa ikamarya iyoŋ nabo ŋakwapin ŋun, alotooma apaki ŋin?

²⁷Meere ayoŋ asecit aneni kon, nai iyoŋ itiyat erono neni kaŋ aŋuna ikitijio ayoŋ. Kimyek Ekapolon ŋolo erae ekatubon ŋakiro, totub ŋakiro nakoloŋit na tolimu kerae Ŋisirael nyiyookinito, kori Ŋiamoni.”

²⁸Nai abu erwosit a Ŋiamoni nyecamu ŋakiro ŋuna eyakiyaritotor Yepesa ŋituŋa neni keŋ.

²⁹Abu nai etau ŋolo ke Ekapolon min neni a Yepesa, tolot iŋes kitor kidiŋ akwap a Gilead ka Manase. Tolot kiŋaren tari Misipa lotaun ŋolo alo Gilead, tolot nabo kiŋaren todol nakwap a Ŋiamoni.

³⁰Kikoŋ Yepesa neni a Ekapolon tema, “Ani kipotok iyoŋ Ŋiamoni napedor kaŋ,

³¹ituŋanan nai daadaŋ ŋini isyauni alomun alokai kaŋ akisiryam ayoŋ apaki ŋina aboŋunio ayoŋ alojie kadau akiloun Ŋiamoni, eruwor ituŋanan ŋin ŋini ke Ekapolon, einakinio iŋes neni ke Ekapolon erae ainakinet ŋina epeyo.”

³²Torotok nai Yepesa, kilamar nakwap a Ŋiamoni aŋuna ka akitijikin ikes, ido abu Ekapolon kipotok Ŋiamoni napedor a Yepesa.

³³Abu iŋes kilou Ŋiamoni nooi, kinyas ŋitaunio a Ŋiamoni ŋatomoniarei ameun alo Areor tari nakibois ŋina eyai diyete Minis, todol Abel-Keramin. Aŋun apotu Ŋisirael kilout Ŋiamoni.

³⁴Toboŋo nai Yepesa lore keŋ ŋolo ayai Misipa, kiŋolik Yepesa nakoku keŋ ebunit neni keŋ akisiryam iŋes erami ebur kidoŋae. Arae apese ŋin nakoku a Yepesa ŋinadonupei, amamukar Yepesa ikoku ice ŋinisapat, kori ŋinipese mati ŋin bon.

³⁵Ani iŋolikini Yepesa nakoku keŋ, tocil ŋilowi keŋ, tema, “Okoe nakoku kaŋ, ikituruwo iyoŋ ayoŋ ŋolo eyaloloŋi ka ŋolo a ŋican, anerae adau ayoŋ akikoŋ neni ke Ekapolon ka nyapedori ayoŋ aesikin akitiya ŋuna adau akikoŋ.”

³⁶Tolimok nakoku a Yepesa, Yepesa tema, “Papa kikoŋit iyoŋ neni ke Ekapolon, kitiya neni kaŋ ikwaŋina ikoŋitor iyoŋ, ikwapei adaunia Ekapolon akinyaŋar aronis a ŋimoe kon a Ŋiamoni.”

³⁷Tema apese ŋin neni a papa keŋ, “Kimyek ŋakiro nu kitiyae neni kaŋ: Inakinae ayoŋ ŋilapyo ŋiarei, ikotere olot akirimit lomoru kaapei ka ŋakonei kaŋ egwor aŋuna atwania ayoŋ arae apese.”

³⁸Toboŋok Yepesa nakoku keŋ tema, “Ipedori alosit.” Abu nai Yepesa kimyek nakoku keŋ tolot kiriyaiya ŋilapyo ŋiarei erukito ka ŋakonei keŋ kigwor alomoru aŋuna etwania iŋes erae apese.

³⁹Ani elunyar ŋilapyo ŋiarei, toboŋo apese ŋin neni a papa keŋ, abu nai papa keŋ kitiya neni keŋ ikwapei sek ekoŋitor; mam pa eryamakina apese ŋin ka ekile. Aŋun aponi togeunae etal alo Isirael

⁴⁰ŋolo elosyoneniata ŋapesur nariet ŋirwa ŋiomwon a ŋolokaru akigworo etamunito nakoku a Yepesa a ŋolo alo Gilead.