Read ngakarimojong Ŋikat. 15 Bible Online

Ŋikat. 15 - ngakarimojong bible

Ŋikat. 15

¹Kelunyar apaki ŋina auruwuana, apaki ŋina alemere ŋikinyom ŋulu esibito erau, abu Samuson tolot aanyun aberu keŋ ŋina arae Apilistait, ya aŋuna a aberu keŋ ikale ŋinimeot. Tolimok Samuson papa a aberu keŋ tema, “Acamit ayoŋ alosit nagule a aberu kaŋ.” Nai abu lokamuran keŋ nyecamak iŋes alosit nagule a naberu keŋ.

²Tolimok lokamuran keŋ Samuson tema, “Abu ayoŋ kire oyenu atemar kiŋer iyoŋ nakoku kaŋ, aŋun, abu ayoŋ oinak iŋes neni alokone kon. Nyibus mono nakaato keŋ ŋina cici akilo iŋes a? Kaanukiro nyiyaya iyoŋ iŋes kilunyokin neni keŋ?”

³Tolimok Samuson ikes tema, “Apaki na, ani ketiya ayoŋ ŋuna aronok neni a Ŋipilistin, nyeruwor asecenu ŋina kaŋ.”

⁴Aŋun, abu Samuson tolot, kikamu ŋikweei ŋamiae ŋauni toenenak ŋikweei aloladoi a ŋiare-rei, tolemu ŋagilae toenenak loladoi a ŋikweei a ŋulu eenikinitae kaapei.

⁵Kedau Samuson akinokakin akim nagilae, tomek ŋikweei lomanikorin a Ŋipilistin. Tonomiya akim ŋikinyom ŋulu awuasi, tonomiya ŋakasirim ka ŋikinyom kaapei ka ŋimanikorin a ŋikito a epiini ka ŋulu a ŋikito ka Olipa.

⁶Kiŋitanarosi nai Ŋipilistin ebasi, “Ŋae kitiyae ŋakiro nu?” temasi ikes, “Samuson, lokamuran a Etimanait, anerae kebu lokamuran a Samuson kipoto aberu a Samuson, inak neni alokone a Samuson.” Aŋun, apotu Ŋipilistin toloto lore a lokamuran a Samuson, kicunyakis aberu a Samuson ka lokamuran a Samuson.

⁷Tolimok Samuson ikes tema, “Ani kerae ŋakiro ŋuna itiyaete iyes ŋun, ekoŋi ayoŋ atemar nyeeŋuni tari ŋina enyaŋarya ŋakiro kus.”

⁸Abu Samuson kitijik Ŋipilistin eryenyaana nooi, toar ikes ŋulu alalak, tosodi totiyaar akiboi kidiŋ ŋatabab ŋuna aya Etam.

⁹Apotu nai ŋajorei a Ŋipilistin kitipeiyosi kiboiyosi nakwap a Yudaya, toremo Lei.

¹⁰Tolimut ŋituŋa a Yudaya temasi, “Kaanukiro iponitotor iyes akitijiore isua?” Toboŋokis Ŋipilistin temasi, “Eponitae isua akikamun Samuson, kitiyae neni keŋ ŋuna abu iŋes kitiya neni kosi.”

¹¹Tonyout nai ŋikilyok ŋulu a akwap a Yudaya ŋulu arae ekimar kec ŋalipyo ŋauni, totiyaaros kidiŋ ŋatabab ŋuna aya Etam, kiŋita ikes Samuson temasi, “Nyiyeni iyoŋ atemar erae Ŋipilistin ŋikepukak yok a? Anukiro nai itiya iyoŋ neni kosi?” Toboŋok Samuson tema, “Etiyat ayoŋ neni kec lopite ŋolo etiyatotor ikes neni kaŋ.”

¹²Temasi ikes neni a Samuson, “Ikitiyauna isua ne akikamun iyoŋ, ikotere ikipotor neni a Ŋipilistin.” Toboŋok Samuson ikes tema, “Kikoŋo iyes atemar nyikiarete ŋulu erae iyes ayoŋ.”

¹³Temasi ikes, “Mam! Erae akien bon ikienio isua iyoŋ, ido ikipotokin neni a Ŋipilistin, nyikiari isua iyoŋ.” Aŋun, apotu ikes toena Samuson a ŋaunoi a ŋaarei a ŋunakitet kitipeunioto iŋes nataaba.

¹⁴Ani edoluni Samuson Lei, potu Ŋipilistin akisiryam iŋes ecelasi, atipei toloma etau ŋolo ke Ekapolon neni a Samuson, tosubut ŋaunoi ŋuna aenitere ŋakan keŋ ausi ŋina anom akim, totubutuboor ŋaunoi anakan keŋ.

¹⁵Anenipei, kiŋolik iŋes akoit ŋina a eŋitinyo ŋina a esigirya ŋina ariŋa epapal, tokukokin Samuson, tolemu akoit ŋin, kisitiya Samuson akoit ŋin toarya ŋikilyok aliput.

¹⁶Tolimu nai Samuson tema, “A akoit a eŋitinyo a esigirya aar ayoŋ ikes atukonokin a ŋatukon. A akoit a eŋitinyo a esigirya aar ayoŋ ŋikilyok aliput.”

¹⁷Kedau Samuson erwor, tocaka akoit a eŋitinyo a esigirya. Aponi tolimokinae akibois ŋin Ramas-Lei. [3]

¹⁸Apaki ŋin anyamit akure Samuson nooi, kilip iŋes neni ke Ekapolon tema, “Ikiinak iyoŋ ayoŋ akiloun ŋina apolon na anapedor kaŋ a eketiyan kon. Emaikina mono tokona ayoŋ okoar akure ekekamasi ŋituŋa ŋulu nyileŋeritae lu a?”

¹⁹Aŋun, toŋaa Akuj akwap anakibois a ŋina ayai Lei, tolomut ŋakipi a nen, ani kedau Samuson akimat ŋakipi, tojokyar akuwan keŋ. Aŋun aponi tolimokinae nen Ecowa-Akure, eyai ecowa ŋol tari tokona. [4]

²⁰Toruwor Samuson ekatubon ŋakiro alo Isirael ŋikaru ŋatomoniarei alorwa a ŋulu epukatotor Ŋipilistin akwap ŋin.