Read ngakarimojong Ŋikat. 17 Bible Online

Ŋikat. 17 - ngakarimojong bible

Ŋikat. 17

¹Ayai koloŋ ekile ece nakwap ŋina a ŋikamukumukui ŋina ke Epuraim, anyaritae ekiro keŋ Mika.

²Tolimok Mika toto keŋ tema, “Ŋisilipae aliput ka amiat ŋulu alemaryo aneni kon, ŋulu ilamar iyoŋ apupi ayoŋ, ayakar ayoŋ ŋisilipae ŋul, ayoŋ abu olema, nai tokona ekenyakakini ayoŋ iyoŋ ikes.” Tema toto a Mika, “Elipi kiterereŋ Ekapolon lokoku kaŋ.”

³Abu nai Mika kinyakak ŋisilipae ŋulu arae aliput ka amiat neni a toto keŋ, tosodi toto keŋ tolimu tema, “Etaleikini ayoŋ ŋisilipae lu neni ke Ekapolon aŋuna alokoku kaŋ, kitiyaunere etorube a akuj ŋolo itiyaunitae anasuwa.”

⁴Aŋun, ani inyakakini Mika ŋisilipae neni a toto keŋ, abu toto keŋ tolemu ŋisilipae ŋamiae ŋaarei alo Silipae a ŋul inak neni a eketyakan esilipa, a ŋolo abu kitiyau etorube a akuj ŋolo etiyaunitae a esilipa, aponi kiwuakinae etorube a akuj ŋol kai a Mika.

⁵Ayakar ekile ŋolo anyaritae Mika ŋol akibois ŋinakilipet, tosodi kitiyau arapet ka ŋitorubei a ŋakujo, ido kituruwo lokoku keŋ epei esacaradoti keŋ.

⁶Alorwa a ŋul amam erwosit ayai Isirael, etiyaete ŋituŋa daadaŋ ŋiticisyo ŋulu ejoikinito ikes.

⁷Apaki ŋin, ayai esorokit ŋolo alo Betelem anakwap a ŋina eboiyo iŋes alotuŋa a ekabila a Yuda ka arae iŋes Elepait ŋolo eboi anakwap a ŋin.

⁸Torotok ekile ŋol alotaun Betelem alo Yudaya, akiwarar akibois daadaŋ ŋina epedorya iŋes akiboiyo. Todolu iŋes kai a Mika, nakwap ŋina a ŋikamukumukui ŋina a Epuraim, akitiya etic keŋ a nen.

⁹Kiŋit Mika ekile ŋol tema, “Ai ibunitor iyoŋ?” Toboŋok iŋes tema, “Arae ayoŋ Elepait ŋolo a Betelem a ŋolo a Yudaya, ido alosi ayoŋ arae ŋolo ewarit neni daadaŋ apedori akiboiyo.”

¹⁰Tolimok nai Mika iŋes tema, “Eboiyoto ka ayoŋ, toruwor iyoŋ papa kaŋ ka esacaradoti. Akainakini ayoŋ iyoŋ ŋisilipae ŋitomon a ŋolokaru, ŋilowi ŋulu inapi iyoŋ ka akimuj ŋina iitanit iyoŋ aŋuna ka ayarya.”

¹¹Abu nai Elepait ŋol tocamu akiboi ka Mika, kiboi ekile ŋol alore a ŋol esibit epei a ŋidwe a Mika a ŋulusapa.

¹²Kituruwo Mika esorokit ŋol esacaradoti keŋ, kiboi daŋ ekile ŋol alokai a Mika.

¹³Tolimu nai Mika tema, “Ayeni ayoŋ tokona atemar eketerereŋi Ekapolon ayoŋ, anerae esacaradoti kaŋ Elepait.”