Read ngakarimojong Ŋikat. 5 Bible Online

Ŋikat. 5 - ngakarimojong bible

Ŋikat. 5

¹Akoloŋit ŋin apotu Debora ka Barak lokoku ka Abinoam toekis ebasi:

²“Kipuroe Ekapolon! Kipuroe Ekapolon aŋuna a ŋikarikok, a Ŋisirael aŋuna a ŋituŋa a ŋulu apotu inakinos aŋuna ajiore!

³Kiirasi iyes ŋirwosi; topupokisi iyes ŋikapolok, aeikini ayoŋ neni ke Ekapolon, aeikini ayoŋ eete neni a Ekapolon Akuj a Ŋisirael.

⁴Ekapolon, apaki ŋina irotokinio iyoŋ alomoru Seir, apaki ŋina ilomarya iyoŋ anakwap a Edom, abu akwap tomaranik, tobukun ŋakipi alokidiama, apotu kire ŋidouwon tobukut ŋakipi.

⁵Apotu ŋimoru tomaranikis alokiŋaren Ekapolon, ŋolo a Sinai tomaranikis ŋimoru alokiŋaren Ekapolon Akuj ŋina a Ŋisirael.

⁶Alorwa a ŋulu a Samegar a lokoku ka Anas ka alorwa a Yael, apotu ŋimucurus tojoŋoto akitorunun nen, apotu ŋikalotok kiwuapa ŋirotin ŋice.

⁷Apotu ŋitaunio alo Isirael toruwor ŋulu imyekinitae, apotu kidoŋo eororete akitodol ŋina ebunio iyoŋ Debora, akitodol ŋina ibunio iyoŋ Debora ikwa toto a Ŋisirael.

⁸Ani eseunete ŋituŋa akiwuap ŋakujo ŋace, todolu ejie lopukei a ŋitaunio kec. Amam alokilyok a ŋulu arae ŋalipyo ŋatomoniomwon ŋolo ayakar aupal kori akwara.

⁹Eyai etau kaŋ neni a ŋikarikok a ŋajorei a Isirael ka ŋituŋa ŋulu apotu inakinos aŋuna ka ajiore. Kipuroe Ekapolon!

¹⁰Tolimosi ŋun, iyes ŋulu imeto ŋisigirya ŋulu akwaŋak, iyes ŋulu iboiyete aloboro a ŋulu ebusak ka iyes ŋulu ilosete alorotin,

¹¹kiirasi ŋitoilon a ŋituŋa a ŋulu eya diyete ŋakare, iseraete ikes a nen akiloun ŋina ke Ekapolon ŋuna elounia, akiloun ŋina elouniata Ŋisirael. Apotu ŋituŋa a Ekapolon totiyaaros lopukei a ŋitaunio kec.

¹²Tonyou, Tonyou, Debora! Tonyou, tonyou toeik eete! Tonyou Barak, toriko aneni kosi ŋituŋa ŋulu ikamuni iyoŋ, okoe lokoku ka Abinoam.

¹³Apotu nai ŋipiya a ŋituŋa a Ekapolon totiyaun, apotu ŋituŋa a Ekapolon potu neni kaŋ etenito akitijiore ŋiketirok.

¹⁴Apotu ikes torotokis alo Epuraim totiyaar nakadipaalat, apotu ŋituŋa a ekabila a Benjamin kaapei ka ŋiyeneta kec kiŋarenikis ikes, apotu ŋikarikok ŋajorei potu alo Makir, ido apotu ŋikapolok potu alo Sebulon,

¹⁵apotu daŋ ŋikapolok a ŋituŋa a Isakar potu kaapei ka Debora, apotu ŋituŋa a ekabila a Isakar torukut ka Barak, kiwonyakis ŋituŋa a ekabila a Isakar iwuapito Barak tari nakadipaalat ajiore. Nai aŋayaŋayato ŋituŋa a ekabila a Ruben alotai kec,

¹⁶kaanukiro iponiata iyes towua anauyoi a ŋamesekin ipupete ŋikeyokok iiunyiunyete ŋamesekin? Aŋayaŋayato ŋituŋa a ekabila a Ruben alotai kec.

¹⁷Apotu ŋituŋa a Gilead kidoŋo ekekwaye aŋolol Yorodan. Kaanukiro edoŋioto ŋituŋa a ekabila a Dan iboyete alodiyete ŋameeli? Apotu ŋituŋa a ekabila a Aser kidoŋo iboiyoto alotaunio a ŋulu alodiyete anam.

¹⁸Apotu ŋituŋa a ekabila a Sebulon tojala akiyar, ŋituŋa a ekabila a Naputali daŋ apotu tojala akiyar kec anakiboisyo a ŋunamukur.

¹⁹Apotu ŋirwosi toloto lojie, ido apotu kitijioto ŋimoe, apotu ŋirwosi a Kanaan kitijioto ŋimoe, apotu ikes kitijioto ŋimoe alo Taanak alodiyete ŋakipi a Megido, nai nyeŋatara ikes esilipa edio.

²⁰Apotu ŋikacer elosete alokidiama kitijioto Sesira abu kidiama kiŋaraki Ŋisirael akitijiore Sisera,

²¹apotu ŋikacer kisileleba ayonae Kison kilap, apotu ŋakipi a Kison ŋuna aleleete ipumasi nooi kiwoko ikes. Aŋun, alosi ayoŋ kiŋaren, alosi ayoŋ atitiny.

²²Apotu nai ŋaŋolei potu erwosi ŋakejen kec icakacakaete akwap. Apotu ŋaŋolei keŋ ŋuna atironok potu eporete.

²³Abu emalaika ŋolo ke Ekapolon tema, ‘Kilama Meros kilama nooi ŋituŋa ŋulu iboiyete alotooma keŋ, anerae apotu ikes nyepotu akiŋarakin Ekapolon, apotu ikes nyepotu akiŋarakin Ekapolon akitijiore ŋiketirok.’

²⁴Erereŋ nooi Yael alokidiŋ ŋaberu, erereŋ aberu a Eber a Ekenait erereŋ iŋes alokidiŋ ŋaberu ŋuna iboiyete aloeemae.

²⁵Abu Sisera kiŋit Yael ŋakipi, inak Yael Sesira elabo a abakule, inak Yael Sisera elabo abakule a ŋina imujiata ŋirwosi.

²⁶Abu iŋes tolemu asesit a eema, totiŋ a akan keŋ a ŋina aloteten enyondo ŋolo a ŋiketiyak. Abu iŋes kibubuk Sisera a asesit kiela akou a Sisera, abu iŋes kibukuk asesit namateŋen a Sisera kiela akou keŋ.

²⁷Toryedik Sesira anakejen a Yael, toramakin kwap, toper anakejen a Yael ilesiyara. toryedik Sesira anakejen a Yael, toramakin kwap totwan a nen.

²⁸Toripiya toto a Sisera alodirisa keŋ, kikalou ayaye edirisa tema, ‘Kaanukiro adidiyo agaari keŋ? Kaanukiro adidiyoto ŋaŋolei keŋ?’

²⁹Toboŋok apei ŋina aoson nooi anaberu a ŋuna arae ŋakapolok, kire aryamu iŋes alope aboŋokinet a akiŋiset keŋ na.

³⁰‘Eriŋa tokona ikes eŋatanarete ŋiboro ka eriŋa ekorete ŋiboro ŋulu aŋatunete; ekoranakinosi tokona ikes ŋapesur apei, kori ŋaarei aŋuna aŋolosigarit, eŋasete tokona aŋuna a Sisera ŋilowi ŋulu isibusitae, ŋinapito ŋulu isibusitae ka edonyokinitoe ŋausyo ŋuna ebusak, eŋasete tokona ikes ŋinapito ŋiarei ŋulu anapi ayoŋ ŋulu isibusitae ka edonyokinitoe ŋausyo ŋuna ibusak.’

³¹Okoe Ekapolon, elipi tomunyaros ŋimoe kon daadaŋ lopite ŋol! Nai elipi kiyata agogoŋu a ŋituŋa a ŋulu ikiminasi iyoŋ, lopite ŋolo iyatar amwanis elomuni akoloŋ.”