Read ngakarimojong Ŋikat. 7 Bible Online

Ŋikat. 7 - ngakarimojong bible

Ŋikat. 7

¹Akoloŋit ŋina atupakini ŋin taparacu sek, apotu Yerubaal (iŋes Gideon) ka ŋikilyok daadaŋ ŋulu arukitotor iŋes toloto kiboiyosi diyete elelya Arod, toyai neni eboiyoto Ŋimidian Kuju kec nakadipaalat ŋina ayai diyete ekamukumukut More.

²Tolimok Ekapolon Gideon tema, “Elalak nooi aneni kaŋ ŋikilyok ŋulu irukitotor iyoŋ aŋuna ka akilounia Ŋimidian. Epedorete Ŋisirael akiturokin temasi, ‘Agogoŋu kosi iŋes ikilakuni isua.’

³Aŋun, kiserak tokona ŋakiro nu kiirasi ŋirukitos kon daadaŋ, ‘Ituŋanan daadaŋ ŋini emarani aŋuna ekuryania, emaikina toboŋo lore.’ ” Aŋun, apotu ŋasigarya, ŋikilyok ŋalipyo ŋatomoniarei ka ŋaarei toboŋosi lore, kidoŋo ŋalipyo ŋatomon.

⁴Tolimok nai Ekapolon Gideon tema, “Eriŋa ŋirukitos kon elalak nooi; totiyaaror ikes neni eya ŋakipi, atyaki ayoŋ ikes aŋuna kon a nen. Ani kalimu ayoŋ ebe, ‘Emaikina ekile lo toloto ka iyoŋ,’ elosi iŋes ka iyoŋ, ido ani kalimu ayoŋ ebe, ‘Nyelosi ekile lo ka iyoŋ,’ nyelosi ŋol.”

⁵Abu nai Gideon totiyaaror ŋirukitos keŋ neni aya ŋakipi, tosodi tolimok Ekapolon Gideon tema, “Ŋikilyok daadaŋ ŋulu emasete ŋakipi ilwakilwakete lopite ŋolo ilwakilwakya iŋok, totyaka ikes lowae epei, ŋulu daadaŋ emasete eryedikete tookununeete ŋakipi a ŋakan kec tomata, emaikina iyoŋ totyaka ikes lowae ŋoloce.”

⁶Arae ekimar a ŋikilyok a ŋulu apotu kilwakilwaka ŋakipi ikwa ŋiŋokwo ŋamiae ŋauni, nai ŋuluce daadaŋ apotu toryediko tookununut a ŋakan ŋakipi tomata.

⁷Tolimok Ekapolon Gideon tema, “Akaiuni ayoŋ iyes ka akainakini iyoŋ kilou Ŋimidian irukito ka ŋikilyok ŋamiae ŋauni ŋulu apotu tomata ŋakipi ilwakilwakete. Kimyek ŋikilyok ŋuluce daadaŋ toboŋosi lorerya kec.”

⁸Aŋun, abu Gideon kijau aneni a ŋikilyok a ŋulu aboŋorete lorerya ŋitwol ŋulu a ŋakipi ka ŋamomwar a ŋimesekin, tosodi tolimok ikes daadaŋ toboŋosi lorerya kec, nai kidoŋo ŋikilyok ŋulu arae ŋamiae ŋauni. Ayai neni eboiyoto Ŋimidian nakadipaalat, toyai Gideon ka ŋirukitos keŋ nenimukur.

⁹Akoloŋit ŋinapei ŋin nakwaare, abu Ekapolon tolimok Gideon tema, “Tonyou, tolot kitijik Ŋimidian anakibois kec, anerae adau ayoŋ akipotokin ikes napedor kon.

¹⁰Nai ani kikuryana iyoŋ akitijikin ikes, totiyaaros kaapei ka eketiyan kon Pura nakibois ŋina eyakasi Ŋimidian,

¹¹ikotere kiirasi ŋakiro ŋuna irworosi ikes, ekaku ititinyior iyoŋ ka icamuni alosit akitijikin ikes anakibois kec.” Aŋun, abu Gideon totiyaaros kaapei ka eketiyan keŋ Pura diyete neni eboiyoto ŋajorei a Ŋimidian.

¹²Alalak nooi Ŋimidian, Ŋiamaleki ka ŋituŋa a ŋikabilae a ŋulu a lo Kide, apetakina akadipaalat daadaŋ esibit emaase, pa apedoryo akimarun ŋikaala kec, alalak nooi asibit asinyon alodiyete anam.

¹³Apaki ŋina adolio Gideon nen, erworo ekile epei elimonokini ŋuluce ŋakiro ŋuna kebu iŋes kiruja. Abu ekile ŋol tema, “Abu ayoŋ eruja, anakiruja kaŋ abu ayoŋ eŋolik amugati ŋina epounitoe a ŋakirya a ŋuna a ŋikinyom a ŋulu esibito erau, abu amugati kikokoriyor neni eboiyoto Ŋimidian, tonaŋ eema epei toritak kwap.”

¹⁴Toboŋok erukitos keŋ tema, “Meere ŋun icebore nai erae ekileŋ a Gideon a Esiraelit a ŋolo erae lokoku a Yoas; adau Ekapolon akipotokin Ŋimidian ka ŋajorei kec daadaŋ napedor keŋ.”

¹⁵Kedau Gideon akiirar ŋakiro ŋuna erujat Emidianait ŋolo a Midian ŋol ka akisileerekinet a akirujaet a ŋin, abu iŋes toryedik kilip, toboŋo neni eboiyoto Ŋisirael, ido tolimok ikes tema, “Tonyoutu, anerae adau Ekapolon akipotokin ajore a Ŋimidian napedor kus.”

¹⁶Totyak nai Gideon ŋirukitos keŋ ŋulu arae ŋamiae ŋauni toruworos ŋajorei ŋauni, tokorak ikes daadaŋ ŋamomwar a ŋimesekin ka ŋitwol ŋulu amam ibore ayai ka ŋagilae ŋuna ewuakinitae lotwol.

¹⁷Tolimok Gideon ŋirukitos keŋ tema, “Apaki ŋina adolio ayoŋ diyete akibois ŋina eyakasi ŋajorei a Ŋimidian, kiteete ŋuna etiyae ayoŋ, ido kitiyata iyes daŋ ŋunapei.

¹⁸Ani ekutakinio isua ŋamomwar a ŋimesekin kaapei ka ŋirukitos kaŋ, iyes daŋ emaikina tokutakis ŋamomwar a ŋimesekin alowaetin a daadaŋ a akibois a ŋina eyakasi Ŋimidian, ido tocelut ibasi ‘Aŋuna a Ekapolon ka aŋuna a Gideon.’ ”

¹⁹Apotu nai Gideon ka ŋikilyok amiat ŋulu arukitotor iŋes todolo diyete akibois ŋina ayakasi ŋajorei a Ŋimidian, adolete ikes nen edoli kidiŋ akuwar, apaki ŋina elocokinioto ikes ŋulu eyokiyete ŋuluce nakwaare. Tokutakis Gideon ka ŋirukitos keŋ ŋamomwar a ŋimesekin, tobwaŋabwaŋaasi ŋitwol ŋulu atiŋito ikes.

²⁰Aŋun, tokutakis ŋajorei ŋunauni daadaŋ ŋamomwar a ŋimesekin ka tobwaŋabwaŋasi ŋitwol; atiŋito ikes daadaŋ ŋagilae a ŋakan a ŋuna alokedyeny ka atiŋito ŋamomwar a ŋimesekin a ŋakan a ŋuna aloteten, ikotere ekusete tosodi tocelut temasi, “Toara a ekileŋ aŋuna ke Ekapolon ka aŋuna a Gideon!”

²¹Abu ŋolokile towo anakibois keŋ irimokinito kidiŋ akibois daadaŋ ŋina ayakasi ŋajorei a Ŋimidian tobwaŋa ajore a Ŋimidian ŋina sek ayai nakibois ŋin, kiworout toema.

²²Ani ekutakinete Gideon ka ŋirukitos keŋ ŋamomwar a ŋimesekin ŋun ŋamiae ŋauni kisicumak Ekapolon Ŋimidian make, kicumucumas daadaŋ a ŋileŋia. Toema ŋajorei a Ŋimidian todolo Bes-Sita ekerete lowae ŋolo a Sesira todolo tari lotaun Abel-Meola ŋolo eyai diyete Tabas.

²³Aponi nai tonyaraunae Ŋisirael alokabilae a Naputali, Aser ka Manase kiwuapa Ŋimidian.

²⁴Kiyakiya nai Gideon ŋituŋa lowaetin daadaŋ a akwap a ŋina a ŋikamukumukui a ŋina a Epuraim tema, “Totiyaunos etijikis Ŋimidian. Ekamasi neni eya ŋakipi daadaŋ ka akitodol tari Bes-Bara ka Yorodan daŋ.” Aŋun, aponi tonyaraunae ŋikilyok ŋulu a ekabila a Epuraim daadaŋ, kikamasi ikes neni aya ŋakipi aŋolol daadaŋ akitodol Bes-Bara ka Yorodan daŋ.

²⁵Apaki ŋina ewuapitotor Ŋisirael Ŋimidian, apotu kikamut ŋikarikok a ŋajorei a Ŋimidian ŋuluarei, Oreb ka Seeb, toara Oreb anataaba a ŋina a Oreb ka Seeb anacuet a epiini a ŋina a Seeb. Apotu Ŋisirael, yaut akou a Oreb ka ŋina Seeb neni a Gideon a ŋolo edoŋit ekekwaye Yorodan.