Read ngakarimojong Ŋikat. 8 Bible Online

Ŋikat. 8 - ngakarimojong bible

Ŋikat. 8

¹Apotu nai ŋituŋa a ekabila a Epuraim tolimokis Gideon temasi, “Anukiro nu ŋuna itiya iyoŋ neni kosi? Kaanukiro pa ikinyaraa iyoŋ isua apaki ŋina ilosyo iyoŋ akitijikin Ŋimidian?” Apotu ikes kisiburata Gideon nooi.

²Tolimok nai Gideon ikes tema, “Anukiro tokona etiyat ayoŋ ŋuna ikwaan ka ŋuna itiyato iyes? Tari kekudyoko ŋuna itiyato iyes ŋikilyok a ekabila a Epuraim, epolok ŋun nooi akilo ŋuna itiyato ŋituŋa a ateker ka Abieser.

³Abu Ekapolon ikipotok iyes Oreb ka Seeb ŋikarikok a ŋajorei a Ŋimidian. Anukiro etiyat ayoŋ ŋuna ikwaan ka ŋuna itiyato iyes?” Kedau Gideon akirwor ŋun, apotu ŋituŋa a ekabila a Epuraim tojoŋoto aŋoikinit iŋes.

⁴Tolot nai Gideon tari Yorodan, todoka ekekwaye aŋolol, kaapei ka ŋikilyok ŋamiae ŋauni ŋulu arukitotor iŋes, aupit ikes daadaŋ nai arubakinito ikes iwuapito Ŋimidian.

⁵Tolimok nai Gideon ŋituŋa a Sukos tema, “Inakisi kareca ŋamugati ŋadi neni a ŋirukitos kaŋ, anerae eupit ikes nooi ka ewuapitae isua Seba ka Salimuna ŋirukitos a Ŋimidian.”

⁶Nai tolimokis ŋikapolok a Sukos Gideon temasi, “Idau iyoŋ akikamun Salimuna ka Seba ikiŋisit isua ŋamugati aŋuna a ŋasigarya kon a?”

⁷Toboŋok Gideon ikes tema, “Ejok! Ani kedau Ekapolon akipotokin Seba ka Salimuna napedor kaŋ, ekebuŋae ayoŋ iyes a ŋalita a ŋuna eya ŋikukwa a ŋuna elemunitae analoŋisat.”

⁸Abu Gideon toloto a nen ka ŋirukitos keŋ Penuel, kilip Gideon ŋituŋa a Penuel daŋ ŋamugati ŋadi aŋuna a ŋirukitos keŋ lopite ŋolo elipitor ŋituŋa a Sukos, ido apotu ŋituŋa a Penuel daŋ toboŋokis iŋes lopite ŋolopei aboŋokinitotor ŋituŋa a Sukos.

⁹Aŋun, tolimok Gideon ikes tema “Ani aboŋuni ayoŋ kedau akiloun ŋimoe kaŋ, amunaari ayoŋ aduketait ŋina aoyan na.”

¹⁰Apaki ŋin ayakasi Salimuna ka Seba kaapei ka ŋasigarya kec Karikor ka aapiyarit ekimar a ŋasigarya kec ŋalipyo ŋatomon ka ŋakan, arae ikes ŋipiya a ajore a ŋikabilae a ŋulu alo Kide, anerae aponi toarae ŋikajiok ŋalipyo amiat ka ŋatomoniarei.

¹¹Abu nai Gideon kitipeiyo tomek erot ŋolo emeto ŋikawotok ŋolo itorit Kide Noba ka Yogibea, kitijik Gideon ajore a Salimuna ka Seba, kituumik ikes pa etenito.

¹²Toema Salimuna ka Seba, kiwuap Gideon ikes, todita ŋirwosi a Ŋimidian ŋuluarei ŋul Seba ka Salimuna, kitubul ajore kec daadaŋ.

¹³Ani eboŋuni Gideon lokoku a Yoas alojie, kitoru lorot ŋolo itipeiyorere Eres.

¹⁴Kikamu Gideon esorokit epei ŋolo a Sukos, kiŋitiŋiti iŋes tolimo ŋirorwa a ŋikapolok ka ŋikasikou a Sukos daadaŋ. kigir nai Gideon ŋirorwa a ŋikapolok ka ŋikasikou a Sukos, arae ikes daadaŋ ŋituŋa ŋatomonikanikaarei ka ŋikanikaarei.

¹⁵Todolu nai Gideon neni aya ŋituŋa a Sukos, tolimok ikes tema, “Seba ka Salimuna ikes lu, akoloŋit ŋina eŋitar ayoŋ akimuj aŋuna a ŋasigarya kaŋ ka ŋamugati aŋuna kec, ipotu iyes towout ainakin ayoŋ ŋamugati ka akimuj, ido temasi, ‘Idau iyoŋ akikamun Salimuna ka Seba, ikiŋisit isua ŋamugati aŋuna a ŋasigarya kon a ŋuna eupit a?’ ”

¹⁶Abu nai Gideon tolemu ŋalita ŋuna aya ŋikukwa ŋuna alemunitae analoŋisat kibuŋaere ŋikapolok a ŋituŋa a Sukos.

¹⁷Abu daŋ iŋes toritak kwap aduketait ŋina aoyan ŋina a Penuel ka toar ŋikilyok daadaŋ ŋulu ke etaun a ŋol.

¹⁸Kiŋit Gideon Salimuna ka Seba tema, “Ataŋae ekwaanatar ŋikilyok ŋulu iarete iyes alo Tabor? ” Toboŋokis ikes temasi, “Ekwaan ikes ka iyoŋ, atakanete ikes esibito ŋidwe a erwosit.”

¹⁹Tema nai Gideon neni kec, “Arae ikes ŋikaitotoi kaŋ, ŋidwe a toto kaŋ, ikwapei eyarya Ekapolon, ani kerae nyiyarito iyes ikes pa kakaar ayoŋ iyes.”

²⁰Tolimok nai Gideon Yeser lokoku keŋ ŋolo kiyae tema, “Ape, toar ikes!” Nai abu idya nyeut ekileŋ keŋ, akuryana iŋes, anerae ariŋa iŋes erae idya.

²¹Temasi nai Salimuna ka Seba neni a Gideon “Bua toarae isua, anerae iyakar iyoŋ agogoŋu ŋina a ekile.” Aŋun abu Gideon toar Salimuna ka Seba, ido tolema ŋiboro ŋulu etanapikinitae lomosiriŋin a ŋikaala kec.

²²Tolimokis nai Ŋisirael Gideon temasi, “Kipukae isua, iyoŋ ka lokoku kon ta lopapait kon daŋ, anerae ikiu iyoŋ isua anapedor a ŋina a Ŋimidian.”

²³Tolimok Gideon ikes tema, “Nyekepukae ayoŋ iyes ka nyikipukae iyes lokoku kaŋ, Ekapolon iŋes ikipukae iyes.”

²⁴Tema nai Gideon neni a Ŋisirael, “Kimyekinae ayoŋ ekeŋit iyes daadaŋ ŋakiro nu; inakinae ayoŋ ŋinapen ŋulu enapyo anaki ŋulu iŋatunete iyes aneni a Ŋimidian.” (Ayakatar Ŋimidian ŋinapito a ŋaki ŋulu etiyaunitae a egolid, anerae arae etal a Ŋimidian anapit ŋiboro ŋul ikwa Ŋisimael.)

²⁵Toboŋokis ŋituŋa temasi, “Ikiinakinio isua iyoŋ ŋiboro ŋul emam akitiŋakin.” Aponi nai topetakinae anaŋga kwap, tocakak ŋinituŋanan nanaŋg ŋin ŋinapito a ŋaki ŋulu keŋatunete ikes aneni a Ŋimidian.

²⁶Arae apotis a egolid a ŋolo etiyaunitere ŋinapito a ŋaki a ŋulu abu Gideon kirirau alotuŋa ŋakiloi ŋuna aapikinito ŋatomoniarei, (Pa emaritae ŋinapen a ŋidokolei, a ŋaki ka ŋilowi ŋulu kipura-Areŋak ŋulu enapeneneete ŋirwosi a Ŋimidian ka ŋulu anapito ŋikaala kec.)

²⁷Abu Gideon kitiyau etorube a akuj a egolid a ŋol, kiwuak lotaun keŋ Opura, ido apotu Ŋisirael daadaŋ kilipa neni a etorube. Apotu ŋun kitojamakis Gideon ka ekal keŋ akikinyomit Akuj.

²⁸Apotu Ŋisirael kilout Ŋimidian ka ŋitijikino nabo Ŋimidian Ŋisirael. Abu ekisil toyakaun nakwap a Ŋisirael ŋikaru ŋatomoniomwon alokaru a ŋulu ayarya Gideon.

²⁹Abu Yerubaal lokoku a Yoas tolot akiboi alokai keŋ a elope.

³⁰Apaki ŋin ayakar Gideon ŋidwe ŋulusapa ŋatomonikanikaarei, ŋulu auruuni iŋes elope anerae ayakar iŋes ŋaberu ŋuna alalak.

³¹Abu aberu keŋ daŋ ŋina pa eisitae ŋina eboi alo Sekem kidou ikoku ŋinisapat, tolimok ekiro Abimelek.

³²Abu nai Gideon lokoku a Yoas totwana emojoŋit nooi, tonukae iŋes neni anukitae papa keŋ Yoas alo Opura alotaun a Ŋiabieseri.

³³Atwanare Gideon bon, toboŋokis nabo Ŋisirael akilip neni ata Baal, kituruwosi Baal-Beris akuj kec.

³⁴Apotu Ŋisirael tojoŋoto atamunit Ekapolon Akuj kec ŋolo abu toiu ikes alomoe kec a daadaŋ a ŋulu erikaunito ikes alowaetin a daadaŋ

³⁵ka ŋitoodiut alakara kec neni a ekal a Yerubaal (iŋes Gideon) aŋuna ka ajokis a daadaŋ a ŋina abu iŋes kitiya neni a Ŋisirael.