Read ngakarimojong Yud. 1 Bible Online

Yud. 1 - ngakarimojong bible

Yud. 1

¹Ayoŋ Yuda ŋolo arae eketiyan a Yesu Kristo ka lokaato a Yakobo, egirit abaruwa na neni a ŋulu adau Akuj anyarare, ka ŋulu emina iŋes ŋolo erae Papa ka iyokitoe aŋuna a Yesu Kristo:

²Tolalaar aneni kus akisyon, ekisil ka amina!

³Ŋikaitotoi ŋulu minan, ikwaŋina acamitor ayoŋ akigir neni kus aŋuna ka aiuno a ŋina ikimori iwon, abu oanyu atemar itemokino egir anakilipit iyes tojioto aŋuna ka anupit a ŋina abu Akuj inak ŋituŋa keŋ apeiinakinet kirikakin.

⁴Anerae erepunosi kidiŋ kus ŋituŋa ŋice ŋulu eŋerito Akuj. Ilocete ikes ajokis ŋina ka Akuj yok aŋuna ka akitiya asiilyanut ka eŋerito Yesu Kristo Ekarikon ka Ekapolon yok ŋolo erae epei bon. Asubakinitae koloŋ sek atubokino aŋuna kec.

⁵Acamit tokona akitatamun iyes, tari sek daŋ kikiteyenikinitae daadaŋ, atemar abu Ekapolon, kedau aiun ŋituŋa keŋ ŋulu a Isirael anakwap a Ijipit, tomunya ekaku ŋulu pa anupito.

⁶Ŋimalaikan daŋ ŋulu apotu toŋero apolou kec, apotu toesikis neni eboiyoto ikes, ido eenit Akuj ikes a ŋiriko a ŋulu ruba, anakiryonut a ŋina iryono cuc, akitodol Akoloŋit ŋina apolon ŋina ka atubokino.

⁷Totamunito daŋ Sodoma ka Gomora ta ŋitaunio ŋulu edunyatar ikes, ŋulu apotu ŋituŋa kitiyaata ikwa ŋimalaikan ŋul anakitiya ŋakiro ŋuna ka amalao ka asupitoi ŋina gelaanot. Isicanitae tokona ikes anakim a ŋina nyeduŋe. Alopite a lo erae ikes akitaanyikinet tocoikiniata daadaŋ.

⁸Nai itiyaete ŋituŋa ŋul daŋ ikwaŋinapei: anatakanikineta kec emunaanarete ikes ŋawat kec, eŋerito ŋakiro ŋuna a ŋikapolok, iyanyete ŋisubuna ŋulu itopolooritae alokidiama.

⁹Tari Mikael emalaika ŋolo apolon nyitiya nu, ŋina apeganakinotor iŋes ka Satan ebasi ŋae alokidiŋ kec itemokino ya akuwan a Moses. Abu iŋes nyetitinyik atubokin Satan anakiyany, nai abu tema, “Ekapolon elope ikiyeyakini iyoŋ!”

¹⁰Nai iyanyete ŋituŋa ŋul ibore daadaŋ ŋini nyeyenete ikes apolou keŋ, ka ibore daadaŋ ŋini idounitere ikes eyenete lopite ŋolo a ŋityaŋ iŋes pei inyasuni ikes.

¹¹Ekaŋ neni kec! Anerae ewuapakis ikes epite a Kain. Aŋuna a ŋisiliŋa, amaryaarosi ikes nadyakaret ŋina koloŋ a Balaam. Ikwapei Kora, awout ikes eboŋito ka inyasunio ikes.

¹²Anasuban kus a ŋuna ka aminanar, ikote ikes aŋoryanut, anerae elaerikinito amata nooi kaapei ka iricakinito ŋawat kec make anakimuj. Ikote ikes ŋidouwon ŋulu nyilimete, ŋulu ekutanari ekuwuam, ŋikito ŋulu emam ŋaraito nakamu, ŋulu etwakito kire torutunoe.

¹³Ikote ikes ŋakipi ŋuna ka anam imorokokoete, kilepunito ekurudo ŋolo a ŋileec kec; ikote ikes ŋikacer ŋulu imasanar ŋulu adau Akuj akitemokin aŋuna kec akiryonut ŋina iryono cuc, ŋina ruba.

¹⁴Arae ikotere ikes abunio Enok ŋolo a ŋikanikaarei alokidiŋ ŋipapae ŋulu ka Adam todwarya tema, “Topupokisi! Erukunete Ekapolon ka ŋimalaikan keŋ ŋulu nyimarun,

¹⁵atubokin ŋituŋa daadaŋ, atubokin ŋulu nyekerito Akuj aŋuna a ŋaronisya a ŋuna apotu ikes kitiyata, ka atubokinia ikes a ŋakiro a daadaŋ a ŋuna kepotu ikes kirworotor iŋes emam akerit.”

¹⁶Erae ŋituŋa lu ŋikeŋuruŋurak, ŋikokopyanotin, iwuapito ekibure ŋolo a ŋawat kec make; iturosi ikes nooi ka isupete ŋituŋa ŋuluce, ikotere eryamuniata ibore ŋini ecamito ikes.

¹⁷Ŋikaakonei ŋulu minan, totamunito ŋakiro ŋuna sek aris Ŋikiyakia a Yesu Kristo ke Ekapolon yok kirwor.

¹⁸Apotu ikes itolimokis iyes ebe, “Alorwa a ŋulu esidyok, epote ŋikesolok, ŋulu iwuapito ekibure ŋolo a ŋawat kec make.”

¹⁹Ŋul ikes ŋulu eyaunito atyakatyaka, ikes ŋulu iricakinito ŋiboro ŋulu ka akwap bon; emamukatar ikes Etau ŋolo ka Akuj.

²⁰Nai iyes ŋikaitotoi ŋulu minan, torubakisi ipoloete ananupit a ŋina asegan akilo; torubakisi ilipeneneete alotooma Etau ŋolo Asegan.

²¹Kiboiyete alotooma amina ŋina ka Akuj, eriŋa idarito iyes Ekapolon yok Yesu Kristo ainakin iyes akiyar ŋina nyedaun anakisyon keŋ.

²²Kigaŋa, kitunupa ŋulu eŋayaŋayato;

²³toiutu ŋice anakopun ikes anakim. Eyakasi nabo ŋice ŋulu itemokino torimakinito, nai toyakatar acoit, tolwaka tari alolowi kec a ŋulu itooŋoryanit asecit.

²⁴Epedori Akuj akiyok iyes nyikiguk ananupit ka ikiyau iyes emam asecit ka iyakatar alelyan tooma nakica ŋina ka apolou.

²⁵Neni keŋ, a ŋolo erae Akuj ŋina donupei, Ekaiunan yok alotooma Yesu Kristo Ekapolon yok, toyai akipuro, apolou, agogoŋu ka apedor, tari eriŋa nyesubuna akwap, tokona ka ŋikaru ka ŋikaru! Amen.