Read ngakarimojong Akis. 1 Bible Online

Akis. 1 - ngakarimojong bible

Akis. 1

¹Erae ekitaabo lo ŋolo igiritae ŋakiro ŋuna abu Yesu Kristo kisileereu. Abu Akuj inak iŋes akiseleerekinet na, ikotere iseleerekinio ŋiketiyak keŋ ŋuna itemokino totakanut atipei. Abu Kristo kiyakiya emalaika keŋ neni a Yoana ke eketiyan keŋ akiteyenikin iŋes ŋakiro nu.

²Eteyenu Yoana ŋakiro daadaŋ ŋuna abu iŋes toanyu, ŋuna eponito aneni ka Akuj ka ŋuna eteyenu Kristo.

³Erereŋ ituŋanan ŋini esyomi ŋakiro ŋuna edwaritae ka erereŋ ŋulu epupete nu kiricakis ŋakiro ŋuna igiritae lokitaabo lo! Anerae eapi apaki ŋina etakanuniata ŋakiro nu.

⁴Ayoŋ Yoana egirit emalas lo neni a ŋatukon a Ŋikristo a ŋunakanikaarei a ŋuna eyakasi Asia: Toyai ajokis ka ekisil neni kus ŋulu eponito aneni ka Akuj a ŋina erae ka arae, ka ŋina ebuni, ka aneni a ŋitai a ŋulukanikaarei, a ŋulu eyakasi kiŋaren ekicoloŋ keŋ,

⁵ta aneni a Yesu Kristo ŋolo erae esuuda ŋolo ikinyomitae, ŋolo esyaunan ayarun alokatwak, torae daŋ ekepukan ŋolo a ŋirwosi a ŋulu ka akwap. Ikimina iŋes iwon, ka aŋuna ka atwanare keŋ abu itolacak iwon anasecisya yok.

⁶Ikituruwo iŋes iwon apukan ŋina a ŋisacaradotin a ŋulu itiyaete neni ka Akuj a Papa keŋ. Toyai apolou ka apedor neni a Yesu Kristo ŋikaru ka ŋikaru! Amen.

⁷Kiirasi, ebunit iŋes alodowuon! Eanyuwarete ŋituŋa daadaŋ tari ŋulu ecumete iŋes. Ikalounete ŋituŋa daadaŋ ŋulu ka akwap aŋuna keŋ. Kire ikokinete neni! Amen!

⁸Ebala Ekapolon Akuj ŋina etiron, ŋina erae ka ŋina arae ka ŋina ebuni, “Arae ayoŋ Alpa ka Omega” (iŋes atemar Akisyakinet ka Asalunet).

⁹Ayoŋ Yoana lokaato kus ikimori kaapei ka iyes atitinyikinit ŋican ŋulu eryamunito ŋituŋa ŋulu erae ŋulu ka Apukan a Yesu. Abu oyakaun loculat ŋolo ka anam ŋolo enyaritae Patimos aŋuna a ŋakiro a ŋuna ka Akuj ka aŋuna ka akiteyenunet a ŋina a Yesu.

¹⁰Anakoloŋit a ŋina ke Ekapolon, abu apedor ŋina ke Etau a ŋolo Asegan min neni kaŋ, abu eira etoil alokaku kaŋ ŋolo ereta ikwa arupepe.

¹¹Tolimu ebe, “Kigir ibore ŋini iŋolikini iyoŋ daadaŋ lokitaabo, ido kiyakiya natukon ŋunakanikaarei ŋuna a Ŋikristo alo Epeso, Simirina, Perigamo, Tyatira, Sardis, Piladelipia ka Laodikeya.”

¹²Abu oboboŋ akiŋolikin ŋini erworo neni kaŋ, oanyuwa ŋawuoeta a ŋitaae ŋakanikaarei ŋuna etiyaunitae a egolid.

¹³Alokidiŋ ŋawuoeta ŋun ayai ŋini ekoni ituŋanan, ŋini anapit elou ŋolo aoyan, ŋolo adolit kwap ŋakejen keŋ ka tonapite alokore keŋ arokoba ŋina etiyaunitae a egolid.

¹⁴Akwaŋ akou ka ŋitim keŋ ikwa ŋajul ŋuna ka amesek a ŋina akwaŋan kya kori ikwa ŋakako; ekote ŋakeekonyen arira ŋina ka akim.

¹⁵Acayete ŋakejen keŋ ikwa asuwat ŋina epwasitae ka erurumae etoil keŋ ikwa ŋakipi ŋuna ipumasi.

¹⁶Anakan keŋ a ŋina aloteten, adakit ŋikacer ŋikanikaarei; anakituk keŋ, tolomu atum ŋina akwaka ŋiwaetin daadaŋ. Acai ereet keŋ ikwaŋina ecaya akoloŋ kidiŋ apaaran.

¹⁷Ŋinapei eŋolikinia ayoŋ iŋes, abu oramakin nakejen keŋ ekok ituŋanan ŋini atwan. Abu nai iŋes kiwuak akan keŋ ŋina aloteten neni kaŋ tema, “Nyikuryaniar! Arae ayoŋ ŋolo Eŋarenon ka ŋolo Esidyon.

¹⁸Arae ayoŋ ŋolo ayari; abu ayoŋ otwana, nai tokona ayari ŋikaru ka ŋikaru! Ayoŋ epukat atwanare ka akwap ŋina a ŋikatwak.

¹⁹Aŋun, kigir tokona ŋuna daadaŋ iŋolik iyoŋ, ameun ŋuna itiyakin tokona ka ŋuna itiyakin tari rwanu.

²⁰Apolou ŋina a ŋikacer a ŋulu ŋikanikaarei a ŋulu ite iyoŋ, anakan kaŋ a ŋina aloteten ka ŋina a ŋawuoeta a ŋitaae a ŋuna itiyaunitae a egolid iŋes na: erae ŋikacer ŋulukanikaarei ŋimalaikan ŋulu a ŋatukon a Ŋikristo a ŋunakanikarei ka erae ŋawuoeta ŋunakanikaarei ŋatukon ŋunakanikaarei.”