Read ngakarimojong Akis. 10 Bible Online

Akis. 10 - ngakarimojong bible

Akis. 10

¹Abu nabo ayoŋ oanyuwa emalaika ŋolo agogoŋon ebunit anakuj. Anapit iŋes edou, kirimokinite alokakinet akou keŋ, kikoni ereet keŋ akoloŋ, kikote ŋakejen keŋ arira ŋina eremit kidiama.

²Ayai nakan keŋ ekitaabo ŋolo adit ŋolo aŋaara. Abu kiwuak akeju keŋ ŋina aloteten nanam ka ŋina alokedyen kwap,

³kiworou a etoil a ŋolo apolon ikwa ŋolo ke eŋatuny irurumae; ani kiworou, torukis ŋagirokineta ŋunakanikaarei.

⁴Ani keruut ŋagirokineta ŋunakanikaarei ŋun adikino ayoŋ egirakini, nai abu eira etoil anakuj ebala, “Kipuca ŋakiro ŋuna alimut ŋagirokineta ŋunakanikaarei, nyigirak ikes!”

⁵Abu emalaika ŋolo aris ayoŋ keŋolik ewuoi ananam ka akwap kikyaa akan keŋ ŋina aloteten nakuj.

⁶Abu iŋes kikoŋ alokiro ka Akuj a ŋina eyari ŋikaru ka ŋikaru, a ŋina asubuni nakuj, akwap, anam ka ibore daadaŋ ŋini eyai tooma kec; tema, “Emam nabo apaki ace ŋina idaryo.”

⁷Nai, ani ekutakini emalaika ŋolo a ŋikanikaarei arupepe keŋ, irikakini Akuj ŋakiro ŋuna ka akimunono ŋuna elosikinit iŋes akitiya, ikwaŋinapei alimokinitor ŋikadwarak ŋulu erae ŋiketiyak keŋ.

⁸Abu nabo etoil ŋolo sek eirarit ayoŋ irworo anakuj okolimok ayoŋ tema, “Ape tolema ekitaabo ŋolo eŋaara ŋolo eyai nakan ŋina ke emalaika a ŋolo ewuoi ananam ka anakwap.”

⁹Abu ayoŋ olot neni ke emalaika, eŋit iŋes ainakin ayoŋ ekitaabo ŋol. Abu iŋes okolimok ayoŋ tema, “Tolema tonyam; edwariar anakook kon, nai eboboor anakituk kon ikwa akimyet ŋina ka ao.”

¹⁰Abu ayoŋ ejau ekitaabo ŋolo adit ŋol anakan keŋ onyam, toboboor iŋes anakituk kaŋ ikwa akimyet ŋina ka ao. Nai ani kadau ayoŋ akilikor, abu todwaryar anakook kaŋ.

¹¹Aponi nai okolimokin ayoŋ temarae, “Itemokino iyoŋ nabo todwar ŋakiro ŋuna ka Akuj ŋuna ikamunito ŋakwapin, ŋibukui, ŋaŋajepa ka ŋirwosi.”