Read ngakarimojong Akis. 11 Bible Online

Akis. 11 - ngakarimojong bible

Akis. 11

¹Aponi nai okoinakin ayoŋ ebela ŋolo ekoni asuwat ŋina kipimet, ido okolimokin temarae, “Ape kipim Akai ŋina ka Akuj ka Namuroet, kimar ŋituŋa ŋulu ilipete alotooma Akai.

²Nai, nyipim ŋibarasanin, anerae einakinitae ikes lotuŋa ŋulu nyerae Ŋiyudayan ŋulu ipudaarete etaun ŋolo ka Akuj ŋilapyo ŋatomoniomwon ka ŋiarei.

³Eyakuuni ayoŋ ŋikadwarak kaŋ ŋuluarei enapito ŋiguniyae, elimonokinete ikes ŋakiro ŋuna ka Akuj alorwa a ŋulu ka apeiliput a ŋamiae ŋaarei ka ŋatomonikanikapei.”

⁴Erae ŋikadwarak ŋuluarei ŋul ŋikito ŋiarei ŋulu enyaritae Olipa ka ŋitaae ŋiarei ŋulu ewuasi alokiŋaren Ekapolon ŋolo ka akwap.

⁵Ani kikatak idiotuŋanan akiwan ikes, elomuni akim anakituka kec, toar ŋimoi kec; ikwaŋinapei, ŋini daadaŋ ikatakini akiwan ikes, earyo.

⁶Eyakatar ikes apedor ŋinagolyet adis, ikotere nyilim akiru apaki ŋina elimonokiniata ikes ŋakiro ŋuna ka Akuj. Eyakatar ikes tari apedor lolelyan ŋulu a ŋakipi akituluwor ikes ŋaokot; eyakatar ikes tari apedor ŋinakisicanet akwap a ŋakisicaneta a daadaŋ ŋapakio daadaŋ ŋuna ecamitotor ikes.

⁷Ani kedaut ikes alimonokin ŋakiro kec, elomuni etyaŋ anakipany a ŋina aoyan a ŋina nyesalunit alokwap akitijiyore ikes. Ilouni iŋes ikes ka toar,

⁸ido topero ŋawat kec alorukude a ŋolo ke etaun a ŋol, neni ebubukinitoe Ekapolon kec. Isikwaanitae ekiro ŋolo ke etaun a ŋol ka Sodoma kori Ijipit.

⁹Epote ŋituŋa a ŋakwapin, a ŋikabilae, a ŋaŋajepa ka a ŋibukui a daadaŋ aanyun ŋawat kec ŋirwa ŋiuni ka atutubet ka nyecamakinete ikes tonukae.

¹⁰Elakarosi ŋituŋa a ŋakwapin aŋuna ka atwanare a ŋuluarei a ŋul. Imomworete ikes ka kiyakiyanakinos ŋainakineta, anerae apotu ŋikadwarak ŋul yaut ŋican lotuŋa.

¹¹Ani kelunyarosi ŋirwa ŋiuni ka atutubet, bu ekiaŋanu ŋolo ka akiyar aneni ka Akuj, toloma neni kec, ido tonyout, tobul ŋituŋa daadaŋ ŋulu apotu toanyuwasi ikes.

¹²Apotu ŋikadwarak ŋuluarei ŋul kiirasi etoil ŋolo apolon anakuj ebala neni kec, “Potu nege!” Apotu toloto nakuj alotooma edou iteete ŋimoi kec.

¹³Anapaki a ŋinapei a ŋin, toyakaun amaran ŋina ka akwap ŋina aronon; abu atutubet apei alotooma ŋunatomon ŋuna ke etaun a ŋolo apolon toritakin, totwaka ŋituŋa ŋalipyo ŋakanikaarei. Tobul ŋituŋa ŋuluce, kipuro apedor ŋina ka Akuj a ŋina anakuj.

¹⁴Alunyar ŋican ŋulu a ŋiarei, nai eponito ŋican ŋulu a ŋiuni atipei!

¹⁵Abu nai emalaika ŋolo a ŋikanikaarei tokutak arupepe keŋ. Toyakaunos ŋitoilon ŋulu acelasi anakuj ebasi, “Tokona, erae apedor ŋinakipukaet akwap ŋina ke Ekapolon yok ka ŋina a Kristo keŋ, ipukae iŋes ŋikaru ka ŋikaru!”

¹⁶Apotu nai ŋikatukok ŋulutomoniarei ka ŋiomwon ŋulu iboiyete alokicoloŋo kec alokiŋaren Akuj toramakinos kwap, kijuuroto kilipa neni ka Akuj

¹⁷ebasi, “Ekapolon Akuj ŋina etiron, ŋina erae ka ŋina arae! Ikitalakarit isua iyoŋ aŋuna isitiyaa apedor ŋina apolon ka isyak daŋ akipuka.

¹⁸Apotu ŋituŋa ŋulu nyenupito Akuj tonyunyura, anerae adolu apaki ŋina ka anyunyura kon, apaki ŋina etubokinere ŋikatwak. Adolu apaki ŋina eropere ŋiketiyak, ŋikadwarak ka ŋituŋa kon daadaŋ ŋulu ikikerito iyoŋ, ŋulu arwok ka ŋulu caryo kaapei. Adolu apaki ŋinamunyaret ŋulu enyasak akwap!”

¹⁹Aponi toŋaarae Akai ka Akuj anakuj, totakanu Asaduku ŋina ka Acamunet. Toyakaun akimilyaa, ŋitoilon, agiro ŋina ereta, amaran ŋina ka akwap ka ŋakako ŋuna apolok.