Read ngakarimojong Akis. 16 Bible Online

Akis. 16 - ngakarimojong bible

Akis. 16

¹Abu nai eira etoil ŋolo apolon alo Kai ka Akuj irworo neni a ŋimalaikan a ŋulukanikaarei ebala, “Toloto, tobukosi nakwap anyunyura ŋina ka Akuj anabakulei a ŋunakanikaarei!”

²Abu emalaika ŋolo ke ekiŋaren tolot, tobukok anyunyura ŋina anabakule keŋ nakwap. Apotu ŋajemei ŋuna aronok nooi ŋuna apipilak pena lotuŋa ŋulu ayakatar emacar ŋolo ke etyaŋ ka neni a ŋulu elipete neni ke etorube keŋ.

³Abu emalaika ŋolo a ŋiarei tobukok anyunyura ŋina ka Akuj anabakule keŋ nanam. Apotu ŋakipi kikokis ŋaokot a ituŋanan a ŋini atwan ka totwaka ŋisubuna daadaŋ ŋulu ayakasi nanam.

⁴Abu emalaika ŋolo a ŋiuni tobukok anyunyura anabakule keŋ naŋololin ka lolelyan. Apotu ŋakipi toruworos ŋaokot.

⁵Eira emalaika ŋolo apolokinit ŋakipi ebala neni ka Akuj, “Itubok iyoŋ iyookino, iyoŋ ŋina Asegan, ŋina irae ka ŋina arae!

⁶Apotu ikes tobukonosi ŋaokot ŋuna a ŋituŋa ka Akuj ka ŋuna a ŋikadwarak, aŋun, itamat iyoŋ ikes ŋaokot. Aryamut ikes ŋuna itemokino ikes toryamut.”

⁷Abu eira etoil a Namuroet ebala, “Ekapolon Akuj ŋina etiron! Iyookino kire ŋuna itubi iyoŋ!”

⁸Abu emalaika ŋolo a ŋiomwon tobukok anyunyura ŋina ka Akuj anabakule keŋ nakoloŋ ka aponi tocamakinae akinom ŋituŋa ka amwanis keŋ a ŋina arirae.

⁹Aponi kicunyae ikes ka amwanis a ŋina arirae. Kiceno ikes ekiro ŋolo ka Akuj, a ŋina arae iŋes eyakuunit ŋakisicaneta ŋun daadaŋ. Nai apotu nyekiwa akitiya ŋasecisya ka apotu nyipuro ka nyitopoloosi Akuj.

¹⁰Tobukok emalaika ŋolo a ŋikan anyunyura ŋina ka Akuj anabakule keŋ lokicoloŋ ŋolo ke etyaŋ. Kiryoniar ebuku ŋolo ke etyaŋ cuc; tokonyokonyata ŋituŋa ŋaŋajepa kec aŋuna aryebatar.

¹¹Kiceno ikes ekiro ŋolo ka Akuj a ŋina eyai nakuj aŋuna ka aryeba ka ŋajemei kec. Nai apotu nyekiwa ŋipitesyo kec ŋulu aronok.

¹²Abu emalaika ŋolo a ŋikanikapei tobukok anyunyura ŋina ka Akuj anabakule keŋ naŋolol ŋina enyaritae Eupurate. Abu aŋolol kijuwa toono deu aŋuna ka akitemokin neni itorete ŋirwosi ŋulu epote alo Kide.

¹³Abu oanyuwa ŋipyan ŋiuni ŋulu ekote ŋakidodoka. Aponito ikes alotooma akituk na ke epiu ka ŋina ke etyaŋ ta ŋina ke ekadwaran a ŋolo alyokonon.

¹⁴Erae ikes ŋipyan ŋulu itiyaete ŋakujuwuanisya. Eloseneneete ikes neni a ŋirwosi a ŋakwapin a daadaŋ acunun ikes lojiye Akoloŋit ŋina apolon ŋina ka Akuj a ŋina etiron.

¹⁵“Ebala Ekapolon, topupokisi! Abuni ayoŋ ikwa ebunio ekokolan! Erereŋ ituŋanan ŋini etenit apaki daadaŋ, ŋini eyakar ŋilowi keŋ diyete, ikotere nyelot iŋes lotuŋa emam ŋilowi kiruma ŋileec!”

¹⁶Apotu ŋitai ŋul tocunakis ŋirwosi neni enyaritae a Ŋaburaniyae Arimagedon.

¹⁷Tobukok emalaika ŋolo a ŋikanikaarei anyunyura ŋina anabakule keŋ lokuwuam. Bu etoil alokicoloŋ alotooma Kai ka Akuj ebala, “Erikakin!”

¹⁸Toyakaun akimilyaa, ŋitoilon, agiro ŋina ereta ka amaran ŋina ka akwap ŋina apolon. Nyetakanuna amaran ŋina ikoni ŋin ŋinapeisubunet ituŋanan, arae ŋin amaran ka akwap ŋina aronon nooi akilo daadaŋ.

¹⁹Totyaka akwap, totyaka etaun ŋolo apolon ŋatyaket ŋauni, kinyasun ŋitaunio ŋulu apolok ŋulu a ŋakwapin a daadaŋ. Abu Akuj totamu Babilon ŋolo apolon nooi ka kitamat iŋes epiini ŋolo ke ekopo keŋ, epiini ŋolo ka anyunyura keŋ.

²⁰Toŋopiyasi ŋiculae daadaŋ, toŋopiyasi ŋimoru daadaŋ;

²¹todout ŋakako ŋuna apolok nooi, ŋuna arae apotis a ŋinakakot ŋakiloi ŋuna edolito ŋatomonikan, todoto ikes kidiama lotuŋa eriŋa ikes icenete Akuj aŋuna ka akisicanet a ŋina a ŋakako, anerae arae ŋin akisicanet ŋina aronon nooi.