Read ngakarimojong Akis. 2 Bible Online

Akis. 2 - ngakarimojong bible

Akis. 2

¹“Kigir neni ke emalaika a ŋolo ka atukot a Ŋikristo alo Epeso atemar: “Erae ŋakiro nu ŋuna eponito aneni a ŋolo edakit ŋikacer ŋikanikaarei anakan keŋ a ŋina aloteten, ka ŋolo elosi alokidiŋ ŋawuoeta a ŋitaae ŋunakanikaarei ŋuna itiyaunitae a egolid.

²Ayeni ayoŋ ŋuna idau iyoŋ akitiya, ayeni ayoŋ epite ŋolo imukekinitor iyoŋ etic ka epite ŋolo ititinyikinitor iyoŋ. Ayeni ayoŋ atemar nyipedori iyoŋ acamakin ŋikaronok, idau iyoŋ akirot ŋulu ebasi ikirae ikes ŋikiyakia, nai nyerae ka iryamu ikes erae ŋikalyokonok.

³Ititiny iyoŋ, iryamu iyoŋ ŋican aŋuna kaŋ ka nyeupa iyoŋ.

⁴Nai eketoroniyarit ayoŋ iyoŋ a ŋakiro a nu: iesik iyoŋ akonimina ŋina paaran sek ikiminar iyoŋ ayoŋ.

⁵Totamatama neni etya aronis ŋina ka akibusokin kon! Toki, kisyak akitiya ŋiticisyo ŋulu sek itiyae iyoŋ ekiŋaren. Ani pa kikii iyoŋ, abuni ayoŋ neni kon alemar awuoet kon ŋina ke etaa aneni sek eyai.

⁶Nai erae nu ŋuna ikitojokito iyoŋ: iŋerit iyoŋ ŋiticisyo a ŋituŋa a ŋulu enyaritae Ŋinikolaitae--ŋiticisyo ŋulu aŋerit ayoŋ daŋ.

⁷“Iŋes ŋini eya ŋaki, kiira ŋuna irworo Etau natukon ŋuna a Ŋikristo! “Iŋes ŋini ilouni, ainakini apedor ŋinakimujet arait ŋina ke ekitoe a ŋolo ka akiyar, a ŋolo eyai lomanikor ŋolo ka Akuj.”

⁸“Kigir neni ke emalaika a ŋolo ka atukot a Ŋikristo alo Simirina atemar: “Erae ŋakiro nu ŋuna eponito aneni a ŋolo erae ŋolo Eŋarenon ka ŋolo Esidyon, ŋolo abu totwan ka toyaru nabo.

⁹Ayeni ayoŋ ŋatyokisyo kon ka ayeni ayoŋ atemar ikulyakana iyoŋ, nai kire ibarit! Ayeni ayoŋ tari ŋuna aronok ŋuna ikirworotor iyoŋ ŋituŋa ŋulu ebasi ebe ikirae ikes Ŋiyudayan, nai nyerae; eraakasi ikes atukot ŋina a Satan!

¹⁰Nyikuryaniar aŋuna a ŋican a ŋulu eapi iyoŋ aryamun. Topupok! Eapi Satan acunakin ŋice alokidiŋ kus mabus, ikikatak iyes, ido toryamut akisicanio ŋirwa ŋitomon. Torubak ananupit, erae kedolu atwanare daŋ, ido akainakini ayoŋ iyoŋ akiyar, toruwor eropit.

¹¹“Iŋes ŋini eya ŋaki, kiira ŋuna irworo Etau natukon ŋuna a Ŋikristo! “Iŋes ŋini ilouni, nyeari atwanare ŋina a ŋaarei iŋes.

¹²“Kigir neni ke emalaika a ŋolo ka atukot a Ŋikristo alo Perigamo atemar: “Erae ŋakiro nu ŋuna eponito aneni a ŋolo eyakar atum ŋina ekwaka ŋiwaetin daadaŋ.

¹³Ayeni ayoŋ neni iboiyo iyoŋ; erae neni ipukat Satan. Nai irubakinit iyoŋ ikinupit ayoŋ, ibu iyoŋ nyiŋer anupit ayoŋ tari alorwa a ŋulu aarere Antipa, esuuda kaŋ ŋolo anupit nooi aina, anakwap a ŋina iboiyo Satan.

¹⁴Nai eketoroniyarit ayoŋ iyoŋ a ŋakiro a ŋadi a nu: “Eyakasi kidiŋ kus ŋituŋa ŋice ŋulu etupito akitatam ŋina ke ekile a ŋolo enyaritae Balaam, a ŋolo koloŋ abu kitatam ekile ŋolo enyaritae Balak akicocoiyar Ŋisirael nasecit anakitanyam ŋamuja ŋuna ainakinitae ŋakujo ka akitiya amalao.

¹⁵Ikwaŋinapei, eyakasi kidiŋ kus ŋituŋa ŋulu etupito akitatam ŋina a ŋituŋa a ŋulu enyaritae Ŋinikolaitae.

¹⁶Toki nai tokona! Ani pa kikii, abuni ayoŋ neni kon atipei akitijiyore iyoŋ ka atum a ŋina elomuni anakituk kaŋ.

¹⁷“Iŋes ŋini eya ŋaki, kiira ŋuna irworo Etau natukon ŋuna a Ŋikristo! “Iŋes ŋini ilouni, ainakini Manna adio ŋina iwuaitae. Ainakini nabo ayoŋ iŋes amoru ŋina akwaŋan ŋina igiritae ekiro ŋolokitete, ŋolo emam ituŋanan eyeni, mati ŋini einakinio amoru ŋin.

¹⁸“Kigir neni ke emalaika a ŋolo ka atukot a Ŋikristo alo Tyatira atemar: “Erae ŋakiro nu ŋuna a Lokoku ka Akuj, a ŋolo ikote ŋakonyen arira ŋina ka akim ka ŋolo ecayete ŋakejen keŋ ikwa asuwat ŋina epwasitae.

¹⁹Ayeni ayoŋ ŋiticisyo kon, amina kon, anupit kon, akijaanakin kon, atitinyu ŋina nyibunyakina ka ayeni atemar iloito ŋiticisyo kon ŋulu a tokona ŋulu paaran ke ekiŋaren.

²⁰Nai eketoroniyarit ayoŋ iyoŋ a ŋakiro a nu: “Icamakinit iyoŋ aberu ŋina enyaritae Yesabel, ŋina ebala ebe arae iŋes akadwaran. Anakitatam keŋ, ecocoiya ŋiketiyak kaŋ, aya akitiya amalao ka akinyam ŋamuja ŋuna einakinitae ŋakujo ŋace.

²¹Abu ayoŋ oinak iŋes apaki ŋina kiet, nai ewounit iŋes akiki amalao.

²²Aŋun, emasakini ayoŋ iŋes ka ŋulu elomete ka iŋes, lokitaada neni eryamuniata ŋican ŋulu apipilak. Etiyakini ayoŋ ŋun tokona, mati kekiwa ikes ŋuna aronok ŋuna etiyaete ikes ka iŋes.

²³Aari ayoŋ ŋikeedwe, ikotere toanyuniata ŋatukon ŋuna a Ŋikristo daadaŋ atemar ayoŋ iŋes ŋolo ayeni ŋitai ka ŋatameta ŋuna a ŋinituŋanan ka aropi ayoŋ ŋinituŋanan ikwaŋina itiyator.

²⁴Nai iyes ŋice alo Tyatira, nyetupa iyes akitatam ŋina aronon ŋin, nyeyenuna iyes ŋuna ebasi ŋice erae akimunono ŋina apolon ŋina a Satan. Abala ayoŋ neni kus: nyakainakini ayoŋ iyes etic ece;

²⁵nai torubakisi iricito anupit ŋina iyakatar iyes, akitodol ŋina abunio ayoŋ.

²⁶“Iŋes ŋini ilouni ka kiricak ŋakiro kaŋ akitodol nasalunet, ainakini ayoŋ iŋes apedor ŋinakipukaet ŋakwapin.

²⁷Ipukae iŋes ikes ka aryenyeo, kinyas ikes ikwa ŋamoti ŋuna ebwaŋabwaŋaaryo, ikwapei akainitor ayoŋ Papa kaŋ apedor.

²⁸Ainakini daŋ ayoŋ iŋes etop ŋolo ka ataparacu.

²⁹“Iŋes ŋini eya ŋaki, kiira ŋuna irworo Etau natukon ŋuna a Ŋikristo.