Read ngakarimojong Akis. 3 Bible Online

Akis. 3 - ngakarimojong bible

Akis. 3

¹“Kigir neni ke emalaika a ŋolo ka atukot a Ŋikristo alo Sardis atemar: “Erae ŋakiro nu ŋuna eponito aneni a ŋolo eyakar ŋitai ŋulu ka Akuj ŋulukanikaarei ka ŋikacer ŋulukanikaarei. Ayeni ayoŋ ŋiticisyo kon; itakani iyoŋ iyari, nai itwanit.

²Aŋun, tokienyu, kitogogoŋ ŋuna idoŋito eriŋa ikes nyetwaka.

³Totamu nai ŋuna aponi ikitatami ka ikisiirar iyoŋ, kiricak ikes ka toki! Ani pa kikienyu iyoŋ, abuni ayoŋ neni kon ikwa ekokolan ka nyiyeni iyoŋ apaki ŋina abunio ayoŋ.

⁴Nai eriŋa iyoŋ iyakar ŋituŋa ŋidi Sardis ŋulu nyitooŋoryana ŋilowi kec ka asecit. Epote ikes akiruk ka ayoŋ enapito ŋilowi ŋulu akwaŋak, anerae itemokino ikes ikokinete nen.

⁵“Iŋes ŋini ilouni, itanapyo ŋilowi ŋulu akwaŋak ikwa ikes, ka nyekisari ayoŋ ekeekiro alokitaabo a ŋolo ka akiyar; nai alimori ayoŋ ekiro keŋ alokiŋaren Papa kaŋ ka ŋimalaikan keŋ.

⁶“Iŋes ŋini eya ŋaki, kiira ŋuna irworo Etau natukon ŋuna a Ŋikristo.

⁷“Kigir neni ke emalaika a ŋolo ka atukot a Ŋikristo alo Piladelipia atemar: “Erae nu ŋakiro ŋuna eponito aneni a ŋolo Asegan ka ŋolo erae kire, ŋolo eyakar ekipuŋguwo ŋolo ka apedor ŋina a Daudi; ekek ŋolo eŋaari iŋes, emam ŋini epedori agolokin ka ekek ŋolo egolokini iŋes, emam ŋini epedori aŋaar.

⁸Ayeni ayoŋ ŋiticisyo kon. Kiira! Ewuak ayoŋ kiŋaren kon ekek ŋolo eŋaara ŋolo emam ŋini epedori agolokin. Ayeni ayoŋ atemar iyakar iyoŋ agogoŋu ŋinadio edit, nai iricit iyoŋ akirot ka nyieŋero iyoŋ anupit ayoŋ.

⁹Kiira! Ayauni ayoŋ neni kon atukot ŋina a Satan, ŋikalyokonok ŋulu ebasi ikirae Ŋiyudayan, nai nyerae. Ayauni ikes eteryedik alokiŋaren kon, ikotere eyenunete atemar akamina ayoŋ iyoŋ.

¹⁰Aŋuna iricakinia iyoŋ akirot kaŋ ŋina ikicikak iyoŋ atitinyu ŋina nyikirikira, ekeuryari ayoŋ iyoŋ apaki ŋina ka akikatakino ŋina ebunit nakwapin daadaŋ akikatakin ŋulu iboiyete anakwap.

¹¹Abunit ayoŋ atipei. Torubak iricit anupit ŋina iyakar iyoŋ, ikotere nyikidema iyoŋ icetuŋanan eropit ŋolo ka akiloun.

¹²“Iŋes ŋini ilouni, eturuwori ayoŋ iŋes epir alo Kai ka Akuj kaŋ; nyelomuni nabo iŋes kiŋa jik. Egirakini ayoŋ neni keŋ ekiro ŋolo ka Akuj kaŋ ka ekiro ŋolo ke etaun a ŋolo apolon, Yerusalem ŋolokitete, ŋolo ebunit anakuj aneni ka Akuj kaŋ; egirakini daŋ ekiro kaŋ ŋolokitete neni keŋ.

¹³“Iŋes ŋini eya ŋaki, kiira ŋuna irworo Etau natukon ŋuna a Ŋikristo.

¹⁴“Kigir neni ke emalaika a ŋolo ka atukot a Ŋikristo alo Laodikeya atemar: “Erae ŋakiro nu ŋuna eponito aneni a ŋolo enyaritae Amen, esuuda ŋolo ikinyomitae ka ŋolo a kire ŋolo erae akisyakinet ŋina a ŋisubuna ka Akuj.

¹⁵Ayeni ayoŋ ŋiticisyo kon: nyililim iyoŋ ka nyimwana daŋ. Okoe, kitemokino iyoŋ tolilim kori tomwana!

¹⁶Nai aŋuna ijalamya, nyililimyo kori nyimwania, akalekuni ayoŋ iyoŋ anakituk kaŋ.

¹⁷Anerae ibala iyoŋ, ‘Abarit, ayakar ibore daadaŋ ka emam ibore eitanit.’ Nai nyiyeni iyoŋ atemar icana, irae ekaŋipapan, ekulyakit, emudukanot ka ileri.

¹⁸Aŋun, akalimokini ayoŋ iyoŋ, togyelu egolid aneni kaŋ, egolid ŋolo eliitae ka akim, ikotere tobar. Togyelu daŋ ŋilowi ŋulu akwaŋak, ikotere torapya ŋileec kon ŋulu ileryo. Togyelu tari ekitoe ŋolo a ŋakonyen kon, ikotere tokienyu.

¹⁹Eyayakini ka esicani ŋulu amina ayoŋ; aŋun, tomwakutu tokiwa!

²⁰Kiira! Awuoi ayoŋ alokek, ekoŋikoŋi. Ani kiira ituŋanan etoil kaŋ, ido toŋaa ekek, alomuni ayoŋ neni keŋ, emuja ka iŋes ka ikimuji iŋes ka ayoŋ.

²¹Iŋes ŋini ilouni, ainakini apedor, akiboikin ka ayoŋ lokicoloŋ kaŋ, ikwapei abunio ayoŋ daŋ elounia eboikinotor ka Papa kaŋ lokicoloŋ keŋ.

²²“Iŋes ŋini eya ŋaki, kiira ŋuna irworo Etau natukon ŋuna a Ŋikristo.”