Read ngakarimojong Akis. 6 Bible Online

Akis. 6 - ngakarimojong bible

Akis. 6

¹Abu eŋolik Imesek eŋaari akipucet ŋina esyaunan a ŋunakanikaarei. Abu eira epei alosubuna a ŋuluomwon elimuni a etoil a ŋolo acela ikwa agirokinet ebala, “Bua!”

²Abu eŋoliya oanyuwa aŋole ŋina akwaŋan. Ayakar ekameton keŋ akau ŋina a ŋikaleŋeleŋe ka aponi inakinae iŋes ebokot. Abu nai iŋes torotok iloununui ka ikotere ilounia.

³Ani eŋaari Imesek akipucet ŋina a ŋaarei, eira esubuna ŋolo eyari ŋolo a ŋiarei ebala, “Bua!”

⁴Tolomu aŋole ace ŋina areŋan. Aponi inakinae ekameton keŋ apedor ŋina lemaret ekisil anakwap, ikotere toaras ŋituŋa make. Aponi inakinae iŋes atum ŋina apolon.

⁵Ani eŋaari Imesek akipucet ŋina a ŋauni, eira esubuna ŋolo eyari ŋolo a ŋiuni ebala, “Bua!” Abu eŋoliya oanyuwa aŋole ŋinakiryonon, ayakar ekameton keŋ ŋaratilio nakan keŋ.

⁶Abu eira ibore ŋini erworo ikwa etoil ŋolo ebunit alosubuna a ŋuluomwon ebala, “Einakinio apeikilo ŋina a ŋaganoi ka ŋakiloi ŋauni ŋuna ke ekidikidi aŋuna ke etic a ŋolo ka apeikoloŋit. Nai nyinyas ŋikito ŋulu ka akimyet ka ŋimanikorin ŋulu ke epiini!”

⁷Ani eŋaari Imesek akipucet ŋina a ŋaomwon, eira esubuna ŋolo eyari ŋolo a ŋiomwon ebala, “Bua!”

⁸Ani eŋoliyari, oanyuwa aŋole ŋina nyaŋaliban; anyaritae ekiro ke ekameton aŋole ŋin Atwanare, totupite akwap ŋina a ŋikatwak iŋes. Aponi inakinae ikes apedor ŋinakipukaet atutubet ŋina a ŋaomwon ŋina ka akwap, akiar alotooma ejiye ka eron ka edeke ka ŋityaŋ ŋulu adedeŋak.

⁹Ani eŋaari Imesek akipucet ŋina a ŋakan, abu eŋolik alokwap Namuroet ŋitai a ŋituŋa a ŋulu kearyo aŋuna ka alimonokin ŋakiro ŋuna ka Akuj ka aŋuna ka araakau ŋisuudae keŋ ŋulu ikinyoma.

¹⁰Apotu ŋitai ŋul kiworout a etoil a ŋolo apolon temasi, “Ekapolon ŋolo etiron, ŋolo Asegan ka ŋolo a kire! Apaki mono ŋina etya ai iyai iyoŋ eriŋa nyebuno atubokin ŋituŋa ŋulu ka akwap, ido kisican ikes aŋuna ikiaryata isua?”

¹¹Aponi inakinae ikes ŋikaasoi ŋulu akwaŋak ka tolimokinae ikes akieŋun adiopaki akitodol ŋina itemokinor ekimar a ŋirukitos kec alotic ka Akuj ka ŋikaitotoi daadaŋ ŋulu earyo, ikwaŋina aarere ikes.

¹²Ani eŋaari Imesek akipucet ŋina a ŋakanikapei, abu oanyuwa akwap emarani nooi ka kiryoniar akoloŋ cuc ikwa ŋatotol, toreŋiar elap puu ikwa ŋaokot.

¹³Tocakunos ŋikacer kwap anadis ikwa ŋaboboryo ŋuna nyekokito ŋuna erarauni ekuwuam ŋolo agogoŋon.

¹⁴Toŋopya adis kikok akaratas ŋina ebilakinio ka aponi kisiyotoroe ŋimoru ka ŋiculata ŋulu ka anam aneni sek eyakasi.

¹⁵Apotu ŋirwosi ŋulu ka akwap, ŋikepukak ka ŋikapolokinitok ŋasigarya, ŋikabarak, ŋikagogoŋok ka ŋituŋa ŋuluce daadaŋ, ŋipi, ka ŋulu nyerae ŋipi, toduka anaturukanin ka anatabab alokidiama ŋimoru.

¹⁶Temasi ikes neni a ŋimoru ka ŋatabab, “Tocakunos kare ca neni kosi ikiwua anakonyen a ŋolo iboi alokicoloŋ ka ananyunyura a ŋina a Imesek!

¹⁷Anerae adolu Akoloŋit ŋina ka anyunyura kec, ŋae epedori akidaŋidaŋ?”