Read ngakarimojong Akis. 7 Bible Online

Akis. 7 - ngakarimojong bible

Akis. 7

¹Kelunyar ŋun, abu oanyuwa ŋimalaikan ŋuluomwon ewuasi alowaetin a ŋuluomwon ka akwap, iretakinito ŋikuwuamin ŋuluomwon ŋulu ka akwap, ikotere nyekutakis akwap kori anam kori ediokitoe.

²Oanyuwa nabo emalaika ece ebunit alo Kide eyakar emacar ŋolo ka Akuj a ŋina eyari. Tonyara iŋes a etoil a ŋolo apolon ŋimalaikan ŋuluomwon ŋulu ainakinitae apedor akiwan akwap ka anam.

³Tolimok iŋes ikes tema, “Nyiwan akwap kori anam kori ŋikito akitodol ŋina ikiwuakinia ŋimacarin loreetin a ŋulu erae ŋiketiyak ŋulu ka Akuj yok.”

⁴Abu eira ayoŋ ekimar a ŋituŋa a Isirael ŋulu eyakatar emacar ŋolo ka Akuj loreetin kec; arae ikes ŋalipyo amiat ka ŋatomoniomwon ka ŋiomwon. Arae ikes ŋulu a ŋikabilae a ŋulutomon ka ŋiarei a ŋulu a Isirael:

⁵ŋulu amacaritae anateker a Yuda, arae ŋalipyo ŋatomon ka ŋaarei; ŋulu anateker a Ruben, arae ŋalipyo ŋatomon ka ŋaarei; ŋulu anateker a Gad, arae ŋalipyo ŋatomon ka ŋaarei;

⁶ŋulu anateker ka Aser, arae ŋalipyo ŋatomon ka ŋaarei; ŋulu anateker a Naputali, arae ŋalipyo ŋatomon ka ŋaarei; ŋulu anateker a Manase, arae ŋalipyo ŋatomon ka ŋaarei;

⁷ŋulu anateker a Simeon, arae ŋalipyo ŋatomon ka ŋaarei; ŋulu anateker a Lepi, arae ŋalipyo ŋatomon ka ŋaarei; ŋulu anateker a Isakar, arae ŋalipyo ŋatomon ka ŋaarei;

⁸ŋulu anateker a Sebulon, arae ŋalipyo ŋatomon ka ŋaarei; ŋulu anateker a Yosepu, arae ŋalipyo ŋatomon ka ŋaarei; ŋulu anateker a Benjamin, arae ŋulu daŋ ŋalipyo ŋatomon ka ŋaarei.

⁹Ani kelunyar ŋun, abu oanyuwa asepic a ŋituŋa a ŋulu pa apedori idiotuŋanan akimarun. Arae ikes ŋulu a ŋibukui, a ŋikabilae, a ŋakwapin ka a ŋaŋajepa a daadaŋ. Apotu ikes towua alokiŋaren ekicoloŋ ŋolo a Imesek; tonapito ŋilowi ŋulu akwaŋak ka toyakatar ŋaten ŋuna a ŋaŋolya nakan kec.

¹⁰Tocelas a ŋitoilon a ŋulu apolok ebasi, “Ebunit aiuno aneni ka Akuj yok a ŋina iboi alokicoloŋ ka aneni a Imesek!”

¹¹Towua nai ŋimalaikan daadaŋ irimokinito ekicoloŋ, ŋikatukok ka ŋisubuna ŋulu eyarete ŋuluomwon, toramakinos kiŋaren ekicoloŋ, kijuuroto kilipa neni ka Akuj

¹²ebasi, “Amen! Akipuro, apolou, aosou, akitalakanar, akerit, apedor ka agogoŋu toyakas neni ka Akuj ŋikaru ka ŋikaru! Amen!”

¹³Abu ekatukon epei ekeŋit ayoŋ tema, “Ataŋae ŋituŋa lu ŋulu enapito ŋikaasoi ŋulu akwaŋak ka ai eponitotor ikes?”

¹⁴Abu ayoŋ oboŋok iŋes otema, “Ekapolon, iyoŋ iyeni.” Okolimok iŋes ayoŋ tema, “Erae ŋituŋa lu ŋulu adaut akitorun nakisicanio ŋina aronon nooi, elotasi ikes ŋikaasoi kec ka etokwaŋut kya a ŋaokot a ŋuna a Imesek.

¹⁵Erae ŋakiro ŋun ewuatar ikes alokiŋaren ekicoloŋ ŋolo ka Akuj ka kitiyaete Kai keŋ apaaran ka akuwar. Iŋes ŋolo iboi alokicoloŋ iuryari ikes aŋuna ka ayakau keŋ.

¹⁶Emam nabo jik nyenyami ikes akoro kori akure; nyenomi ikes akoloŋ kori acemwanis.

¹⁷Anerae eruwor Imesek ŋini alokidiŋ ekicoloŋ ekeyokon kec. Itenari ikes lolelyan ŋulu a ŋakipi a ŋuna ka akiyar ka emyetari Akuj ŋakiyo anakonyen kec.”