Read ngakarimojong Akis. 8 Bible Online

Akis. 8 - ngakarimojong bible

Akis. 8

¹Ani eŋaari Imesek akipucet ŋina a ŋakanikaarei, kililiŋ nakuj cek ŋadakikae ŋuna aapiyarito ŋatomoniuni.

²Abu nai oanyuwa ŋimalaikan ŋulukanikaarei ŋulu ewuasi alokiŋaren Akuj, aponi inakinae ikes ŋarupepe ŋakanikaarei.

³Abu emalaika ece ŋolo ayakar abakule ŋina etiyaunitae a egolid, ŋina ecunyeneneere eminae ŋolo ke ekinyate, bu towo alokiŋaren Namuroet. Aponi inakinae iŋes eminae ŋolo ke ekinyate ŋolo alalan, kimorikin ka ŋakilipasinei ŋuna a ŋituŋa a ŋulu ka Akuj a daadaŋ, ya Namuroet ŋin ŋina etiyaunitae a egolid ŋina ayai kiŋaren ekicoloŋ.

⁴Tolot apuru ŋina ke ekinyate ka ŋakilipasinei ŋuna a ŋituŋa a ŋulu ka Akuj kidiama anakan a ŋina ke emalaika a ŋolo awuoi alokiŋaren Akuj.

⁵Abu emalaika tolemu abakule, kilelebik akim ŋina Namuroet, kimasu nakwap. Totakanu agiro ŋina ereta, ŋitoilon, akimilyaa ka amaran ŋina ka akwap.

⁶Totena ŋimalaikan ŋulukanikaarei ŋulu ayakatar ŋarupepe ŋunakanikaarei akutakin ŋarupepe kec.

⁷Abu emalaika ŋolo esyaunan tokutak arupepe keŋ. Potu ŋakako ka akim inyaluna ka ŋaokot tobukunos nakwap. Tonomiya atutubet apei alotooma ŋunauni ŋuna ka akwap, tonomiya nabo ŋikito daŋ apeitutubet alotooma ŋunauni, ka abu tonomiya ŋinya ŋulu alibak daadaŋ.

⁸Abu emalaika ŋolo a ŋiarei tokutak arupepe keŋ. Aponi ibore ŋini ekoni emoru ŋolo apolon nooi, ŋolo anoki akim, kimasakinae nanam. Abu atutubet apei ŋina ka anam alotooma ŋunauni toruwor ŋaokot bon,

⁹totwana apeitutubet ŋina a ŋisubuna a ŋulu eyarete, a ŋulu eya nanam, alotooma ŋatutubeta ŋunauni ka aponi kinyasunae apeitutubet a ŋameeli alotooma ŋatutubeta ŋunauni.

¹⁰Abu emalaika ŋolo a ŋiuni tokutak arupepe keŋ. Tocakun etop ŋolo apolon nooi enoki ikwa agilae, tocakakin natutubet apei ŋina a ŋaŋololin alotooma ŋunauni ka lolelyan.

¹¹(Anyaritae etop ŋol “Adwaris”.) Abu atutubet apei ŋina a ŋakipi alotooma ŋunauni todwaryar, totwaka ŋituŋa ŋulu alalak aŋuna amasyata ŋakipi ŋun, anerae kepotu todwaryata.

¹²Abu emalaika ŋolo a ŋiomwon tokutak arupepe keŋ. Aponi atutubet apei ŋina ka akoloŋ alotooma ŋunauni kinyasunae; kinyasunae atutubet apei ŋina ke elap daŋ alotooma ŋunauni, kinyasunae atutubet apei ŋina a ŋitopon daŋ alotooma ŋunauni. Aŋun, kiryoniar atutubet apei alotooma ŋatutubeta kec ŋunauni. Aponi kisiryonae atutubet apei alotooma ŋunauni ŋuna ka apaaran; ikwaŋinapei, aponi kisiryonae atutubet apei alotooma ŋunauni ŋuna ka akuwar.

¹³Ani eŋoliyari ayoŋ, abu eira egole ŋolo apori alokidiama ecela a etoil a ŋolo apolon ebala, “Oitakoi! Oitakoi! Erokyarosi ŋakiro ŋuna eryamunete ŋituŋa ŋulu alokwap apaki ŋina eruunioto ŋarupepe ŋuna eapi ŋimalaikan ŋuluuni akutakin!”