Read ngakarimojong Rus. 2 Bible Online

Rus. 2 - ngakarimojong bible

Rus. 2

¹Ayakar Naomi eyenet alokile keŋ, ekekiro Boas. Arae Boas ekile ŋolo anateker a Elimelek ka arae ekabaran ŋolo ayenen nooi.

²Akoloŋit apei tema Rus neni a Naomi, “Kimyekinae ayoŋ olot tokona lomanikor akisokat ŋikinyom alokaku ikaleman ca daadaŋ ŋini ekeŋolikini ayoŋ ekeŋarak.” Tema Naomi neni keŋ, “Nakoku kaŋ, ape.”

³Torotok nai Rus todol lomanikor kisyak akisokat alokaku ŋikalemak. Abu arereŋu min neni a Rus alomar lomanikor a Boas a ŋolo arae ekanateker a Elimelek.

⁴Apaki ŋin, bu Boas alo Betelem, kimala ŋikalemak tema, “Toyai Akuj neni kus.” Toboŋokis ikes temasi, “Ikiterereŋ iyoŋ Akuj.”

⁵Kiŋit Boas neni a esorokit keŋ ŋolo apolokinit ŋikalemak tema, “Ŋina a ŋae asorokit na?”

⁶Toboŋok esorokit ŋolo apolokinit ŋikalemak tema, “Erae iŋes asorokit ŋina arukunete ka Naomi alo Moab.”

⁷Abu asorokit na tema, “Kimyekinae kareca ayoŋ alokaku ŋikalemak esokota alodiyete ŋaeneta, ido abu iŋes bu akisokat ka arubaki ŋinapeitete akitodol tari tokona iŋes eboikinor kai akieŋun iwadio.”

⁸Tema Boas neni a Rus, “Nakoku, nyilot akisokat lomanikorin ŋice, nyikobar alomanikor alo; toruko ka ŋasorok kaŋ.

⁹Itemokino iyoŋ kitee emanikor ŋolo elosete ikes akilem, ido kiwuapak ikes. Adau ayoŋ akicik ŋisorok lu nyikicana iyoŋ. Ani ikinyami akure, tolot tomat aloboro, aneni eokokinito ŋisorok ŋakipi.”

¹⁰Toryedik Rus kijuuru todol ereet kwap, tolimok Boas tema, “Anukiro aryamunia ayoŋ ajokis aneni kon, anerae ikiminak iyoŋ ayoŋ, orae bo ayoŋ agelaanot?”

¹¹Toboŋok Boas iŋes tema, “Adaun alimokin ayoŋ ŋakiro daadaŋ ŋuna itiya iyoŋ neni a tata kon ketwana ekile kon. Ibu iyoŋ kimyek papa kon, toto kon ka akwap ŋina ikidounere iyoŋ, ido ibu nakwap ŋina sek pa iyeni ka aŋorot.

¹²Ikiropi iyoŋ Akuj aŋuna ke etic kon ka irikakini Akuj ŋina a Isirael akirop iyoŋ, Akuj ŋina erae neni keŋ ibu iyoŋ aryamunia aiuno.”

¹³Tolimu Rus tema, “Torubak ikitojokit ayoŋ ekapolon kaŋ, anerae ikisirworiu iyoŋ ayoŋ ka eira etau kaŋ a aketiyan kon ŋuna irwor iyoŋ. Tari daŋ pa karae ayoŋ apei a ŋaketiyak kon.”

¹⁴Ani edoli esaa ŋolokimujet, tolimok Boas Rus tema, “Bua laalo kimuj ŋamugati kilumonok lopiini ŋolo babar.” Abu iŋes bu, kiboikin diye ŋikalemak, kikobak Boas iŋes ŋamugati ŋuna apeitoe, kimuj kimwono topiyanu ŋace.

¹⁵Tosodi tonyou kisyaki akisokat. Tolimok Boas ŋisorok keŋ tema, “Kimyekisi iŋes kisokata tari alodiyete ŋaeneta ŋuna ewaasi, ido nyisuruma iŋes ŋileec.

¹⁶Itemokino iyes daŋ kire nai kiriununut ŋikinyom ŋidi anaeneta kimyekis kisokataya iŋes emam akiretakin.”

¹⁷Kisokata Rus emanikor akitodol eboŋ, ido toramu ŋikinyom ŋulu abu iŋes kisokatau eyapiyarit alalau kec ŋakiloi ŋatomon.

¹⁸Tosodi ya tolot lotaun, kiŋolik tata keŋ akimuj ŋina kebu Rus kisokatau. Tolacu Rus akimuj ŋina sek apiyanuni iŋes inak tata keŋ.

¹⁹Kiŋit tata keŋ Rus tema, “Ai isokataa iyoŋ nakuwar na ka neni a ŋae itiyaa iyoŋ? Toyai arereŋu neni a ŋini abu ikisyon iyoŋ.” Tolimok Rus tata keŋ neni etiyae iŋes tema, “Erae ekiro a ekile a ŋolo etiyae ayoŋ neni keŋ nakuwar na Boas.”

²⁰Tolimok Naomi nateran keŋ tema, “Kiterereŋ Akuj ekile ŋol, anerae nyimuryakina iŋes arimao keŋ neni a ŋulu eyarete ka ŋulu atwaka.” Tema Naomi neni a Rus, “Erae ekile ŋol eyenet yok, epei ŋolo eyakar apedor akiuryar iwon.”

²¹Tema Rus, “Kire jik abu iŋes okolimok ayoŋ atemar kiboi a ne, alodiyete ŋisorok lu, ŋulu ikiyakar ayoŋ, akitodol ŋina irikakiniata akilem emanikor kaŋ daadaŋ.”

²²Tolimok Naomi nateran keŋ tema, “Rus, ejok nooi iyoŋ nakoku kaŋ arukonor iyoŋ ka ŋasorok a Boas, ikotere ŋikilyok nyikican iyoŋ alomanikorin a ŋice.”

²³Aŋun, abu Rus toruko ka ŋasorok a Boas kisokata akitodol neni erikakinor akilem ŋikinyom ŋulu ekote erau ka ŋaganoi, ido torubak Iŋes iboiyete ka tata keŋ.