Read ngakarimojong 1 Sam. 13 Bible Online

1 Sam. 13 - ngakarimojong bible

1 Sam. 13

¹Arae ŋikaru a Saul ŋatomoniuni apaki ŋina aruworor erwosit, ido abu kipuka Isirael ŋikaru ŋatomoniomwon ka ŋiarei.

²Abu Saul toseu ŋikilyok ŋalipyo ŋauni alo Isirael; arukito iŋes ka ŋalipyo ŋaarei alo Mikimas ka alo Besel anakwap a ŋina a ŋikamukumukui, ido arukito aliput ka Yonasan alo Gibea anakibois a ŋina eyai Benjamin; abu Saul kitoboŋo ŋikilyok ŋuluce daadaŋ lorerya kec.

³Apeikoloŋit, kitijik Yonasan Ŋipilistin ŋulu ayakasi Geba, kiirasi Ŋipilistin ŋakiro ŋun. Tolimok nai Saul ŋituŋa tokutakis anakwap a Isirael a daadaŋ ŋabureryaŋa a ŋimeesekin, alimokin ŋituŋa ebe, “Itemokino Ŋiburaniyae kiirasi ŋakiro a Saul.”

⁴Ani iirarete Ŋisirael daadaŋ, atemar elou Saul ajore a Ŋipilistin ka eman tokona Ŋipilistin Ŋisirael, aponi tonyaraunae Ŋisirael daadaŋ akimorikin ka Saul alo Giligal.

⁵Tocunakinos Ŋipilistin akitijiore Ŋisirael, ayakatar ikes ŋagaari ŋalipyo ŋatomoniuni ŋuna eritae a ŋaŋolei ka ŋikajiok ŋalipyo ŋakanikapei ŋulu adokito ŋaŋolei ta ŋajorei ŋuna ekwaan elalak ka asinyon alokipetot ka anam. Apotu ikes toloto kiboiyosi Mikimas Kide Bes-Apen.

⁶Ani eanyunete Ŋisirael atemar kelomasi ikes locan ka kerookin ikes kidiŋ, apotu toŋopa alokuco, anaturukanin a ŋuna aya natabab, analyalin ka anakaumeumei.

⁷Apotu Ŋiburaniyae ŋice toema ekekwaye Yorodan, nakwap a Gad ka Gilead. Apaki ŋin, ariŋa Saul eyai Giligal, arukito iŋes ka ŋituŋa ŋulu abulit ka amaranete.

⁸Kiboi Saul a nen ŋirwa ŋikanikaarei ŋulu sek alimokinit Samuel iŋes; nai abu Samuel nyebu Giligal apaki ŋin, aŋun, apotu ŋituŋa tosiwa aneni a Saul.

⁹Aŋun, abu Saul tema, “Yautu ainakinet ŋina epeyo ŋin neni kaŋ kaapei ka ŋainakineta ŋuna ke ekisil.” Inak nai Saul Akuj ainakinet ŋina epeyo.

¹⁰Ani irikakini Saul ainakin Akuj ainakinet ŋina epeyo, todolu Samuel; toloma Saul kiŋa akisiryam ka akimal iŋes.

¹¹Kiŋit Samuel iŋes tema, “Anukiro itiya iyoŋ?” Toboŋok Saul tema, “Ani eŋolikini ayoŋ atemar asiwa ŋituŋa aneni kaŋ ka ididi iyoŋ abunore alotooma ŋirwa ŋulu sek etemokino ibunio, nabo acunakinosi Ŋipilistin Mikimas, abu

¹²otema, ‘Etiyaun robo tokona Ŋipilistin Giligal neni kaŋ, toriŋa bo ayoŋ nyiŋita Ekapolon ŋuna ejokak aneni keŋ.’ Abu ekeil ayoŋ oreikin ainakin Akuj ainakinet ŋina epeyo.”

¹³Tema nai Samuel neni a Saul, “Itiya iyoŋ ŋakiro ŋuna ka abaŋao; nyiwuapa iyoŋ ŋakiciketa ŋuna ke Ekapolon ka Akuj kon, ŋuna abu iŋes ikicikak iyoŋ akiwuap, kerae kitiyate iyoŋ ŋun, kesipokinit Ekapolon apukan kon kipuka Ŋisirael ŋikaru ka ŋikaru.

¹⁴Nai tokona nyeruwor apukan kon ŋinaruba, adau Ekapolon akiwarun ekile ece ŋolo emina etau keŋ, ido aseu Ekapolon iŋes aruwor ekepukan a ŋituŋa keŋ, anerae nyiwuapa iyoŋ ŋakiciketa a Ekapolon.”

¹⁵Torotok nai Samuel alo Giligal, kitipeiyo Gibea nakibois ŋina alo Benjamin. Kiwuapakis ŋituŋa ŋuluce Saul aruwor ŋasigarya keŋ tolot Gilgal tari Gibea nakibois ŋina alo Benjamin. Kimar Saul ŋikilyok ŋulu arukito ka iŋes, toryamu eapiyarit ekimar kec ŋamiae ŋakanikapei.

¹⁶Apotu Saul ka lokoku keŋ Yonasan ta ŋikilyok ŋulu arukitotor ikes toloto kiboiyosi Gibea nakibois ŋina alo Benjamin, nai apotu Ŋipilistin kiboikinos Mikimas.

¹⁷Toloto ŋajorei a Ŋipilistin ŋauni aneni eboiyoto Ŋipilistin, tolot apei lowae ŋolo eyai Opira nakwap ŋina a Sual,

¹⁸tolot ajore ace lowae ŋolo ayai Res-Oron ka tolot ace lowae ŋolo ke emukura a ŋolo arounit akadipaalat ŋina a Seboim alowae a ŋolo ka aloŋisat.

¹⁹Apaki ŋin, amam ituŋanan ipei daŋ etyeki ŋiboro alo Isirael a daadaŋ; anerae kepotu Ŋipilistin temasi, “Nyitemokino Ŋiburaniyae ityekete ŋileŋia, kori ŋakwaaras aŋuna kec.”

²⁰Aŋun, aloseneneete Ŋisirael daadaŋ neni a Ŋipilistin akipen ŋaŋajepa a ŋimelekes a ŋimoŋin, ŋimelekes ŋulu a ŋakan ka ŋaepe ta ŋileŋia ŋuluŋeret.

²¹Akipen aŋajep a emeleku a ŋimoŋin ka emeleku ŋolo a ŋakan, atacyo ŋicekelya ŋidi, ido akipen ŋaepe ka akipen ŋasuwa ŋuna emetere ŋimoŋin, atacyo ecekel epei.

²²Aŋun, amam ekileŋ, kori akwara ayakatar ŋikilyok ŋulu arukito ka Saul ta Yonasan apaki ŋina ke ejie. Nai Saul bon ka lokoku keŋ Yonasan ayakatar.

²³Kebu ajore a Ŋipilistin ace tolot lorot ŋolo alo Mikimas.