Read ngakarimojong 1 Sam. 19 Bible Online

1 Sam. 19 - ngakarimojong bible

1 Sam. 19

¹Tolimok Saul lokoku keŋ Yonasan ka ŋiketiyak a Saul daadaŋ atemar ecamit iŋes akiar Daudi. Nai amina Yonasan Daudi,

²tema neni keŋ, “Ecamit Saul papa kaŋ akiar iyoŋ. Toosoki robo moi taparacu, tolot toŋop a iwadio aneni nyepatania aanyunia iyoŋ.

³Alomari ayoŋ kiŋa, owo alodiyete papa kaŋ alomanikor aneni iŋopitor iyoŋ, ido esirwor iŋes aŋuna kon, ani keya ŋakiro ayenuni ayoŋ aneni keŋ, abuni ayoŋ okolimok iyoŋ.”

⁴Kisirwor Yonasan Saul papa keŋ itojokit Daudi tema neni keŋ, “Nyemaikina erwosit eseci, kitiya aronis neni a Daudi a eketiyan keŋ, anerae mam asecit itiyat iŋes neni kon ka ejokak ŋiticisyo ŋulu itiyae iŋes aŋuna kon.

⁵Abu iŋes tojal akiyar keŋ apaki ŋina alosyo akitijikin Golias, ido abu Ekapolon kisilou nooi Ŋisirael daadaŋ ŋimoe kec. Ibu iyoŋ elope kiŋolik ŋun, ido ibu tolelyan; kaanukiro nai icamitor iyoŋ akitiya aronis neni a ituŋanan a ŋini nyesecit, anukiro icamitor iyoŋ akiar Daudi koŋin?”

⁶Kiira Saul ŋakiro a Yonasan, kikoŋ tema, “Ekoŋi jik, ikwapei eyaria Ekapolon, nyearyo iŋes.”

⁷Aŋun, abu Yonasan tonyarau Daudi aneni aŋopitor, tolimok iŋes ŋakiro a Saul daadaŋ. Ekaku a ŋun, yau Yonasan Daudi neni a Saul, toruko ka iŋes lopite ŋolopei sek arukitotor.

⁸Toyakaun nabo ejie ece, tolot Daudi lojie ŋol akitijiore Ŋipilistin. Kicodok Daudi Ŋipilistin eryenyaana nooi, toema ikes alokiŋaren keŋ.

⁹Apaki ŋin, bu aneni ke Ekapolon etau ŋolo aronon toloma neni a Saul apaki ŋina eboiyo iŋes alokai keŋ etiŋit akwara keŋ. Abolya Daudi ibore ŋini eore apaki ŋin.

¹⁰Kiwar Saul epite ŋolo eremio Daudi toenik akwara narwatata. Nai, abu Daudi tonapar aneni keŋ; torem Saul arwatata. Torotok Daudi a nen, tobucar aneni a Saul akoloŋit ŋin.

¹¹Akoloŋit ŋinapei nakwaare, abu Saul kiyakiya ŋituŋa kai a Daudi akitere iŋes nyesi, anerae ayeunit iŋes akiar Daudi taparacu. Tema aberu a Daudi neni a Daudi, “Ani pa kiuni iyoŋ akiyar kon tokona nakwaare, ikiaryo iyoŋ moi taparacu.”

¹²Aŋun, abu Mikal kiyooliyo Daudi alodirisa, tonapar Daudi tosi.

¹³Tolemu Mikal etorube a akuj ŋolo etiyaunito ŋituŋa, kiperik lokitaada; kiwuak ibore ŋini etiyaunitae a ŋajul a ŋamee nakou etorube a ŋol, kimuko a ŋilowi.

¹⁴Ani iyakiyari Saul ŋituŋa ayaun Daudi, tolimok Mikal ikes ebe, “Edyaka Daudi.”

¹⁵Abu nai Saul kiyakiya ŋituŋa alosit aanyun kire jik kedyaka Daudi, tema Saul neni kec, “Todakutu iŋes neni kaŋ eperi alokitaada, ikotere ayoŋ oar iŋes.”

¹⁶Ani elomunete ŋituŋa ŋul tooma akai, toryamut etorube ŋol eperi alokitaada, imukorit ibore ŋini etiyaunitae a ŋajul a ŋamee akou.

¹⁷Kiŋit Saul Mikal tema, “Kaanukiro ikimodikinia iyoŋ ayoŋ ikona, ido kimyek emoit kaŋ elosi tosi?” Toboŋok Mikal Saul tema, “Abu iŋes okolimok ayoŋ tema, ‘Akaari ayoŋ iyoŋ erae pa kikiŋarak iyoŋ ayoŋ osi.’ ”

¹⁸Tolot Daudi tosi Rama neni a Samuel, tolimok Daudi Samuel ŋakiro daadaŋ ŋuna etiya Saul neni keŋ. Toloto iŋes ka Samuel kiboiyosi Naios.

¹⁹Kepotu ŋituŋa tolimokis Saul ebe, “Eyai Daudi Naios nakibois ŋina alo Rama.”

²⁰Kiyakiya nai Saul ŋituŋa alosit ayaun Daudi. Ani iŋolikinete ŋituŋa ŋul atukot a ŋikadwarak edwari, ewoi Samuel ikwapei ekarikon kec, toloma etau ka Akuj neni a ŋituŋa a ŋulu eyakit Saul, kisyakis ikes daŋ akirworo edwarete.

²¹Ani elimokinio Saul ŋakiro a ŋul, kiyakiya iŋes ŋituŋa ŋice, apotu ŋul daŋ tolomasi neni a ŋuluce kirworo edwarete. Kiyakiya nabo Saul ŋituŋa ŋice akiyakiyaret ŋina a ŋauni, apotu ŋul daŋ tolomasi neni a ŋuluce kirworo edwarete.

²²Torotok nai Saul elope, tolot Rama. Todolu iŋes kare ŋina ti apolon ŋina ayai Seku; kiŋit ŋituŋa a nen tema, “Ai eyakasi Samuel ka Daudi?” Toboŋok iŋes ituŋanan ice tema, “Eyakasi ikes Naios nakibois ŋina alo Rama.”

²³Tolot Saul nen, tomyaa lowae ŋolo eyai Naios akibois ŋina alo Rama; bu etau ka Akuj neni keŋ apaki ŋin. Ani eriŋa iŋes elosi, kisyak akirworo edwari, akitodol ŋina adolunio Naios nakibois ŋina alo Rama.

²⁴Tolaca iŋes ŋilowi keŋ, kisyak iŋes daŋ akirworo edwari alokiŋaren Samuel. Akoloŋit ŋin daadaŋ, abu iŋes toper eleri apaaran ka akuwar daadaŋ. Aŋun, aruwor ŋakiro nu akitadapet ŋina ebala, “Erae mono Saul daŋ epei a ŋikadwarak a?”