Read ngakarimojong 1 Sam. 3 Bible Online

1 Sam. 3 - ngakarimojong bible

1 Sam. 3

¹Apaki ŋin, eŋarakinit Samuel Eli, etiyanakini Ekapolon. Pa amina Ekapolon alorwa a ŋul akirworo lotuŋa, pa alal Ekapolon atakanianakin neni a ŋituŋa.

²Apeikoloŋit, abu Eli ŋolo aris ŋakonyen kemumu tolot akinapakin nagule keŋ.

³Ariŋa apaki ŋin nyituduŋio etaa ka Akuj, ido aperi Samuel alo Kai a ŋina ke Ekapolon, aneni ayai Asaduku ŋina ka Akuj.

⁴Tonyara nai Ekapolon Samuel tema, “Samuel, Samuel!” Toboŋok Samuel tema, “Ayai!”

⁵Toem Samuel neni ayai Eli tema, “Ayoŋ lo, abu ayoŋ, anerae ibu iyoŋ ikinyar ayoŋ.” Nai tema Eli neni keŋ, “Nyenyara ayoŋ iyoŋ; toboŋo toper.” Aŋun, abu Samuel toboŋo toper.

⁶Tonyara nabo Ekapolon iŋes tema, “Samuel!” Tonyou Samuel tolot neni ke Eli tema, “Ayoŋ lo, abu ayoŋ, anerae ibu iyoŋ ikinyar ayoŋ.” Nai tema Eli, “Ikoku kaŋ, nyenyara ayoŋ iyoŋ, toboŋo toper.”

⁷Apaki ŋin, pa ayeni Samuel atemar ŋae erae Ekapolon ka ariŋa iŋes nyiirara akirot adio aneni ke Ekapolon.

⁸Tonyara nabo Ekapolon Samuel anyaraet ŋina a ŋauni. Tonyou Samuel tolot neni ke Eli tema, “Ayoŋ lo, abu ayoŋ, anerae ibu iyoŋ ikinyar ayoŋ.” Toyenu nai Eli atemar Ekapolon enyarit edya.

⁹Aŋun, tema Eli neni a Samuel, “Toboŋo toper; ani kikinyar iŋes iyoŋ, tema iyoŋ, ‘Kirworik Ekapolon, anerae apupi ayoŋ eketiyan kon.’ ” Aŋun, abu Samuel tolot kinapakin lokitaada keŋ.

¹⁰Abu nai Ekapolon bu towo a nen, tonyara ikwapei sek anyarar ebe, “Samuel, Samuel!” Tema nai Samuel, “Kirworik Ekapolon, anerae apupi ayoŋ ŋolo arae eketiyan kon. ”

¹¹Tema nai Ekapolon neni a Samuel, “Kiira, eapi ayoŋ akitiyakin ŋakiro ŋadi Isirael ŋuna ani iirari ŋinituŋanan, toumok.

¹²Akoloŋit ŋin, esiyookini ayoŋ ŋakiro daadaŋ ŋuna itoroniyaritere Eli ŋinapei anakisyakinet tari nasalunet, ŋakiro ŋuna abu ayoŋ erwor etoroniyarit ekal keŋ.

¹³Adau ayoŋ alimokin iŋes atemar esicani ayoŋ ekal keŋ ŋikaru ka ŋikaru aŋuna ka asecit a ŋina ayeni tari iŋes; apotu ŋidwe keŋ ŋulusapa yaut ŋilam nawat kec anakiyany Akuj, ido abu iŋes nyiretak ikes akitiya ŋun.

¹⁴Aŋun, ekoŋi ayoŋ etoroniyarit ekal ke Eli atemar, nyepedori asecit ŋina a ekal ke Eli amookun ŋikaru ka ŋikaru a ŋamuronisya, kori a ŋainakineta.”

¹⁵Toper Samuel nen akitodol taparacu; tonyou nai toŋaa ŋikekya ŋulu ka Akai ke Ekapolon. Apaki ŋin, akuryanit Samuel alimokin Eli ŋakiro ŋuna ka atakanikinet a ŋina abu toyakaun neni keŋ.

¹⁶Nai abu Eli tonyarau Samuel tema, “Samuel, ikoku kaŋ.” Tema Samuel, “Ayai.”

¹⁷Kiŋit Eli iŋes tema, “ Anukiro abu Ekapolon ikilimok iyoŋ? Nyimunon ŋakiro ŋun aneni kaŋ. Elipi ayoŋ kitiya Akuj ŋuna aronok neni kon kitiya ŋun erono nooi, erae kikimunon iyoŋ ayoŋ ŋuna abu iŋes itolimok iyoŋ.”

¹⁸Aŋun, abu Samuel tolimok Eli ŋakiro daadaŋ, mam ŋuna abu iŋes kimunon Eli. Tema nai Eli, “Erae iŋes Ekapolon, kimyek iŋes kitiya ŋuna ejokak aneni keŋ.”

¹⁹Ayai Ekapolon kaapei ka Samuel apaki ŋina apolounio iŋes, ido abu Ekapolon kisiyook ŋuna aris kelimu.

²⁰Toyenut nai ŋituŋa a Isirael daadaŋ, ŋinapei alo Dan tari Beeriseba atemar erae Samuel ekadwaran a Ekapolon ŋolo ikinyoma.

²¹Torubak Ekapolon etakanununui alo Silo, abu Ekapolon torubak itoodyanakin neni a Samuel alo Silo. Aponi nai kiteyenikinae Ŋisirael daadaŋ ŋakiro a Samuel.