Read ngakarimojong 1 Sam. 31 Bible Online

1 Sam. 31 - ngakarimojong bible

1 Sam. 31

¹Apotu Ŋipilistin ŋulu aŋaarito ajore kitijikis Ŋisirael; tobwaŋas Ŋisirael, toarakis Ŋipilistin ikes ŋulu alalak lomukura ŋolo a Gilboa.

²Toditasi Ŋipilistin Saul ka ŋidwe keŋ ŋulusapa; toara ikes ŋidwe a Saul ŋulusapa lu: Yonasan, Abinadab ka Malicisua.

³Topotyor ejie nooi aneni ayai Saul; toditasi iŋes ŋulu atiŋito ŋikaleŋeleŋe, apotu towana iŋes nooi a ŋikaleŋeleŋe.

⁴Tema nai Saul neni a ekile a ŋolo aryoŋit ŋiboro keŋ ŋulu ke ejie, “Tolemu ekileŋ kon ikicumya ayoŋ, ikotere nyepotu ŋituŋa ŋul ŋulu nyileŋeritae akicum ayoŋ, ido okokyanatar.” Nai abu ŋolo aryoŋit ŋiboro a Saul ŋulu ke ejie nyecamu akicum Saul, anerae eilit iŋes. Aŋun, abu Saul tolemu ekileŋ keŋ a elope toramakin lokileŋ kicumakin bon.

⁵Ani iŋolikini ŋolo aryoŋit ŋiboro a Saul ŋulu ke ejie atemar eridak Saul, toramakin iŋes daŋ lokileŋ keŋ a elope kicumakin bon, totwaka ikes kaapei.

⁶Aŋun, apotu Saul ka ŋidwe keŋ ŋulusapa ŋiuni ka ŋolo aryoŋit ŋiboro keŋ ŋulu ke ejie ta ŋikajiok ŋulu arukito ka iŋes daadaŋ totwaka akoloŋit apei.

⁷Ani iirarete Ŋisirael ŋulu ayakasi ekekwaye akadipaalat ŋina a Yesireel ka ŋulu ayakasi ekekwaye aŋolol Yorodan atemar abwaŋasi Ŋisirael ka aari Saul ka ŋidwe keŋ ŋulusapa, apotu kimyekis ŋitaunio kec, toema nariet. Apotu nai Ŋipilistin potu toloma lotaunio ŋul.

⁸Ani akoloŋit ŋina atupakini ŋin, apotu Ŋipilistin toloto akilac ŋituŋa ŋulu aris ikes keara ŋul. Toryamut akuwan a Saul ka ŋuna a ŋidwe keŋ a ŋulusapa a ŋuluuni eperete alomukura a ŋolo a Gilboa.

⁹Totubosi ikes akou a Saul, ido tolacasi ŋiboro keŋ ŋulu ke ejie. kiyakiyasi ŋituŋa nakwap a Ŋipilistin daadaŋ alimor ŋakiro ŋuna ajokak ŋuna ka akiloun a ŋin; ikotere elimoryo ŋakiro ŋun anakais a ŋakujo kec ka alotuŋa kec a daadaŋ.

¹⁰Kiwuakis Ŋipilistin ŋiboro a Saul ŋulu ke ejie kai ka akuj kec a ŋina anyaritae Asitarite, ido toenikis akuwan a saul narwatata ŋina ke etaun a ŋolo anyaritae Bes-San.

¹¹Nai ani iirarete ŋituŋa ŋulu a Yabes-Gilead ŋakiro ŋuna kitiyata Ŋipilistin neni a Saul,

¹²tonyout ŋikilyok daadaŋ ŋulu adedeŋ, toloto akiwar akuwar kia, tolemut anarwatata a Bes-San akuwan a Saul ka ŋuna a ŋidwe keŋ a ŋulusapa a ŋuluuni, yaut ikes ŋawat ŋun tari Yabes, kicunya a nen.

¹³Kidepasi nai ŋakoyo kec, tonukakis Yabes, kwap ekitoe ŋolo esibit ekwaakwaa, ido kiredakis akiron ŋirwa ŋikanikaarei.