Read ngando Matayo 10 Bible Online

Matayo 10 - ngando bible

Matayo 10

¹Koko aelela bakili’anande jo l’afe, ko amafa lifoka eneyali bafoi bana nsefo lacina bafodya baho, ko baiky’ato ena nkangi ihatu la tongitongi tohatotu.

²Baina bana bikima jo l’ife bah’ane: on’oso Simona onotangama Petelo, la Andelo onotwa l’ende en’ecimo; Yakobo la Yoane, ban’ana Zebedayo;

³Filipo la Balutolomayo; Toma la Matayo, bosusanyi bona mpuci; Yakobo bon’ona Alafayo, la Tadayo;

⁴Simona Zelote, ko la Yudasa ona Keliota onoangelaki.

⁵Yesu aotoma bato’ane jo l’afe, ko amalaka, ate, Botacoake ena mboka ena Befenda, ko botafolake benyanga bena baise Samalia:

⁶bocoaka nk’eneyali mpate ina bondongo bona Yisalaele ineyokungaka.

⁷Ko enaco’ino, bosumoiak’ato bosimo, in’ate, Lifoka lina loola yoolama.

⁸Biky’ato banawa nkangi, betola banawaki, bikya ban’aise nkangi en’okenge, bofodya bademona. Ino botambaki l’akasa: bofaka nko bofakafaka.

⁹Botatolake wolo, la argent, la francs ena totatombe tonino;

¹⁰botatolake ntombe en’okita, efana bekoto’efe, efana sapata en’akaka, efana bombele bona lokendo: lacina bosali akoli la toma tonande.

¹¹En’onyanga l’en’ecimo enafol’ino, bofona boto onokoli; ko boyala nk’enek’ende yengoko bemwa lakina.

¹²Enatu’ino en’otumba, boes’oho.

¹³Yombo botumba bokoli, mwi enino eyalake nkwaho; koko yombo boho bofakoli, mwi enino eutake nk’eneyal’ino.

¹⁴Yombo boto afakosangel’ino, ko afalofe baoyi’anino, eneng’in’ouma en’otumb’oho yombo bonyang’oho, botitola betoko beneyali en’akak’anino.

¹⁵Solosolo, lakosumol’ino, ekoiyelo en’onyang’oho engoleka ekoiyelo ena Sodomo la Amola en’ina bon’etendelo en’akambo.

¹⁶Lenda, lakotom’ino yoka mpate ena ntoto ena nkoi; lacin’eho, boyalamaka la bomwu yoka njua, koko la mwi yoka bikoso.

¹⁷Koko boongya lilend’ato; lacin’iyo bangokotol’ino en’oso bona bakita ban’alimo, ko bangokofom’ino nko mpomi ena basunagoga baniyo;

¹⁸koko bongotolama en’oso bona gouverneurs la bafoka bana rois lacin’ena lina linami, yoka ndembi eneyal’iyo l’eneyali Befenda.

¹⁹Koko eneng’iy’okoleky’ino yok’oho, botakandakandake lacin’ena bokotua bonong’in’otenda la baoyi banang’in’otenda; lacina baoyi banang’in’otenda bangofama eneyal’ino nk’ena heure eho.

²⁰Onongotenda ef’ino: Bolimo bona Bafango’onino kongoatenda en’etem’enino.

²¹Botoolo angolekya bakune en’ewedi, ko bafango angolekya bona; ko bana bangangela bafango l’oyango, ko bangatoma en’ewedi.

²²Ko bahatu bangokook’ino bowe lacin’ena lina linami; koko onongocindelana locinji yengoko nsimbo angika.

²³Koko eneng’iy’okonyom’ino en’ecimo ene, bolota en’ecimo emoi; solosolo, lakosumol’ino, kuma botakadya litianya bicimo bina Yisalaele, Bon’on’oto angoya.

²⁴Bokili afaleki bolaki’onande, ko boombo afaleki nyangetuke enande.

²⁵Yoi yakolana la bokili lacina ayale yoka bosamb’onoyali bolaki’onande, ko boombo ayale yoka nyangetuke enande. Yombo batangaki mene’otumba Balazebuba, bangoleka litanga iy’anayali en’omboi’onande nkoho.

²⁶Lacin’eho, botaangake bato’aho; lacina efana yoi linalikundama linalifakundwa linga, efana yoi linalifisi linalifeyana linga.

²⁷Baoyi banakosumol’emi en’ilima, botendaka baho ena fololo; ko baoyi banok’ino ena litoi, botendaka baho ena liko lina nsamba ina betumba.

²⁸Ko botaangake iy’anayaka yonge, koko bafayakisa bolimo: boanga nk’ende onoyakisa le bolimo le yonge ena Ngena.

²⁹Bisodya bife bifasombama nde la likota limoko? Koko efana esodya emoko enakwa ena loko yombo Bafango’onino afimedya.

³⁰Koko ino, bese bena lifo linaliyali en’ete’enino bemosila yalama.

³¹Lacin’eho, botaangake: ino boleki bisodya bike l’otuya.

³²Lacin’eho, onongonjimedy’emi en’oso bon’ato, nongimedy’ende en’oso bon’afang’onami onoyali ena loola.

³³Koko onongonjangan’emi en’oso bon’ato, nongangan’ende en’oso bon’afango’onami onoyali ena loola.

³⁴Botakanelake emi njaki otoma mwi ena loko; ntaya otoma mwi ena loko: njaki otoma lokula lon’ita.

³⁵Lacin’oka emi njaki oyokambwanya bona l’afango, ko bon’on’oyoto l’oyango’onande, ko booli’on’ona la nyango en’ome;

³⁶ko boto angosungya baokyi’owe banande nk’en’omboi’onandamene.

³⁷Ende onok’afango yomb’oyango nganji eneleki nganji enanjok’ende, afakoli l’emi; ko onoka bon’ona mpame yombo bon’on’oyoto nganji eneleki nganji enanjok’ende, afakoli l’emi.

³⁸Ko ende onofambole ekulusu enande, ko afankile, afakoli l’emi.

³⁹Onosungya liiko lonande angungya loho; ko onungya liiko lonande lacin’enami, angosungya loho.

⁴⁰Onokotamb’ino antamb’emi; ko onontamb’emi aotamb’ende onontomaki.

⁴¹Ende onotamba bosumoli ena lina lina bosumoli, angotamba boluko bon’osumoli; ko onotamba boto’ona mbongi ena lina lin’oto’ona mbongi, angotamba boluko bon’oto’ona mbongi.

⁴²Koko onongofa omoi ona ban’ane bana tosalisali nko nkofo kei en’asi bana ncici bana mmela ena lina lina bokili, solosolo, lakosumol’ino, ende afaindaki boluko’onande tu.