Read ngando Matayo 11 Bible Online

Matayo 11 - ngando bible

Matayo 11

¹Koko eneki Yesu okadyaka lilaka bakili’anande jo l’afe, aumaki meho, lacina alake lilako ko asumole bosimo ena bicimo bin’onyang’oho.

²Koko eneki Yoane ookaka en’otumba bon’enyolo bikambwa binakamba Masiya, aotoma bakili’anande bafe,

³ko amoufola, ate, Oyali nde nk’ende onoyayi, yombo tolendedy’okina?

⁴Yesu amautodya, ate, Bocoaka boyosumole Yoane baoyi banok’ino ko la baoyi banen’ino:

⁵banodyak’aiso baena, bitumbe bayakende, bekenge beokulwa, ban’itaki’atoi baoka, banawaki baetwa, ko bosimo bon’olotsi bosekodyama eneyali bato b’iinda.

⁶Ko boto onofene ncina en’ekumbelo eneyal’emi akik’ekiko.

⁷Koko enem’ato’aho ocoaka, Yesu aomatsa litenda la bik’ike bona bato lacin’ena Yoane, ate, Onok’in’ocoaka oyena ena sengelenge oka nai? Iyongongwa ineyalile la lofongo?

⁸Nde bocoaki oyena nai? Boto onolota bisenda bin’okoka? Lenda, iy’analota bisenda bin’okoka bayali nk’en’etumba ben’afoka.

⁹Ohonde bocoaki lacina nai? Oyena nde bosumoli? O, ko lakosumol’ino, aleki’osumoli.

¹⁰One nk’ende onok’iy’otengelaka, Lenda, latom’ekima enami en’oso bon’elongi ene, Ende angongya mboka ene en’oso’one.

¹¹Solosolo, lakosumol’ino, l’iyatu banotwaki l’ayato, etaata boto’omoko onoleki Yoane Bini; ohonde oninda lokumo ena lifoka lina loola aolek’ende.

¹²En’esike ena Yoane yengoko esik’ene, lifoka lina loola yundama la locili, ko bato bana bolema baunda liho la locili.

¹³Lacina basumoli bahatu la basangya balakaki yengoko esike ena Yoane.

¹⁴Ko (yombo bolanga lacina botambe yoi line) one nk’Eliya onoyayi.

¹⁵Ende onoyali l’atoi lacina aoke, aongya lilofa.

¹⁶Koko nongokolanya eotwelo ene la nai? Bayali yoka banatome banakisase en’edye en’esombe, ko baelelana,

¹⁷iy’ate, Tokofomelak’ino tofonge, koko botina bomina; tolelaki eneyal’ino, koko botafoma befwi bena lilelo.

¹⁸Yoane ayaki, ko atala toma ko atamela, ko iyo Mbo, ayali la demona.

¹⁹Bon’on’oto ayaki, ayale toma, ayamele, ko iyo Mbo, lenda, boto onoseki’opomo la bomeli bona vina, efili ena basusanyi bana mpuci ko la bato ban’owe. Koko bomwu bolongyama la bikambwa bina boho.

²⁰Nkwaho amatsaki lifela baise benyanga beneki bikambwa binande bina mpefa bike okambamaka; lacin’oka iyo batayosuma en’aoyi’owe.

²¹Ate, Bino eneyal’e, Kolazina? Bino eneyal’e, Betesaida! Yombo bikambwa bina mpefa binikambamaki eneyal’e bikambamaki’ale ena Tula la Sidona, tumbe baumbelaki baoyi’owe alale, nk’en’enuko l’etoko.

²²Koko lakosumol’ino, ekwelo enino en’ina bon’etendelo en’akambo engoleka ekwelo ena Tula la Sidona nko ndeka.

²³Ko e, Kapalanauma, oniledyama ena loola, ongokitsama nk’ena Adese; lacin’oka, yombo bikambwa binikambamaki eneyal’e bikambamaki’ale ena Sodomo, tumbe bonyang’oho bomoyala nko njalama bon’in’one.

²⁴Koko lakosumol’ino, ekwelo enengokw’e en’ina bon’etendelo en’akambo engoleka ekwelo ena Sodomo.

²⁵En’esik’eho Yesu aotenda, ate, Lakokumy’e, Bafango, Nkolo ena loola l’ena loko, lacin’oka ofiselaki bamene bomwu la bamene nnonganya baoyi’ane, ko ofisolaki baho nk’eneyali banatome.

²⁶O, Bafango, lacina eango enem’olangaka nd’eho.

²⁷Baoyi bahatu bamofam’emi eneyali Bafango’onami; ko efan’oto oneya Bona, umola nko Bafango; ko efan’oto oneya Bafango, umola nko Bona, la boto onongi Bona olanga lacina aotume.

²⁸Inatu banalemba l’ikambwa, l’inatu banok’olito, boyak’eneyal’emi, ko nongokof’ino lifomya.

²⁹Bambana l’emi en’eambanelo enami, ko bolakama l’emi; lacin’emi nde nde la mwi la njofima en’otema, ko bongosungya lifomya lacin’ena belimo’enino.

³⁰Lacina eambanelo enami efana locili, ko bolito’onami boyali nko fo.