Read ngando Matayo 12 Bible Online

Matayo 12 - ngando bible

Matayo 12

¹En’esik’eho Yesu aotianya ba ala ban’asongu en’ina bona Sabata; ko bakili’anande baoka njala, baomatsa linukola basongu, ko baola.

²Koko eneki Bafalusi oenaka yoi liho, bamosumola, iy’ate, Lenda, bakili’ane bayakambe yoi linifakolana la boeka bona Sabata.

³Koko amasumola, ate, Ino botaanda nde en’okanda yoi linaliki Dawidi oilaka, eneki’nd’ookaka njala, ende l’iy’anayaaki l’ende?

⁴bosamb’onoki’nd’otuaka en’otumba bona Yakomba, ko alaki mampa en’oeka—nko mampa enetalama l’ato, kang’ende kang’iy’anayaaki l’ende: banalaki nko nkanga kei?

⁵Ko botaanda nde en’asangya, noka nkanga baehya bokotua bona Sabata en’ina bona Sabata, ko bafana nkwaka ena likambo?

⁶Koko lakosumol’ino, Omoi onoleki botumba bona Yakomba ayali mendo.

⁷Yombo beyaki ncina ena yoi line, Enalang’emi nk’isei, efa mbeka, tumbe botakoiy’iy’anafana nkwaka ena likambo.

⁸Lacina Bon’on’oto ayali nyangetuke ena Sabata.

⁹Ko eneki’nd’oumaka meho, aocoa ena sunagoga eniyo;

¹⁰ko lenda, boto ononyelala likasa ayaaki meho. Ko baufola Yesu, iy’ate, Nk’iikya bato en’ina bona Sabata, okwa nde likambo? Balangaki’oka bamokoiya likambo.

¹¹Amalokwela, ate, Yomb’omoi’onino ayali la mpate emoko, ko eho eokwela lifoku en’ina bona Sabata, afoundaki oyotefola nde?

¹²Iy’ot’ola, afaleki nde mpate? Lacin’eho, nkamba en’ikambwa bin’olotsi en’ina bona Sabata ekoli la basangya.

¹³Ko aosumola boto’oho, ate, Nanola likasa line. Aonanola liho, ko likasa linande yoika yok’onoki likasa limoi oyalaka.

¹⁴Koko Bafalusi baofola, ko bamoangela eango, bokotua bonong’iy’oyak’ende.

¹⁵Eneki Yesu ofokolaka eango eho, auma meho; ko bik’ike bon’ato bamokila, ko amaikya nk’iyatu;

¹⁶koko amasumola batalinzake lokumo lonande.

¹⁷Lacina yoi linaliki Yesaya bosumoli otendaka yilame, ate,

¹⁸Lenda, bosali’onami onoki’m’osonaka; Onolangama bike l’emi, onakik’otem’onami ekiko mene: Nongila Bolimo’onami eneyal’ende, Ko ende angosumola Befenda etendelo en’akambo ena cilili.

¹⁹Afaataki ntango, ko afalolomwaki; Ko bafokaki lofoso lonande ena mboka.

²⁰Afakesaki iyongongwa ineyamunya, Ko afalimaki lokenga loneloolama lilimala; Yengoko ayedya etendelo en’akambo nk’en’elonga.

²¹Befenda bangolengedya nk’ena lina linande.

²²Nkwaho baoyelaki boto onoyaaki la demona, boto onodyak’aiso ko ayaaki bokukuluku. Amiikya, ko nkwaho boto onoyaaki bokukuluku aotenda, ko aena.

²³Ko bato bahatu baofefa, Mbo, one afayali nde bon’ona Dawidi?

²⁴Koko eneki Bafalusi ookaka, baila, iy’ate, Boto’one afodya bademona nko la locili lona Balazebuba lifoka lina bademona.

²⁵Yesu aeyaki nkanyi y’etem’eniyo, ko amasumola, ate, Lifoka la lifoka lineyakambwana beloi liyoehya lihoamene, ko bonyanga l’onyanga bonokambwana beloi bofalingalinga, ko nk’osamb’oho l’omboi bonokambwana beloi.

²⁶Yombo Satana aofodya Satana, ayokambwany’endamene, ko lifoka linande lisokolingalinga boosamb’oya?

²⁷Ko yomb’emi lafodya bademona la Balazebuba, ban’anino bamafodya la nai? Lacin’eho, iyo bangoyala juges inino.

²⁸Ohonde, nk’en’oka emi lafodya bademona la Bolimo bona Yakomba, atelifoka lina Yakomba limoya eneyal’ino.

²⁹Boto aotua en’otumba bon’oto’ona locili oyehya toma tonande, kuma atakakela boto’ona locili en’oso, bosamb’oya? Amokakel’oso, ko ena mbusa angehya botumb’onande.

³⁰Ende onofayali l’emi ansimba nsimba; ko ende onofasusanya l’emi, aofanzafanza.

³¹Lacin’eho, lakosumol’ino, emite, Bato bangotungwa en’aoyi’owe bahatu ko l’esao behetu; ohonde banasaiya Bolimo bon’olotsi bafatungwaki tu.

³²Onotanga Bon’on’oto lotango angotungwa ena yoi liho; ohonde onotanga Bolimo bon’olotsi lotango, afatungwaki ena yoi liho, l’en’esik’ene l’en’esike enengoya ena mbusa, afatungwaki tu.

³³Ekoli lacina bote botangame bolotsi ko l’emamo nk’olotsi, yombo bote bon’owe ko l’emamo nk’owe: lacina bote beyana nko l’emamo bena boho.

³⁴Ino ban’ana njua? Ino bato ban’owe bokolana litendisa baoyi ban’olotsi bosamb’oya? Bonyua botenda nko baoyi banaki botema ololaka l’aho.

³⁵Boto’on’olotsi aofodya toma ton’olotsi ena lituka linande lin’olotsi; ko boto on’owe aofodya toma ton’owe ena lituka linande lin’owe.

³⁶Koko lakosumol’ino, en’ina bon’etendelo en’akambo bato bangolokola boloko bona yoi la yoi linalik’iy’otendaka linalifana ncina ntutuma.

³⁷Lacina ongolongyama la baoyi’aneamene, ko ongokoiyama nko la baoyi’aneamene.

³⁸Nkwaho bamoi ban’atengi ban’ekanda l’afalusi bailaki, iy’ate, Bolaki, iso tolanga tene ndembi eneyal’e.

³⁹Koko amalokwela, ate, Bato ban’eotwelo en’owe l’ena ntata ena likele bayafone ndembi: efaataki ndembi enengofama eneyal’iyo, yengoko ndembi ena Yoane, bosumoli, kei.

⁴⁰Bon’on’oto angoyala ena ntundulu ena loko bina besaso la beco besaso, yok’onoki Yona oyalaka en’otema bona nse ena nkolo mene bina besaso la beco besaso.

⁴¹Bato bana Ninewe bangemala en’etendelo en’akambo l’ato ban’eotwelo ene, ko bangakoiya; lacin’oka iyo baumbelaki baoyi’owe la lilako lina Yona; ko lenda, omoi onoleki Yona ayali mendo.

⁴²Lifoka lin’oyoto lina reine lin’ili bona Sud angemala en’etendelo en’akambo l’ato ban’eotwelo ene, ko angakoiya; lacin’oka ayaki ena nsimbo mene ina loko oyolofa baoyi bana bomwu bana Solomona; ko lenda, omoi onoleki Solomona ayali mendo.

⁴³Enema demona ena nsefo ofola eneyali boto, oho ayete ena loko lona komukomu, ayakembe lifomya, ko afasungya.

⁴⁴Ko aila, ate, Mbutwa en’otumba bonoki’m’ofolaka; ko enayel’ende meho, aosungya boho bototoloto, boombama, ko boongyama bolotsi.

⁴⁵Nkwaho aocoa oyotamb’eneyal’endamene bademona bamoi nsambo banalek’ende bowe; baho baotua, ko baoyala nkwaho; ko bokotua bon’oto’oho bona nsimbo boleki bonoki’oso la bowe. Eotwelo ene en’owe engoyala nk’oho.

⁴⁶Nk’eneyatend’ende la bik’ike bona bato, lenda, nyango l’akune’anande baemali en’anza, ko baofon’etelo otenda l’ende.

⁴⁷Ko boto’omoi amosumola, ate, Lenda, boyango’one l’akune’ane baemali en’anza, balanga lacina batende l’e.

⁴⁸Koko aokutola, aolokwela boto onosumolaki, ate, Onoyali boyango’onami oka nai? Koko bakune’anami nai?

⁴⁹Ko aonanola likasa linande eneyali bakili’anande, ate, Lenda, boyango l’akune’anami bah’anyi!

⁵⁰Lacin’oka boto l’oto onila baoyi banalanga Bafango’onami onoyali ena loola, boto’oho ayali bakune’onami, la mbangela enami, l’oyango’onami.