Read ngando Matayo 13 Bible Online

Matayo 13 - ngando bible

Matayo 13

¹En’in’oho Yesu aofola en’otumba, ko aokisase en’oseleka bona lose.

²Ko eneki bik’ike mene bon’ato osusanaka eneyal’ende, aoyookela en’atu, ko aokisase. Ko bato bahatu baemala en’okili.

³Ko amasumola baoyi bike l’asai, ate, Lenda, bofusi aocoa ofusa beona mpusa.

⁴Enem’end’ofusa beona bemoi beokwa nk’ena mboka, ko mpulu yoya oyotona beho.

⁵Ko bemoi beokwa ena bidye bina baufe, bili benetaat’iyo bekongo bike; ko isasanga beho beomela, lacin’oka betaata bekongo bena lingunda;

⁶ko eneki bina oalaka, beonyelala, ko beofanga, lacina betaata beluo.

⁷Ko bemoi beokwa ena ntoto ena beenge, ko beenge beomela ko beoyaka beona la nkaka.

⁸Ko bekina beokwa en’ekongo bena lilemwa, ko beot’emamo, bemoi yok’okam’okama, ko bemoi yoka ntuk’otoa’otoa, ko bemoi ntuk’isaso’isaso.

⁹Onoyali l’atoi lacina aoke, aongya lilofa.

¹⁰Koko bakili baoya, bamosumola, iy’ate, Otenda l’ato l’asai lacina nai?

¹¹Ende aokutola, amasumola, ate, Emofama eneyal’ino lacina beye befisafisa bena lifoka lina loola, koko eho etafama eneyal’iyo.

¹²Bamoi bangofama eneyal’ende onata, ko angata bike nko mpula; ohonde onofaate, bangokumol’ende nko baho banat’ende.

¹³Lacin’eho, latenda l’iyo nko l’asai, lacin’oka iyo bambolenda, koko bafene; balofamela, koko bafoke, ko bafanonganya ncina.

¹⁴Baoyi banaki Yesaya otendaka bamilama l’iyo; ende ailaki, ate, Bongokeela, ko bofanonganyaki tu; Bongeneela, ko bofafokolaki tu;

¹⁵Lacina botema bon’ato’ane boseki bocilingitano, Ko batoi’aniyo bayali nko booko, Ko bamolifa baiso’aniyo, Batongoyena l’aiso’aniyo, Batongoyoka l’atoi’aniyo, Batononganya l’etem’eniyo, Batongoyokanya, ko emi ntoyiky’iyo.

¹⁶Koko baiso’anino bakik’ekiko, lacin’oka baho baena; ko l’atoi’anino, lacin’oka baho baoka.

¹⁷Solosolo, lakosumol’ino, basumoli la bato bana mbongi bike balangaki’ale lacina baene bikambwa bin’en’ino, ko batena; ko balangaki lacina baoke baoyi banok’ino, ko batoka.

¹⁸Lacin’eho, bolofa ncina ena lisai lina bofusi.

¹⁹Enok’oto yoi lina lifoka, ko afanonganya ncina, On’owe aoya, ko amokumola yoi liho linalifusi en’otem’onande. One nk’ende onofusama en’okenge bona mboka.

²⁰Ko ende onofusama ena bidye bina baufe, nk’ende onoka yoi, ko isasanga aotamba liho l’enyanga;

²¹ohonde afana beluo eneyal’endamene, ko afalingalinga; ko enaya bino la nyoma lacin’ena yoi, aolembwa nkwaho.

²²Ko ende onofusama ena ntoto ena beenge nk’ende on’oka yoi, ko bokandokando bon’akambo bana loko lone la longo lona lituka bayaka yoi la nkaka, ko lifote’emamo.

²³Ko ende onofusama en’ekongo bena lilemwa nk’ende onoka yoi, ko aononganya, ko aot’emamo solosolo: bamoi baot’emamo yoka bokam’okama, ko bamoi ntuk’otoa’otoa, ko bamoi ntuk’isaso isaso.

²⁴Ko amasumola lisai limoi, ate, Lifoka lina loola yakolana l’oto onofusaki beona ben’olotsi ena lisala linande.

²⁵Koko enem’ato ototaka, bookyi’owe’onande aoya oyofusa tolenge ena ntoto ena bopunga, ko aocoa mboka enande.

²⁶Eneki beona omelaka, ko beot’emamo, tolenge toenya nkoho.

²⁷Ko baombo bana mene’otumba baoya, Mbo, Nyangetuke, otafusa nde beona ben’olotsi ena lisala line? Iya tolenge tomela meho bosamb’oya?

²⁸Amasumola, ate, Bookyi’owe amila yoi line. Baombo bamufola, iy’ate, Olanga nde tocu osusanya tolenge?

²⁹Ate, Efana; lacina, enasusany’ino tolenge, botokula bepunga nkoho

³⁰Bacike bamele laanda yengoko esike en’enukwelo; ko en’esike en’enukwelo nongosumola banukoli, emite, Bosusanya tolenge en’oso, bokakela ena beolo, ko botumba toho ena nkoi; koko bosusanya bepunga en’otumb’onami bon’emonyedyo.

³¹Ko amasumola lisai limoi, ate, Lifoka lina loola liyali yoka boona bona sinapi bonoki boto’omoi otambaka, ko aofusa ena lisala linande.

³²Boona bone boleki beona behetu l’isalisali solosolo; koko eneyafule boho, boleki befusi behetu bokolo, ko boyalama bote mene, ko mpulu ina liko yoya omotama ena bitange bina bote’oho.

³³Ko amasumola lisai limoi, ate, Lifoka lina loola liyali yoka nyango ena mampa eneki boyoto’omoi otambaka, ko aofisa ena farine bike, nko litres ntuk’isaso l’otoa, yengoko farine ehatu eosangwa la nyango eho.

³⁴Yesu aosumola bato’aho bik’ike baoyi’ane bahatu nko l’asai; aotenda l’iyo nk’en’asai kei,

³⁵lacina yoi linaliki bosumoli otendaka yilame, ate, Nongomumola bonyu’onami l’asai; Nongotend’aoyi banafisi nk’ena limatsako lina loko.

³⁶Eneki Yesu otongolaka bato’aho bik’ike, aotua en’otumba; ko bakili’anande baoy’eneyal’ende, iy’ate, Otosakitwele ncina ena lisai lina tolenge tona lisala.

³⁷Ko amasumola, ate, Onofusa beona ben’olotsi nko Bon’on’oto;

³⁸lisala nko benyanga behetu; beona ben’olotsi nko ban’ana lifoka, koko tolenge nko ban’ana On’owe;

³⁹ko bookyi’owe onofusaki toho nko Satana; koko enukelo nko nsimbo en’esike; ko banukoli bayali nko bikima bina loola.

⁴⁰Yoka bosamb’onasusanyama tolenge, ko totumbama la nkoi, esimbelo en’esike engoyala nk’oho.

⁴¹Bon’on’oto angotoma bikima binande bina loola, ko iyo bangosusanya baoyi bahatu banakumb’ato ko l’iy’an’il’owe ena lifoka linande,

⁴²ko bangafusa en’etumbelo ena nkoi: meho engata nko bilelo bina mposoli la nkenyanya en’aino.

⁴³Nkwaho bana mbongi bangololoma ena lifoka lin’afango’oniyo yoka bosamb’onoyali bina. Ende onoyali l’atoi lacina aoke, aongya lilofa.

⁴⁴Lakina lifoka lina loola liyali yoka lituka linalifusi ena lisala. Boto’omoi aosungya liho, koko aofisa lakina, ko aocoa l’ekiko, ko aotekya toma tonatoat’ende tohatotu, ko aosomba lisala liho.

⁴⁵Lakina, lifoka lina loola liyali yoka bosombi’ona baongwa onokemba perles ina ndoci.

⁴⁶Ko enasungy’ende perle emoko eneseki’otuya, aocoa otekya toma tonatoat’ende tohatotu, ko aosomba perle eho.

⁴⁷Lakina lifoka lina loola liyali yoka lisangi linalifusama ena lose, ko yasusanya nse y’ekotua l’ekotua.

⁴⁸Enelola liho nko to, baosuma en’okili; ko baokisase, ko baosusanya nse y’olotsi ena tofondo, koko baoka nse y’owe.

⁴⁹Engoyala nk’osamb’oho en’esimbelo en’esike; bikima bina loola bangoya okambwanya bato ban’owe la bato bana mbongi.

⁵⁰Ko bangofusa ban’owe en’etumbelo ena nkoi: meho engata nko bilelo bina mposoli la nkenyanya en’aino.

⁵¹Yesu amaufola, ate, Bomononganya nde baoyi’ane bahatu? Iy’ate, O, Nkolo.

⁵²Koko amasumola, ate, Lacin’eho, botengi l’otengi bon’ekanda onolakama en’aoyi bana lifoka lina loola, ayali yoka boto onoyali mene’otumba, onofodya ena lituka linande toma tomoi tona tototo ko la tomoi tonatokindaki.

⁵³Eneki Yesu okadyaka basai bane, aumaki meho.

⁵⁴Ko eneki’nd’oyelaka en onyanga bonandamene, amalaka ena sunagoga. Ko iyo baofefa, Mbo, boto’one amolata bomwu bone la bikambwa bine bina mpefa meya?

⁵⁵Afayali nde bon’ona charpentier? Lina lina nyango enande lifayali nde Malia? Yakobo la Yosefa la Simona la Yuda, bafayali nde bakune’anande?

⁵⁶Ko bambangela’anande, bafayali nk’enek’iso, iyatu? One amolata baoyi’ane bahatu meya?

⁵⁷Ko iyatu bamooka nko bowe. Koko Yesu amasumola, ate, Bosumoli afinde lokumo, yengoko en’onyang’onandamene, l’en’otumb’onandamene.

⁵⁸Koko ende atakamb’ikambwa bina mpefa bike meho, lacin’ena biinda boniyo bon’imeedyo.