Read ngando Matayo 14 Bible Online

Matayo 14 - ngando bible

Matayo 14

¹En’esik’eho Elode, nko vice-gouverneur, aokaki lokumo lona Yesu;

²ko aosumola basali’anande, ate, One nko Yoane Bini, amoletwa en’ewedi, ko lacin’eho, bikambwa bina mpefa biyakambame l’ende.

³Lacin’oka Elode aundaki’ale Yoane, ko aotungyaki, ko aoekelaki en’otumba bon’enyolo lacin’ena Elodia, booli bon’akune’onande Filipo.

⁴Lacin’oka Yoane aosumolaki’ale, ate, Nk’otamb’ende booli’one, osondola boeka.

⁵Asokolanga ayake Yoane, koko aangaki bato, lacin’iyo baotangaki nko bosumoli.

⁶Koko eneki bina bona liofwa lin’eotwelo ena Elode oyelaka, bon’ona Elodia bon’oyoto ainaki boina en’oso’oniyo, ko Elode akikaki l’ende.

⁷Lacin’eho, aosembedyaki esemba nko la nteha en’eteho, ate angofa iyema in’etaketaka iningi’nd’olomba.

⁸Ko ende, enem’end’olakama la nyango enande, ate, Ompe mendo bote bona Yoane Bini ena salani.

⁹Ko lifoka aokaki lokeseli; koko lacin’ena basangya banande, ko lacin’eniyo banakisak’ase l’ende ena toma, atomaki yoi lacina baofe nko bote’oho.

¹⁰Atomaki lacina bakese bote bona Yoane Bini en’otumba bon’enyolo.

¹¹Baoya l’ote’onande ena salani, ko baofa bonome’on’oyoto, ko ende aotoela nyango enande.

¹²Ko bakili’anande bayaki, baambolaki boduo, bakunjaki boho, ko bacoaki osumola Yesu.

¹³Ko eneki Yesu ookaka yoi liho, auma meho en’atu, aocoa en’okala bona sengelenge ende kei. Koko bik’ike bon’ato baoka, ko baofola en’enyanga, ko bamokila l’akaka.

¹⁴Ko eneki Yesu otefwaka, aena bik’ike bon’ato, ko amaokamel’isei; ko aikyaki bato’aniyo banayaaki la nkangi.

¹⁵Ko eneki bina omatsaka yila, bakili’anande baoya eneyal’ende, iy’ate, Edye ene nko sengelenge, ko bin’omila; tongola bato, bacu oyosombel’iyoamene toma en’enyanga.

¹⁶Koko Yesu amasumola, ate, Bacu lanai? Inoamene baf’iyo toma lacina bale.

¹⁷Iyo bamosumola, Mbo, iso toata mendo nko mampa itano la nse ife kei.

¹⁸Yesu ate, Bonjele toma toho.

¹⁹Ko aosumola bato’aho bik’ike bakisase ena tolenge; ko eneki’nd’otambaka mampa ih’itano la nse ih’ife, aolenda ena loola, aosak’osako, ko aokesa, ko aofa bakili mampa iho, ko bakili baofa bato’aho bik’ike.

²⁰Ko iyatu baola, ko baokinda, ko baambola bitate binicikalaki nko batungu jo l’afe to.

²¹Ko iy’analaki toma bayaaki mpame yoka nkoto itano, ko l’ayato l’anatome nkoho.

²²Isasanga Yesu aosomya bakili’anande lacina bayookela en’atu, ko baleke lose en’oso’onande, kum’endamene ayatongole bato’aho bik’ike.

²³Ko eneki’nd’otongolaka bato’aho, aanda ena lingonji nk’ende kei lacina aonde. Ko eneki likolo mene oyelaka, ayaaki meho nk’ende kei.

²⁴Koko boatu boyela ena ntoto mene ena lose, boyaene bino l’afukumo, lacin’oka lofongo lofekyaki boatu.

²⁵Ko en’esike en’akel’ina, Yesu aoy’eneyal’iyo, ayakende ena liko y’asi bana lose.

²⁶Ko eneki bakili oenak’ende ayakende ena liko y’asi bana lose, baoka losomo, iy’ate, Oho nk’esiko? ko baololomwa la losomo.

²⁷Ko isasanga Yesu aotenda l’iyo, ate, Bokiky’etema; one nk’emi, botaangake.

²⁸Petelo amoutodya, ate, Nkolo, yomb’e, ombelele, nje eneyal’e ena liko y’asi.

²⁹Ate, Yaka. Ko eneki Petelo opusolaka ena lose aokenda ena liko y’asi lacina acu eneyali Yesu.

³⁰Koko eneki’nd’oenaka lofongo lona lokolo, aanga, ko aomatsa yina en’asi, ko aelela, ate, Nkolo, ombikya!

³¹Isasanga Yesu aonanola likasa linande, amounda, ko amolokwela, ate, Onde l’imeedyo nk’isalisali, okandakandaki lanai?

³²Enek’iy’oyokelaka en’atu, lofongo losila nkwaho.

³³Ko iy’anayaaki en’atu baoya oyokumy’ende, iy’ate, Solosolo, oyali Bon’ona Yakomba.

³⁴Enek’iy’olekaka, baosema en’onyanga bona Ngeneseleta.

³⁵Ko eneki bato ban’onyang’oho oeyak’ende, baotoma yoi ena bicimo bihitu bin’oli l’iyo; ko bamoyela bato bahatu banayaaki la nkangi;

³⁶ko bamoonda af’iyo etelo lacina basuke boseleka bon’okoto’onande kei. Ko iyatu banosukaki baikyamaki.