Read ngando Matayo 15 Bible Online

Matayo 15 - ngando bible

Matayo 15

¹Nkwaho Bafalusi l’atengi ban’ekanda banayaki ena Yelusalema baoya eneyali Yesu, iy’ate,

²Bakili’ane bafulunganya beeka beneki bankya otocikelaka lanai? Enal’iyo toma bafasonge’akasa.

³Ko ende amalokwela, ate, Iy’inoamene, bofulunganya beeka bena Yakomba lacin’ena baoyi’anino banaki bankya lacina nai?

⁴Yakomba amila, ate, Fika bafango’one la nyango ene, ko ende onosaiya bafango yombo nyango, awu nko tu.

⁵Koko ino bila, Mbo, onila bafango’onande yombo nyango enande, ate, Boho bonokoli lacina nkokokamby’ino l’oho bomofama eneyali Yakomba:

⁶kang’afafike bafango la nyango, afana likambo. Yok’oho ino boyaka yoi lina Yakomba lacin’ena baoyi’anino bana bankya.

⁷Ino besimo? Yesaya atendaki nko solosolo ena likambo linino, eneki’nd’oilaka, ate,

⁸Bato’ane baolama l’emi l’enyu’eniyo, Ko bampik’emi la nkefu iniyo; Ohonde betem’eniyo bend’osana l’emi.

⁹Bankumy’emi nko bototoloto, Eneyalak’iyo balako banayali nko beeka ben’ato kei.

¹⁰Ko eneki’nd’oelelaka bik’ike bon’ato eneyal’ende, amasumola, ate, Bolofa, ko boongya linonganya:

¹¹boto afehyama l’oho bonotua en’onyua: boho bonofola en’onyua, boho behy’oto.

¹²Nkwaho bakili’anande baoy’oyosumola, iy’ate, Eya nde Bafalusi bamok’owe lacin’ena baoyi’ane banak’iy’ookaka?

¹³Koko ende aokutola, ate, Bote l’ote bonotafusa Bafango’onami onoyali ena loola bongoluolama.

¹⁴Bacike, iyo nko balonji banodyak’aiso banalonda bakin’ato banodyak’aiso. Yombo onodyak’aiso alond’okina onodyak’aiso, iy’afe bangokwela lifoku.

¹⁵Petelo aamba, ate, Otosakitwele ncina ena lisai line.

¹⁶Yesu ate, Ino nkoho botanonganya nde?

¹⁷Boteya nde boho bonotua en’onyua bocoa en’otema, ko bofodyama ena lifoku?

¹⁸Koko baoyi bahatu banafola en’onyua baoya nk’en’otema, ko baho baehya boto.

¹⁹Lacina biango bin’owe, la njaka en’ato, la mposa ina bakele, la mposa ina basamba, la liya, la beloko bena mpoci, la besao: baoyi’ane baofola nk’en’otema;

²⁰baoyi banehya boto nd’aho; ohonde, kang’oto ala toma kum’atasonga bakasa, yoi liho lifehy’oto.

²¹Ko Yesu aumaki meho, ko acoaki en’onyanga bona Tula la Sidona.

²²Ko lenda, boyoto’omoi, ise Kanana, aoya en’ili’oho, aololua, ate, Nkolo, Bon’ona Dawidi, onjokamel’isei; bon’onami on’oyoto aen’ino mene la demona.

²³Koko ende atokutwela yoi limoko tu. Ko bakili’anande baoya, bamoonda, iy’ate, Oitanya: ayatokil’iso la ndolua.

²⁴Koko ende aila, ate, Emi ntomamaki nk’eneyali mpate ina bondongo bona Yisalaele ineyungaki kei.

²⁵Koko amoosamela, ate, Nkolo, onkambya.

²⁶Koko Yesu ate, Bana bafakumolama toko lacin’eho toho tofuselame tombwambwa.

²⁷Ate, Solosolo, Nkolo, ohonde tombwambwa tola mpumbwu ineyakwa ena mesa ena nyangetuke eniyo.

²⁸Yesu amokutwela, ate, Boyoto, imeedyo ine iseki’okolo: yoi linalang’e yilame eneyal’e. Ko bon’onande aikyamaki nk’ena heure eho.

²⁹Ko eneki Yesu oumaka meho, aoya ena mbolimboli la lose lona Ngalilaya; ailela ena lingonji, ko aokisase meho.

³⁰Ko bik’ike bon’ato baoya eneyal’ende, baoya la bitumbe, ko la banodyak’aiso, ko la bekukuluku, ko l’anawisa bilama bimoi, ko l’ato’amoi bike, ko bamaambya en’akaka bana Yesu, ko amaikya.

³¹Ko bato bik’ike baofefa, enek’iy’oenaka bekukuluku bayatende, la banawis’ilama bayaike, la bitumbe bayakende, l’anodyak’aiso bayene; ko baokumya Yakomba ena Yisalaele.

³²Koko Yesu aelelaki bakili’anande eneyal’ende, ko aila, ate, Emi lokamel’ato’ane bik’ike isei, lacin’iyo bayali l’emi beco’esaso, ko bafana toma; ko mpalange njatongole nko njala, batotenya ena mboka.

³³Bakili’anande bamosumola, iy’ate, Mendo ena sengelenge tongata mampa bike inakolana likinz’ato bik’ike yok’one meya?

³⁴Yesu amaufola, ate, Boyali la mampa inga? Iy’ate, Nsambo, la tosese tonatofan’ike.

³⁵Ko aosumola bato’aho bik’ike bakisase ena loko;

³⁶ko aotamba mampa iho nsambo ko la nse; ko aokanga Yakomba lokango, ko aokesa, ko aofa bakili’anande, ko bakili baofa bato.

³⁷Balaki nk’iyatu, ko baokinda; ko baambola bitate binicikalaki tofondo nsambo nko to.

³⁸Ko iy’analaki bayaaki mpame nkoto inei ko l’ayato l’anatome.

³⁹Ko aotongola bato’aho bik’ike, ko aoyokela en’atu, ko aoyela en’onyanga bona Mangandala.