Read ngando Matayo 16 Bible Online

Matayo 16 - ngando bible

Matayo 16

¹Ko Bafalusi la Basadoke baoya eneyali Yesu lacina baomeke, ko bamoufola lacina aatume ndembi ena loola.

²Ko amakutwela, ate, La likolo ino bila, Mbo loi bongoyala nko sengelele lacin’oka loola loyali yoka ngola.

³Ko l’okulu in’ate, Bon’in’one mbula engolwa, lacin’oka loola loyali ficifici yok’akila. Ino beya lifokola elongi ena loola; koko bofafokolisa ndembi ina bisike.

⁴Bato ban’eotwelo ene en’owe l’en’akele bayakembe ndembi; koko ndembi efafamaki eneyal’iyo, yengoko ndembi ena Yona kei. Koko amacika, ko aocoa.

⁵Eneki bakili olekaka en’ili’ol’ei, baolofela litola mampa.

⁶Yesu amasumola, ate, Bolendaka, ko boongya lilota nyango ena mampa ena Bafalusi la Basadoke.

⁷Bakili baosumolana, iy’ate, Lacin’oka totaya la mampa.

⁸Eneki Yesu ofokolaka baoyi’aho, amasumola, ate, In’anayali l’imeedyo nk’isisali kei, boyatendane lacina enetay’ino la mampa lanai?

⁹Botanonganya nde, ko bofakanedya nde mampa ih’itano iniki bato nkoto itano olaka? ko la botuya bona batungu bana bitate binik’in’oambolaka?

¹⁰Ko bofakanedya nde mampa iho nsambo iniki bato nkoto inei olaka, ko la botuya bona tofondo tonatok’in’oambolaka?

¹¹Ncina eka nai enefanongany’ino noka emi ntatenda l’ino lacin’ena mampa? Boongya lilota nyango ena mampa ena Bafalusi la Basadoke.

¹²Nkwaho baononganya ende atasumol’iyo balote nyango ena mampa mene: balote nko lilako lina Bafalusi la Basadoke.

¹³Eneki Yesu oyaka en’onyanga bona Kaisalia ena Filipo, aufola bakili’anande, ate, Bato bantang’emi, Bon’on’oto, nai?

¹⁴Ko iyo, Mbo, bamoi baila, iy’ate Onde Yoane Bini; bamoi Eliya; bamoi Yelemaya, yomb’omoi ona basumoli.

¹⁵Ko amaufola, ate, Iy’inoamene: bontang’emi nai?

¹⁶Simona Petelo amokutwela, ate, Oyali Masiya, Bon’ona Yakomba eneyaike.

¹⁷Yesu amolokwela, ate, E Simona, bon’ona Yona, osakelama bosako; lacin’oka bonufo la bakila batakotum’e yoi line: onokotumaki liho nko Bafango’onami onoyali ena loola.

¹⁸Koko lakosumol’e, oyali Petelo; ko nongofaka ekelesia enami ena lufe line; ko nkombo ina Adese ifakoiyaki eho.

¹⁹Nongokofa nsete ina lifoka lina loola; ko yoi lin’etaketaka linatungy’e ena loko lingotungama ena loola; ko yoi lin’etaketaka linatungol’e ena loko lingotungwa ena loola.

²⁰Nkwaho aofekya bakili’anande, batasumolake boto’omoko oka ende ayali Masiya.

²¹En’esik’eho Yesu aomatsa lituma bakili’anande ate angocoa ena Yelusalema oyen’ino la baoyi bike eneyali bingambe la nkanga ina toome ko l’atengi ban’ekanda, ko angoyakama, ko en’ina bon’esaso angetwa en’ewedi.

²²Petelo amotamba, ko aomatsa lifela Yesu, ate, Ef’oho, Nkolo; yoi line lifilamaki eneyal’e.

²³Koko aohelengwa, ko aosumola Petelo, ate, Eta ena mbus’enami, Satana; ond’ekumbelo eneyal’emi, lacin’oka ofakanele baoyi bana Yakomba: okanela nko baoyi ban’ato.

²⁴Nkwaho Yesu aosumola bakili’anande, ate, Yombo boto alanga ankile, akoli eneyal’ende ayofim’endamene, ko aambole ekulusu enande, ko ankile.

²⁵Lacina boto l’oto onolanga amonya liiko lonande, angungya loho; koko boto l’oto onungya liiko lonande lacin’enami angosungya loho.

²⁶Yomb’oto atamba lituka lina loko lohalotu, koko ayoungy’endamene, nkita en’at’ende eka nai? Boto aenganya liiko lonande la nai?

²⁷Lacina Bon’on’oto angoya la bikima binande ena bokoka bon’afango’onande; ko en’esik’eho angolukola boto l’oto l’oluko bonokoli l’ikambw’inande.

²⁸Solosolo, lakosumol’ino, bamoi’aniyo banemali mendo bafenaki bewedi yengoko baena Bon’on’oto aoya ena lifoka linande.