Read ngando Matayo 17 Bible Online

Matayo 17 - ngando bible

Matayo 17

¹Eneki bekol’otoa oetaka, Yesu aotamba Petelo ko la Yakobo la Yoane onotwa l’ende en’ecimo, ko amatola ena lingonji lina litale ena lokuko.

²Ko ende aohalingwa bokotu’okina en’oso’oniyo: elongi enande eololoma yoka bosamb’onololoma bina, ko bisenda binande bioyalama telele yoka fololo.

³Ko lenda, Mose la Eliya baenya eneyal’iyo, bayesole l’ende.

⁴Koko Petelo aolokwela Yesu, ate, Nkolo, bolotsi lacin’eho toyali mendo: yomb’olanga, bolotsi tofake mendo balombe basaso: limoko line, limoko lina Mose ko limoko lin’Eliya.

⁵Nk’enem’end’otenda, lenda, lilo lina kalikali limakunda; ko lenda, lofoso lookana ena lilo, loila, ate, One nko Bon’onami ona nganji, onombatel’emi enyanga mene; bolofamele.

⁶Eneki bakili ookaka, baokwa ena bilongi biniyo, ko baoka losomo mene.

⁷Ko Yesu aolama l’iyo, amasuka, ate, Bemala, botokake losomo.

⁸Ko enek’iy’oenolaka baiso’aniyo, baten’oto, yengoko Yesu kei.

⁹Enem’iy’okita ena lingonji, Yesu amasumola, ate, Botasumolake boto’omoko yoi line, yengoko kuma Bon’on’oto aetwa enek’anawaki.

¹⁰Koko bakili’anande bamoufola, iy’ate, Batengi ban’ekanda baila, Mbo akoli lacina Eliya ayi en’oso, ncina eka nai?

¹¹Yesu amakutwela, ate, Solosolo, akoli lacina Eliya ayi, ko aongya baoyi bahatu;

¹²koko lakosumol’ino, Eliya amosila liya, ko iyo bateeya, koko bailelak’ende nko baoyi banak’iyoamene olangaka. Nk’osamb’oho Bon’on’oto angen’ino l’iyo.

¹³Nkwaho bakili baonongany’oka atangaki nko Yoane Bini.

¹⁴Enek’iy’oyelaka eneyali bik’ike bon’ato, mpame emoi aoy’eneyal’ende, ayune baongo en’oso’onande, ate,

¹⁵Nkolo, okamela bon’onami ona mpame isei; lacin’ende aen’ino mene l’osinga; ma-ma akwela nkoi, ko mama akwela lose;

¹⁶lomoyedyaka eneyali bakili’ane, koko iyo batiikyisa.

¹⁷Yesu aokutola, ate, Eotwelo enefan’imeedyo l’ena lopoko! nongokinda l’ino bolingolingo boya? Nkokong’ino bolingolingo boya? Boyaka l’ende eneyal’emi.

¹⁸Ko Yesu aofela demona lofeli; ko aofola eneyali ende, ko bonome aikaki nk’ena heure eho.

¹⁹Bakili baoya eneyali Yesu ena lokuko, ko bamufola, Mbo iso totofodyisa lacina nai?

²⁰Yesu amasumola, ate, Lacina enefan’ino imeedyo; lacin’emi lakosumol’ino, solosolo, yomb’ino boyali l’imeedyo, kang’iho ikoli la boona bona sinapi kei, tumbe bongosumola lingonji line, Uma mendo, coaka mei; ko linguma. Efaataki ekambwa enefakambis’ino.

²¹(Koko demona en’okotu’one efafole yengoko la boondo ko la nkila ena toma.)

²²Ko enek’iy’oyalaka ena Ngalilaya, Yesu amasumola, ate, Bon’on’oto angolekyama en’akasa ban’ato;

²³ko bangoyak’ende, ko en’ina bon’esaso angetwa en’ewedi. Ko iyo baokaki lokeseli mene.

²⁴Enek’iy’oyelaka ena Kapalanauma, basusanyi bana mpuci ena tempelo baoy’eneyali Petelo, Mbo, bolaki’onino afafute mpuci ena tempelo?

²⁵Ate, Afuta. Ko eneki’nd’otuaka en’otumba, kum’ataat’etelo otenda, Yesu amoufola, ate, Simona, bafoka bana loko batambeela mpuci yombo lombande eneka nai? yombo eneka bana baniyoamene, yombo enek’efenda? Na kanel’e?

²⁶Eneki Petelo oilaka, ate, Enek’efenda, Yesu amosumola, ate, Yok’oho bana mene bafafute.

²⁷Ohonde, lacina totokumb’iyo, ombocoa, fusa ndofanyi ena lose, tamba nse enengund’e en’oso; ko enengi omumola bonyua bona nse ongosungya sekele emoko; tamb’eho, ko af’iyo lacin’enami l’ene.