Read ngando Matayo 18 Bible Online

Matayo 18 - ngando bible

Matayo 18

¹En’esik’eho bakili baoy’eneyali Yesu, iy’ate, Onoleki ena lifoka lina loola oka nai?

²Ko Yesu aelela bonome eneyal’ende, ko ameemadya ena ntoto eniyo,

³ko aila, ate, Solosolo, lakosumol’ino, yomb’ino bofayosume en’aoyi’owe, ko bofayalame yoka bosamb’onoyali banatome, bofatuaki ena lifoka lina loola tu.

⁴Lacin’eho, boto l’oto onoyofim’endamene yok’onome’one, ende aleki ena lifoka lina loola.

⁵Boto l’oto onotamb’onome yok’one ena lina linami, antamb’emamene.

⁶Koko yomb’oto akumb’omoi ona bane ban’asali’asali bananjimedy’emi, bolotsi eneyal’ende bakakele lufe ena nkingo enande, nko lufe lina likolo linaminyaminy’iyo basongu, ko baofuse ena lingunda lina lose.

⁷Bino eneyali bato bana loko lacin’ena bikumbelo! Bikumbelo bingoya solosolo; koko bino eneyali boto’oho onoyedya biho.

⁸Lacin’eho, yombo likasa line, yombo likaka line, yokokumba, kesa liho, ko oka eneyal’e nko mboka: eleki bolotsi eneyal’e lacina otua ena liiko la lianda yombo l’etumbe, efa lacina ookame ena nkoi inifalime l’akas’afe yombo l’akak’afe.

⁹Ko yombo liso line yokokumba, tokola liho, ko oka eneyal’e mboka: eleki bolotsi eneyal’e lacina otua ena liiko la liso limoko, efa lacina ookame ena nkoi ina Ngena l’aiso bah’afe.

¹⁰Boongya lilenda, botongotembola omoi ona bane ban’asali’asali; lacin’emi lakosumol’ino, bikima biniyo bina loola baeneela elongi ena Bafango’onami onoyali ena loola.

¹¹(Lacina Bon’on’oto ayaki oyikya onungaki.)

¹²Na kanel’ino? yomb’oto ayali la mpate bokama, ko emoi eunga, afacike mpate ntuk’ibwa la mpate ibwa, ko aocoa en’angonji oyofona mpate enokungaka?

¹³Ko yombo asungy’eho, solosolo, lakosumol’ino, ekiko enok’ende lacin’ena mpate enekungaki eleki ekiko en’ok’ende lacin’ena mpate ntuk’ibwa la mpate ibwa initakunga.

¹⁴Nk’osamb’oho, Bafango’onino onoyali ena loola afalange omoko ona bane ban’asali’asali aehyame.

¹⁵Yombo efili ene akilel’e yoi lin’owe, coaka oyolokwele yoi linande lin’owe, e l’ende kei; yombo akolofamela omolata efili ene.

¹⁶Koko yomb’afakolofe, tola l’e boto’omoi, yomb’ato’afe, lacina baoyi bahatu bakodyame l’enyua bena temoins ife yomb’isaso.

¹⁷Ko yomb’afalof’iyo, sumola baise ekelesia; ko yombo afalofe baise ekelesia nkoho, bokanele yoka boto onofeya Yakomba ko yok’osusanyi bona mpuci.

¹⁸Solosolo, lakosumol’ino, baoyi l’aoyi banatungy’ino ena loko bangotungyama ena loola; ko baoyi l’aoyi banatungol’ino ena loko bangotungwa ena loola.

¹⁹Lakina, lakosumol’ino, yombo bamoi’anino bafe baambana ena loko lacin’ena yoi litutuma linaling’iy’oufola, yoi liho lingilama eneyal’iyo la Bafango’onami onoyali ena loola.

²⁰Lacin’oka enasolongana bato’afe yomb’asaso ena lina linami, emi njali nko meho ntoto eniyo.

²¹Nkwaho Petelo aoy’eneyal’ende, ate, Nkolo, nk’efili anjilel’emi yoi lin’owe, emi njotungole betungola benga? Yombo betungola nsambo?

²²Yesu amosumola, ate, Mpakiil’oka ongosimba ena betungola nsambo: yengoko betungola ntuku nsambo ina nsambo.

²³Lacin’eho, lifoka lina loola yakolana l’oto’omoi, lifoka lina roi, onilaki ate aale besilo bena baombo’anande.

²⁴Ko eneki’nd’omatsaka yala beho, baoya eneyal’ende la boombo’omoi onoyaaki l’osilo bona batalento nkese.

²⁵Koko enetaat’ende bosolo lacina akadya bosilo, nyangetuke enande ailaki, ate akafame, l’ende l’ooli l’ana ko la toma tohatotu tonatoki’nd’oataka, ko bakadya bosilo.

²⁶Lacin’eho, boombo’oho amoosamela, ko amoonda, ate, Nkolo, ondedy’imbwu, ko nongokadya bosilo kalikali.

²⁷Nyangetuke ena boombo’oho amookamel’isei, amotungola, ko amiikya en’osilo’onande.

²⁸Koko boombo’oho aofola, ko aosungya boombo’omoi onoyaaki l’osilo eneyal’ende deniers bokama. Ko amounda, ko asokokom’ende ena nkingo, Mbo, kadya bosilo en’atenyi’anami l’e.

²⁹Boombo’oho aosama en’akak’anande, ko amoonda, ate, Ondedy’imbwu, ko nongokadya bosilo kalikali.

³⁰Koko ende atalanga; aocoa, ko amofusa en’otumba bon’enyolo, yengoko akadya bosilo.

³¹Eneki baombo’amoi oenaka baoyi’aho banilamaka, iyo baoka lokeseli mene; ko baoy’osumola nyangetuke eniyo baoyi bahatu banilamaka.

³²Nkwaho nyangetuke ameelela, amosumola, Mbo e boombo’on’owe! nkotungolaki en’osil’oho bohotu, lacin’oka ombondaki:

³³iya, ncina enetookamel’e boombo’omoi isei, yok’onoki’m’okookamelak’e isei, eka nai?

³⁴Ko nyangetuke enande aolemwa l’olema mene, ko amolekya eneyali basisodyi, yengoko akadya bosilo bohotu nko kali.

³⁵Ko Bafango’onami onoyali ena loola angokilel’ino nko yok’oho, yomb’ino bofikyane boto l’oto efili enande l’otema bohotu.