Read ngando Matayo 19 Bible Online

Matayo 19 - ngando bible

Matayo 19

¹Eneki Yesu okadyaka baoyi’ane, aumaki ena Ngalilaya, ko aoya en’onyanga bona Yudea, nk’en’etenyi eho eneyali en’ili bona Yoladane.

²Ko bik’ike bon’ato bamokila, ko amaikya meho.

³Koko Bafalusi baoy’eneyal’ende, bamomeka la longo, iy’ate, Yomb’oto ayaka liala en’atenyi’anande l’ooli’onande lacin’en’akambo ban’etaketaka, asondola nde beeka?

⁴Ko amakutwela, ate, Ino botaanda nde, ende onanunolaki ena limatsako, anunolaki mpame l’oyoto;

⁵ko ailaki, ate, La ncin’ene, boto angocik’afango la nyango enande, ko angambana l’ooli’onande; ko iy’afe bangoyala nko yonge limoko?

⁶Iyo bafayali lakina bafe: bayali nko yonge limoko kei. Lacin’eho, baho banaki Yakomba oambanyaka, boto ataambolake.

⁷Koko iyo bamosumola, Mbo Mose ailaki ate boyoto afame bokanda bona njaka ena liala ko aumolame, ncina eka nai?

⁸Amasumola, ate, Mose aimedyaki bumole baali’anino nko lacin’ena bocilingitano bon’etem’enino: ena limatsako etayala yok’oho.

⁹Koko emi lakosumol’ino, boto l’oto onumola booli’onande, kuma booli ataata likambo lina likele, ko aosong’okina, endamene aotata likele; ko boto onotamb’oyoto’oho onoki’nd’oumolaka, aotata likele nkoho.

¹⁰Bakili’anande bamosumola, iy’ate, Yombo bokotua bonakolana la mpame l’ooli’onande boyali yok’osamb’oho, bolotsi bafasongane ena liala.

¹¹Koko amalokwela, ate, Bato bahatu bafakolana litambisa yoi line, yengoko iyo banaki yoi line ofamaka.

¹²Lacina baunuko bamoi bayali banotwaki yok’oho en’etema bena nyango iniyo; ko bamoi bayali banaki bato oilaka baunuko; ko bamoi bayali banayoilak’iyoamene baunuko lacin’ena lifoka lina loola. Onokolana litambisa yoi line, atambake liho.

¹³Nkwaho baoyelaki banatome lacin’eho atadya bakasa banande eneyal’iyo ko aonde; koko bakili bamasimba.

¹⁴Koko Yesu aila, ate, Bacike, banatome bayi eneyal’emi, botasimbake; lacin’oka baise lifoka lina loola bayali yok’osamb’onoyal’iyo.

¹⁵Ko aotadya bakas’anande eneyal’iyo, ko auma meho.

¹⁶Ko lenda, boto’omoi aoy’eneyal’ende, ate, Bolaki on’olotsi, ekambwa en’olotsi enengi’m’okamba lacina mbate liiko lonelofakale eka nai?

¹⁷Yesu amosumola, ate, Ontang’emi bolotsi lacina nai? Onoyali bolotsi nk’omoko kei, nko Yakomba. Yomb’olanga otua ena liiko, monya basangya.

¹⁸Ate, Basangya baya? Yesu ate, Tayakake’oto; Tatatake likele; Tiyake; Tafotake boto;

¹⁹Fik’afango’one l’oyango’one; ko Ok’onoli l’e nganji yoka bosamb’onayook’e eamene nganji.

²⁰Bofeng’oho amosumola, ate, Momonya baoyi’ane bahatu nko l’olenge’onami: yoi limoi lin’ind’emi lika nai?

²¹Yesu amosumola, ate, Yomb’olanga okolane nko nkolana, coak’otekya toma tonatoat’e, ko faka bato beinda, ko ongata lituka ena loola; ko yaka, onkile.

²²Eneki bofenga ookaka yoi liho auma la lokeseli, lacin’oka aataki lituka mene lina toma.

²³Koko Yesu aosumola bakili’anande, ate, Solosolo, lakosumol’ino, etuelo enatua ntuki ena toma ena lifoka lina loola eyali nko locili.

²⁴Ko lakina lakosumol’ino, la ngamela ntianya bokole bona ntonga, la ntuki ntuaka ena lifoka lina Yakomba, ekambwa eneleki locili nk’etuelo ena ntuki.

²⁵Eneki bakili ookaka yoi liho, baofefa mpefa mene, Mbo, onikyamisa oka nai?

²⁶Koko Yesu amalenda ta, ko amasumola, ate, Yoi line lifilamisa l’ato; koko baoyi bahatu bailamisa la Yakomba.

²⁷Nkwaho Petelo amolokwela, ate, Lenda, iso tocikaki bikambwa bihitu ko tokokilaki. Iso tongata linga nai?

²⁸Yesu amasumola, ate, Solosolo, lakosumol’ino, en’enunwelo ena mbusa, enengi Bon’on’oto okisase ena leko ina bokok’onande, ino nkoho banankilaki bongokisase ena toeko tona bafoka jo la tofe, ko bongotend’akambo bana beloi bena Ba-Yisalaele jo l’efe.

²⁹Ko boto l’oto onocikaki yombo betumba, yombo batoolo, yombo bakune, yombo bambangela, yombo bafango, yomb’oyango, yombo booli, yombo bana, yomb’asala, lacin’ena lina linami, angotamba yok’okam’okama, ko angosangota liiko lonelofakale.

³⁰Koko bamoi bike banayali en’oso bangoyala en’otungu, ko banayali en’otungu bangoyala en’oso.